រាជធានីភ្នំពេញ ៖ ស្ត្រីម្នាក់មិនព្រមនិយាយស្តី អ្វីទាំងអស់គិតតែពីពីស្រែកទ្រហោយំ បន្ទាប់ពីគាត់ត្រូវចោរឆក់ កាបូបស្ពាយយកទៅបាត់ បង្កឲ្យមានការភ្ញាក់ផ្អើលកាលពីវេលាម៉ោងជាង ១២រំលងអាធ្រាត្រឈានចូលថ្ងៃទី ២៦ខែតុលា ឆ្នាំ២០១៦ នៅចំណុចផ្លូវលេខ១៥៥កែងផ្លូវលេខ៤៦០ សង្កាត់ទួលទំពូង១ ខណ្ឌចំការមន ។
ស្ត្រីរងគ្រោះឈ្មោះ Velma Bangwa អាយុ៤៨ឆ្នាំ ជនជាតិ Sierra Leone ស្នាក់នៅសង្កាត់ទួលទំពូង១ ខណ្ឌចំការមន ។ នៅក្នុងកាបូបស្ពាយដែលឆក់យកទៅបាត់នោះមានលុយចំនួន១៨០០ដុល្លារ ទូរស័ព្ទដៃ១គ្រឿង ប៉ាស្ព័រ១ និងកាត ATM ១ ។
តាមសម្តីអ្នកឃើញ ហេតុការណ៍ម្នាក់ សុំមិនបញ្ចេញឈ្មោះ បាននិយាយថា រូបគាត់បានឃើញស្ត្រីរងគ្រោះខាងលើនេះ ធ្វើដំណើររដោយថ្មើរជើងតាមផ្លូវលេខ១៥៥ ក្នុងទិសដៅពីជើងទៅត្បូង ដោយមានស្ពាយកាបូប១ផង នៅពេលដែលគាត់បានដើរទៅដល់កែងផ្លូវលេខ៤៦០ ដែលជាកន្លែងកើតហេតុ ក៏ស្រាប់តែជនសង្ស័យ២នាក់ជិះម៉ូតូម៉ាកអាយខន មិនចាំស្លាកលេខ ធ្វើដំណើរតាមមកពីក្រោយ ពេលដល់ជិតជនសង្ស័យដែលអង្គុយខាងក្រោយ បានធ្វើសកម្មភាពឆក់យកកាបូបស្ពាយ ពីស្ត្រីរងគ្រោះបានសម្រេច រួចបន្ថែមល្បឿនម៉ូតូរត់គេចខ្លួនបាត់ស្រមោល ។
ខណៈនោះស្ត្រីរងគ្រោះ បានស្រែកទ្រហោយំឲ្យគេជួយ បន្ទាប់មកសមត្ថកិច្ចដែលកំពុងល្បាតក្នុងមូលដ្ឋាន ឃើញស្ត្រីរូបនោះឈរយំ បានឈប់សួរនាំ ទើបដឹងថា មានករណីឆក់កាបូបក៏ដឹកស្ត្រីជនរងគ្រោះ ទៅសាកសួរ និងដាក់ពាក្យបណ្ដឹងនៅប៉ុស្តិ៍នគរបាលទួលទំពូង១ ។
ប្រភពពីសមត្ថកិច្ច បានឲ្យដឹងថា នៅពេលទៅដល់ប៉ុស្តិ៍នគរបាល ស្ត្រីរងគ្រោះគិតតែពីស្រែកយំ ដោយមិនព្រមឲ្យសមត្ថកិច្ច ធ្វើការសាកសួរសោះគ្រាន់តែ ប្រាប់ថាមានអ្វីខ្លះនៅក្នុងកាបូបស្ពាយប៉ុណ្ណោះ។ សមត្ថកិច្ចមិនដឹងធ្វើយ៉ាងម៉េច ក៏ឲ្យស្ត្រីរូបនោះត្រឡប់ទៅផ្ទះវិញ សិនដើម្បីរំងាប់អារម្មណ៍ ចាំព្រឹកឡើងចាំមកដាក់ពាក្យបណ្ដឹងម្តងទៀត ៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា ដោយឡែកករណីមួយវិញទៀត សិស្សវិទ្យាល័យបឹងត្របែកម្នាក់ និងបក្ខពួក២នាក់ទៀត ទៅឆក់កាបូបពីស្ដ្រីម្នាក់ ត្រូវសមត្ថកិច្ចតាមបង្ក្រាប។
កម្លាំងនគរបាលខណ្ឌចំការមន បានឃាត់ខ្លួនជនសង្ស័យម្នាក់ ជាសិស្សវិទ្យាល័យបឹងត្របែក និងបក្ខពួក២នាក់ទៀត បានធ្វើសកម្មភាពឆប់កាបូបដៃ ពីស្ដ្រីម្នាក់ នៅថ្ងៃទី០៥ ខែតុលា ឆ្នាំ២០១៦ កន្លងទៅ នៅមុខផ្ទះលេខ៣៦ ផ្លូវ៩៩ ក្រុម២១ ភូមិ៦ សង្កាត់បឹងត្របែក ខណ្ឌចំការមន ប៉ុន្តែភ្លាមៗនោះត្រូវបានកម្លាំង នគរបាលដេញតាមបង្ក្រាប និងចាប់ខ្លួន ខណៈបក្ខពួកទាំង២នាក់នោះ បានរត់គេចខ្លួនបាត់។
មន្ដ្រីនគរបាល បានឲ្យដឹងថា មុនពេលកើតហេតុ ជនសង្ស័យបានធ្វើសកម្មភាព ជិះម៉ូតូឆក់កាបូបដៃ ពីជនរងគ្រោះដែលកំពុងជិះម៉ូតូ ជាមួយប្តី បានសម្រេច ប៉ុន្តែពេលបើកគេចនោះក៏ជ្រុល ទៅបុកម៉ូតូអ្នកដំណើរ បណ្តាលឲ្យដួលជ្រុះកាបូប ហើយត្រូវបាននគរបាល ឃាត់បានជនសង្ស័យម្នាក់ឈ្មោះ ចាន់ ពិសិដ្ឋ ជាសិស្សវិទ្យាល័យបឹងត្របែក រួមនឹងម៉ូតូជិះធ្វើសកម្មភាព ម៉ាក Honda C125 ព័ណ៌ខ្មៅ ពាក់ស្លាកលេខភ្នំពេញ1FT-9090 ព្រមទាំងដកហូតកាបូបជនរងគ្រោះ មកវិញផងដែរ ដែលក្នុងនោះមានលុយ១០ដុល្លារ ទូរស័ព្ទចុចពិល មួយគ្រឿង ចំណែកពីរនាក់ទៀតគេចខ្លួនរួចបាត់។
មន្ដ្រីដដែលបានបន្ថែមថា បើតាមចម្លើយសារភាព ពីជនសង្ស័យបានឲ្យដឹងថា បក្ខពួកដែលរត់គេចខ្លួនទាំង២នាក់ ទី១-ឈ្មោះ វង្ស ស៊ីថា អាយុ១៥ឆ្នាំ ជាអ្នកឆក់ និងទី២-ឈ្មោះ ចិន អាយុ១៩ឆ្នាំ ជាអ្នកជិះម៉ូតូបិទគូថ។ ចំណែកជនរងគ្រោះឈ្មោះ មុត ចន្ថា អាយុ៦១ឆ្នាំ ស្នាក់នៅ ផ្ទះលេខ២០៧បេ ផ្លូវ៩៩ សង្កាត់ផ្សារដើមថ្កូវ ខណ្ឌចំការមន។
ក្រោយពេលឃាត់ខ្លួន ជនសង្ស័យត្រូវបានសមត្ថកិច្ចយកទៅសួរនាំ ដើម្បីស្រាវជ្រាវ រកបក្ខពួកដែលរត់គេចខ្លួន យកផ្ដន្ទាទោស តាមច្បាប់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
