(ភ្នំពេញ)៖ ប្រភពព័ត៌មាន ដែលបានទម្លាយចេញ នាពេលថ្មីនេះ បានឲ្យដឹងថា តារាចម្រៀងកំពុងពេញនិយម ក្នុងស្រទាប់យុវវ័យ ប្រចាំក្នុងផលិតកម្ម ថោន គឺលោក ខេម កំពុងតែរងនូវការព្រមានប្ដឹង ពីសំណាក់សហព័ន្ធកីឡាប្រដាល់កម្ពុជា ក្រោយពីលោក បានចេញចម្រៀងមួយបទ មានចំណងជើងថា «ជីវិតអ្នកប្រដាល់» ដែលសហព័ន្ធកីឡា បានចាត់ទុកថា បទចម្រៀងនេះ មានអត្ថន័យមើលងាយ មើលថោក ដល់កីឡាករប្រដាល់ ក៏ដូចជាអ្នកមានអាជីព ប្រដាល់ទាំងអស់។
ប្រភពព័ត៌មានដដែល បានបង្ហើបឲ្យដឹងថា បន្ទាប់ពីព្រមានប្ដឹងតារាចម្រៀង ខេម រួចហើយ សហព័ន្ធកីឡា បានផ្ញើលិខិតមួយច្បាប់ ទៅដល់ក្រសួងវប្បធម៌ និងវិចិត្រសិល្បៈ ដើម្បីឲ្យចេញលិខិតព្រមានមួយ ដល់ផលិតកម្ម ថោន ដែលបានអនុញ្ញាតឲ្យថតបទចម្រៀងនេះ និងចរាចរផ្សាយជាសាធារណៈ ធ្វើឲ្យប៉ះពាល់យ៉ាងធ្ងន់ធ្ងរ ដល់វិស័យកីឡាប្រដាល់កម្ពុជា។ ក្រសួងវប្បធម៌ និងវិចិត្រសិល្បៈ បានចេញសេចក្ដីព្រមាន និងដាក់បម្រាមចំនួន ៦ចំណុច ជាពិសេស ហាមមិនឲ្យបណ្តាញផ្សព្វផ្សាយ ដូចជា វិទ្យុ និងទូរទស្សន៍ ចាក់ផ្សាយបទចម្រៀង មួយនេះផងដែរ។
បម្រាមទាំង៦ចំណុច របស់ក្រសួងវប្បធម៌ និងវិចិត្រសិល្បៈរួមមាន ទី១៖ គឺព្រមានចុងក្រោយ ដល់ផលិតកម្មថោនឲ្យឈប់រំលោភ បំពានលើច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល ។ទី២៖ ហាមមិនឲ្យផលិតកម្ម ថោន បន្តធ្វើការចែកផ្សាយបទចម្រៀង «ជីវិតអ្នកប្រដាល់»តាមគ្រប់រូបភាព និងគ្រប់មធ្យោបាយ និងដកបទចម្រៀងនេះចេញពី Youtube ផ្លូវការរបស់ ផលិតកម្មថោន ។ ទី៣៖ ហាមមិនឲ្យប្រព័ន្ធផ្សព្វផ្សាយ ទាំងវិទ្យុ និងទូរទស្សន៍យកបទចម្រៀងនេះ ទៅចាក់ផ្សាយ។ ទី៤៖ ហាមមិនឲ្យអ្នកចម្រៀង ខេម ឬ អ្នកចម្រៀងដទៃទៀតយកបទចម្រៀងនេះ ទៅច្រៀងក្នុងវេទិកាប្រគំតន្ត្រី និងគ្រប់វេទិកាដទៃផ្សេងៗទៀត។ ទី៥៖ ហាមមិនឲ្យផលិតកម្ម ថោន យកបទចម្រៀងនេះ ទៅផលិតជាខារាអូខេ ឬជាចម្រៀងកាយវិការឡើយ និងទី៦៖ បង្គាប់ឲ្យផលិតកម្ម ថោន ធ្វើលិខិតសុំទោសជាសាធារណៈ ជូនចំពោះសហព័ន្ធកីឡា ប្រដាល់កម្ពុជា។
លោក ងួន សុបិន អ្នកនិពន្ធបទចម្រៀង «ជីវិតអ្នកប្រដាល់» បានថ្លែងប្រាប់ Khmertalking នៅមុននេះបន្តថា តាមការពិតបទនេះ លោកនិពន្ធឡើង ចង់ឆ្លុះបញ្ចាំងពីជីវិតពិតរបស់ កីឡាករម្នាក់ គឺកីឡាករ កែវ រំចង់ ដែលលោកបានស្គាល់ច្បាស់ ពីប្រវត្តិ និងការតស៊ូក្នុងវិស័យជាកីឡាប្រដាល់ ពោលពុំបានផ្ចាញ់ផ្ចាល ឬសំដៅដល់កីឡាករដទៃណាម្នាក់ ដែលមានជីវភាពធូរធា ក្នុងវិស័យនេះឡើយ។
យ៉ាងណាមិញ ប្រសិនបើសហព័ន្ធមិនពេញចិត្ត ក៏ដូចជាមានការហាមប្រាម ពីក្រសួងវប្បធម៌នោះ រូបលោក ក៏ដូចជាផលិតកម្មទាំងមូល ក៏បានគោរពតាមបំរាមទាំង៦ចំណូចនោះ រួចរាល់អស់ហើយ ដោយយើងមានការហាមតារាចម្រៀង មិនឲ្យច្រៀងបទនេះ ពេលឡើងឆាកតន្រ្តី និងបានដកចេញពីប្រព័ន្ធផ្សាព្វផ្សាយ ទាំងអស់របស់ផលិតកម្ម ថោន មានដូចជា Youtube , Facebook វិទ្យុ និងប្រព័ន្ធផ្សព្វផ្សាយដទៃទៀត រួចរាល់ហើយដែរ។ ជាមួយគ្នានេះ ការផលិតជា VCD ក៏មិនត្រូវបានផលិតឡើងឡើយ។
យ៉ាងណាមិញ ខុសផ្ទុយស្រឡះពីការគាំទ្ររបស់មហាជន ទៅលើបទចម្រៀងថ្មីរបស់ផលិតកម្ម ថោន ដែលបកស្រាយយ៉ាងពីរោះ និងពោរពេញទៅដោយអត្ថន័យ នៃសំឡេងរបស់ តារាចម្រៀង លោក ខេម ដែលបង្ហាញពីក្ដីឈឺចាប់ និងទុក្ខលំបាករបស់ជីវិតកីឡាករប្រដាល់កម្ពុជានោះ បែរជាសហព័ន្ធកីឡាប្រដាល់ សម្ដែងនូវការមិពេញចិត្ត ហើយប្ដឹងលោក ខេម ទៅវិញ។
សូមបញ្ជាក់ថា បទចម្រៀង ដែលក្រសួងវប្បធម៌ សម្រេចហាមឃាត់មិនឲ្យចាក់ផ្សាយតាមស្ថានីយវិទ្យុ ទូរទស្សន៍ រួមមានបទ «អាមុំប៉ុមពីត,ស៊ីបានចេះតែស៊ីទៅ,ទាល់តែយូរទើបស៊ីអូនបាន» និងចុងក្រោយនេះ គឺបទ«ជីវិតអ្នកប្រដាល់»៕
ប្រភព៖ Khmertalking
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា បទ«អនិច្ចារស្នេហាអ្នកប្រដាល់» របស់ ម៉ារ៉ា ប៊ុណ្ណា ទស្សនាហើយស្ទើរស្រក់ទឹកភ្នែក ។ គួររំលឹកផងដែរថា ស្ងាត់ៗស្រាប់តែម្ចាស់បទ« ដីថ្លៃប្រល័យស្នេហ៍» លោក ម៉ារ៉ា ប៊ុណ្ណា បានចេញនូវបទចម្រៀងថ្មី គួរឲ្យភ្ញាក់ផ្អើលជាច្រើនបទក្នុងផលិតកម្ម «Galaxy Song» ក្នុងនោះបទ«អនិច្ចារស្នេហាអ្នកប្រដាល់» ដែលមានការចូលរួមសម្ដែង ដោយអតីតកីឡាករ លោក ជៀស ស្រួច និង លោក អេ ភូថង ពេលបានទស្សនាហើយស្ទើរតែ ទប់ទឹកភ្នែកមិនជាប់ ព្រោះតែបានឆ្លុះបញ្ចាំងពីជីវិតពិតរបស់អ្នកប្រដាល់ ដែលកំពុងរស់នៅក្នុងសង្គមសព្វថ្ងៃនេះ។
បទ«អនិច្ចារស្នេហាអ្នកប្រដាល់» បានបកស្រាយផ្ដោតសំខាន់ទៅលើ ជីវិតរបស់កីឡាករ ដែលកំពុងរស់នៅក្នុងមជ្ឈដ្ឋានអ្នកប្រដាល់ ព្រោះតែជីវភាពខ្វះខាត ត្រូវពឹងតែទៅលើកម្លាំងបាយ តែមួយមុខ ពោលមិនអាចមានជំនាញផ្លូវការណាមួយ ដើម្បីរកប្រាក់កម្រៃបាន ក្រៅពីប្រដាល់ប្រើកម្លាំងនេះឡើយ។ ម្យ៉ាងទៀត ពេលបានឡើងប្រដាល់ទើបបានប្រាក់ចាយ តែបើមិនបានឡើងប្រដាល់ទេ ច្បាស់ជាត្រូវដាច់បាយហើយ។
ចំណុចនេះត្រូវបានអ្នកដទៃមើលងាយមើលថោក មិនផ្ដល់តម្លៃឲ្យ ព្រោះតែភាពក្រីក្រ រហូតត្រូវបាត់បង់ស្នេហា គួរឲ្យអាសូរ ។ ក្នុងន័យនេះអ្នកនិពន្ធ ក៏ចង់ទទូចដល់មនុស្សគ្រប់រូប មេត្តាមានចិត្តសណ្ដោសប្រណី ដល់ជីវិតអ្នកប្រដាល់ ទោះបីខ្លួនក្រ ក៏ស៊ូទ្រាំរស់ដើម្បីបុព្វហេតុ លើកស្ទួយវិស័យក្រីឡារជាតិផងដែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]