រាជធានីភ្នំពេញ ៖ បុរសម្នាក់ ជាប្រជាការពារភូមិ រហស្សនាម «បល្ល័ង្គ១០» បានជិះម៉ូតូ១គ្រឿងដឹកកូនប្រុស២នាក់ផង ធ្វើដំណើរទៅកាន់ប៉ុស្ដិ៍នគរបាលចោមចៅ ដាក់ពាក្យបណ្ដឹងសុំឱ្យនគរបាល ជួយអន្តរាគមន៍ ដោយបានចោទប្រកាន់ឪពុកក្មេកខ្លួនថា បានវាយធ្វើបាបកូនប្រុសរបស់គាត់ ។
បុរសនោះ ស្ថិតក្នុងស្ថានភាពស្រវឹងជោកផងដែរ ហើយខណៈពេលទៅដល់ប៉ុស្ដិ៍នគរបាល បានស្រែកយំឱបកូនប្រុស ទាំងពីរនាក់របស់ខ្លួន និងរៀបរាប់ពីការអាណិតកូន និងសុំឲ្យនគរបាលចាត់ការឪពុកក្មេក ។ ប៉ុន្តែដោយសារគ្មានរបួសស្នាម និងមើលទៅគ្រាន់តែវាយ ដោយរំពាត់តូចតាច និងវាយបន្តិចបន្តួច នគរបាលបានពន្យល់សព្វគ្រប់ ទើបបុរសនោះចាកចេញទៅវិញ ឈប់ប្ដឹងប្តល់ ។
ហេតុការណ៍នេះ បានកើតឡើងកាលពីវេលាម៉ោង ៥និង៤០នាទីល្ងាចថ្ងៃទី២៥ តុលា ស្ថិតនៅក្នុង សាលាសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
បុរសខាងលើនោះឈ្មោះស៊ឹម ចន្នី អាយុ៣១ឆ្នាំ រហស្សនាម «បល្ល័ង្ក១០» ជាប្រជាកាពារភូមិបល្ល័ង្ក ឃុំសំបូរ ស្រុកបាធាយ ខេត្តកំពង់ចាម មានប្រពន្ធឈ្មោះទូច សុខឿន អាយុ៣១ឆ្នាំ កម្មការិនីរោងចក្រកាត់ដេរ មានកូនប្រុស២នាក់ ។ ចំណែកកូនប្រុសដែលបុរសនោះអះអាងថា ត្រូវឪពុកក្មេកវាយនោះឈ្មោះស៊ឹម មាសសុខសោភា អាយុ៣ឆ្នាំ ។ រីឯឪពុកក្មេកឈ្មោះទូច ម៉េត អាយុជាង៥០ឆ្នាំ ជាចុងភៅ មានទីលំនៅក្នុងភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ។
បុរសនោះ បាននិយាយទាំងយំឱបកូនថា ខ្លួនរស់នៅក្នុងភូមិឯណោះទេ ហើយក៏ជាប្រធានក្រុមប្រជាការពារភូមិនោះដែរ ប៉ុន្តែបានឈ្លោះគ្នាបន្តិចបន្តួចជាមួយប្រពន្ធ កាលពីប៉ុន្មានថ្ងៃមុន ។ បន្ទាប់មកប្រពន្ធរបស់គាត់ បាននាំកូនប្រុសទាំង២នាក់ រត់ចេញពីផ្ទះ មកស្នាក់នៅផ្ទះឪពុកម្ដាយក្មេក នៅក្នុងភូមិជ្រៃកោង សង្កាត់ចោមចៅ ។
ក្រោយមក ប្រពន្ធបានចូលធ្វើការរោងចក្រកាត់ដេរ ដោយបានផ្ញើរកូនឲ្យឪពុកម្ដាយក្មេកមើល ចំណែកគាត់ដោយជាប់ការងារ មិនបានមកតាមនោះទេ រហូតដល់វេលាល្ងាចថ្ងៃទី២៥ តុលា ឆ្នាំ២០១៦ ដោយនឹករលឹកកូនពេក ក៏បានធ្វើដំណើរពីខេត្តកំពង់ចាម មកលេងកូន ហើយបានឃើញខ្នងកូនកន្ទួល ស្នាមរំពាត់ហើយពេលគាត់សួរកូនប្រាប់ថា ជីតាវាយ។
ប្រភពដដែលបន្តថា ខណៈនោះគាត់អាណិតកូនខ្លាំងណាស់ ក៏បានសួរនាំឪពុកក្មេកពីហេតុផលដែលវាយកូនគាត់ ទើបបង្កឲ្យមានទំនាស់គ្នាកើតឡើង ហើយឪពុកក្មេកជំរុញឲ្យគាត់ទៅប្ដឹងដល់ណា ក៏ប្ដឹងទៅ ទើបគាត់សម្រេចទៅប្ដឹង នគរបាលឲ្យជួយអន្តរាគមន៍បែបនេះ។
នគរបាលបាននិយាយថា បុរសនោះស្រវឹងស្រាខ្លាំងនិយាយមិនសូវដឹងអីទេ សូម្បីតែទីលំនៅរបស់ឪពុកក្មេក ក៏ដឹងមិនច្បាស់ដែរ ម្ដងថា នៅក្នុងភូមិចោមចៅ និងម្តងថា នៅក្នុងភូមិជ្រៃកោង រកការប្រាកដប្រជាមិនបានឡើយ ។ ម្យ៉ាងដោយសារតែតាមការពិនិត្យជាក់ស្ដែង ការដែលជីតាវាយនោះ ប្រើរំពាត់តូចតាចគ្មានរបួសស្នាម គឺវាយក្នុងការប្រដៅចៅ មិនមែនជាទារុណកម្ម ធ្ងន់ធ្ងរដោយការស្អប់ខ្ពើមឡើយ ។
ប៉ុន្តែដោយសារបុរសនោះ កំពុងមានទំនាស់ក្នុងគ្រួសារ ទើបពេលមានលេសបន្តិចបន្តួច ក៏បានទៅប្ដឹងចោទប្រកាន់ ឪពុកក្មេកខ្លួនឯងបែបនេះ ហើយបន្ទាប់ពីកម្លាំងធ្វើការពន្យល់ ទើបគាត់ឈប់ប្ដឹង និងបានដឹកកូនត្រឡប់ទៅវិញ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]