រាជធានីភ្នំពេញ ៖ នារីវ័យក្មេងស្រស់សោភា មានអាយុប្រមាណជាជាង២០ឆ្នាំម្នាក់ បន្ទាប់ពីបុរសជាសង្សារ រួមរ័ករួចបានច្របាច់កសម្លាប់ ទុកសពចោលទាំងអាក្រាតកាយននលគក នៅក្នុងបន្ទប់ផ្ទះសំណាក់ រហូតដល់ម៉ោង ១១និង៣០នាទីព្រឹកថ្ងៃទី២៥ ខែតុលា ឆ្នាំ២០១៦ ទើបត្រូវបានគេប្រទះឃើញ បង្កឲ្យមានការភ្ញាក់ផ្អើលនៅក្នុងបន្ទប់ C២០ ជាន់ទី៣ ផ្ទះសំណាក់យីហោ «អូ ! យេស» ដែលមានទីតាំងលេខ១៧ ផ្លូវលេខ១៣២ (ខាងកើតវត្តនាគវ័ន) ក្នុងសង្កាត់ស្រះចក ខណ្ឌដូនពេញ ។
ប្រភពព័ត៌មានពី នគរបាលបានប្រាប់ឱ្យដឹងថា នារីវ័យក្មេងរងគ្រោះខាងលើគឺមិនមានអ្នកណាម្នាក់បានស្គាល់ ពីអត្តសញ្ញាណឡើយ ដោយមានអាយុប្រមាណជាជាង២០ឆ្នាំ ប៉ុណ្ណោះ សប្បុរខ្មៅស្រអែម មានសម្រស់ស្រស់សោភា ស្លៀករ៉ូបខ្លី ពណ៌ស ត្រូវបានបុគ្គលិកបម្រើការ នៅក្នុងផ្ទះសំណាក់ ខាងលើប្រទះឃើញដេកស្លាប់ទាំងអាក្រាតកាយននលគក នៅលើគ្រែពូកនៅក្នុងបន្ទប់ នៃផ្ទះសំណាក់នោះតែម្នាក់ឯង ។
ប្រភពបន្តទៀតថា មុនពេលកើតហេតុ កាលពីវេលាម៉ោងជាង៤ល្ងាច ថ្ងៃទី២៤ តុលា មានបុរសវ័យក្មេងម្នាក់ ដែលមានអាយុប្រមាណជាជាង២០ឆ្នាំ បានដើរចូលទៅខាងក្នុងផ្ទះសំណាក់ដែលមានយីហោ «អូ ! យេស» ដោយមកជួលស្នាក់នៅក្នុងបន្ទប់ C២0 រយៈពេលមួយថ្ងៃ ក្នុងតម្លៃ៨ដុល្លាតែម្នាក់ឯង ។
ប្រភពដដែល ក៏បានប្រាប់បន្តទៀតថា កាលពីវេលាម៉ោងជាង ៥ល្ងាចថ្ងៃដដែលក៏ស្រាប់តែមាននារីវ័យក្មេងម្នាក់ បានជិះម៉ូតូឌុបមកឈប់ខាងមុខ ផ្ទះសំណាក់រួចក៏ដើរចូលទៅសួរបុគ្គលិកខាងក្រោមរកបន្ទប់ C២០ ទំនងជាបានណាត់គ្នាតាមទូរស័ព្ទជាមុនហើយ រួចឡើងទៅបាត់ ។
លុះរហូតមកដល់មុនពេលកើតហេតុ ស្ត្រីជាបុគ្គលិកបានឡើងមកជាន់ទី៣ដើម្បីធ្វើការសំអាតតាមបន្ទប់ និងសួរនាំភ្ញៀវថា «តើត្រូវស្នាក់នៅបន្តទៀត ឬក៏យ៉ាងណា0x017d7» ក៏បានធ្វើការគោះទ្វារបន្ទប់ខាងលើ តែមិនមានឮមានអ្នកណាម្នាក់ឆ្លើយ ឬបើកទ្វារឡើយ រួចក៏បានចុះទៅខាងក្រោម យកកូនសោទៅចាក់បើកទ្វារ ។
ពេលដែលស្ត្រីជាបុគ្គលិករូបនោះ ចាក់សោទ្វារបើកចូល ទៅខាងក្នុងក៏បានប្រទះឃើញស្ត្រីរងគ្រោះ ដេកតែម្នាក់ឯងដោយគ្មានសម្លៀកបំពាក់ ពោលគឺអាក្រាតកាយននលគកតែម្តង ហើយក៏បានចូលទៅអង្រួន ជើងដាស់មិនក្រោក ដោយមានសភាពរឹងកំព្រឹសហើយក៏បានរត់ចុះ ទៅប្រាប់គ្នានៅខាងក្រោម ឲ្យជួយឡើងទៅមើល ។
ពេលនោះក្រុមបុគ្គលិកទាំងនោះ ក៏បានឡើងចូលទៅមើលទើបដឹងថា ស្ត្រីរងគ្រោះបានស្លាប់បាត់បង់ជីវិត ទៅហើយមិនដឹងថាបានស្លាប់ តាំងពីពេលណានោះឡើយ ចំណែកឯបុរសជាសង្សារ ក៏មិនមានអ្នកណាម្នាក់បានដឹងថាចុះរត់គេចខ្លួនបាត់តាំងពីពេលណានោះដែរ ទើបបង្កឱ្យមានការភ្ញាក់ផ្អើល និងរាយការណ៍ប្រាប់ សមត្ថកិច្ចមូលដ្ឋានឲ្យចុះមកធ្វើការ ត្រួតពិនិត្យកន្លែងកើតហេតុ ។
ក្រោយពេលកើតហេតុ កម្លាំងមានសមត្ថកិច្ចមូលដ្ឋាន និងជំនាញបានចុះមកធ្វើការត្រួតពិនិត្យ និងកោសល្យវិច្ច័យ ដោយបានឃើញថា ក្នុងបន្ទប់កើតហេតុខាងលើមានភាពរញ៉េរញ៉ៃ និងរាយប៉ាយ ចំណែកនៅលើដងខ្លួននារី វ័យក្មេងរងគ្រោះមានស្នាមជាំខ្មៅនៅលើ.ក ដែលអាចបណ្តាលមកពីបុរស ជាសង្សាប្រើដៃច្របាច់កទើបបណ្តាលឲ្យដាច់ខ្យល់ស្លាប់ និងប្រទះឃើញមានស្រោមអនាម័យ មួយចំនួនដែលប្រើប្រាស់រួច ទំនងជាក្រោយពេលដែលពួកគេ ធ្វើការរួមភេទរួចទើបសម្លាប់ចោល ដោយមិនមានអ្នកណាម្នាក់ដឹងពី មូលហេតុអ្វីឡើយ ។
សមត្ថកិច្ចបញ្ជាក់ថា ម្ចាស់ផ្ទះសំណាក់កើតហេតុខាងលើ មិនធ្វើទៅតាមច្បាប់ត្រឹមត្រូវ ដោយភ្ញៀវចូលមកស្នាក់នៅ មិនបានដកហូតអត្តសញ្ញាណប័ណ្ណ ឬលិខិតស្នាមសំគាល់ខ្លួនផ្សេងៗ ពីភ្ញៀវឡើយ ជាហេតុធ្វើឲ្យកម្លាំង មានសមត្ថកិច្ចមានការលំបាកក្នុងការស្រាវជ្រាវរកចាប់ខ្លួន ជនដៃដល់ជាឃាតករណាស់ មិនតែប៉ុណ្ណោះផ្ទះសំណាក់ខាងលើ ក៏ជាកន្លែងប្រមូលផ្តុំ របស់ក្រុមក្មេងស្ទាវគ្រប់សមាសភាពផងដែរ ។
ដោយនារីវ័យក្មេងរងគ្រោះខាងលើ មិនត្រូវបានអ្នកណាម្នាក់ បានស្គាល់អត្តសញ្ញាណ ព្រោះមិនបានប្រទះឃើញ ប័ណ្ណសំគាល់ខ្លួន ឬអត្តសញ្ញាណប័ណ្ណឡើយ សមត្ថកិច្ចក៏សម្រេចដឹកសាកសព យកទៅតម្កល់ទុកនៅវត្តស្ទឹងមានជ័យ ដើម្បីរង់ចាំក្រុមគ្រួសារ ឬសាច់ញាត្តិមកទទួលយកទៅ ធ្វើបុណ្យទៅតាមប្រពៃណី ចំណែឯបុរសជាជនដៃដល់សមត្ថកិច្ចកំពុងតែ ធ្វើការស្រាវជ្រាវដើម្បីចាប់ខ្លួន យកមកធ្វើការផ្តន្ទាទោសទៅតាមផ្លូវច្បាប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
