អគ្គិភ័យឆេះបំផ្លាញតូបលក់ដូររបស់អាជីវករខ្មែរ នៅក្នុងផ្សារឡុងគឺ គិតជាទឹកប្រាក់ជាង១០លានបាត

(បន្ទាយមានជ័យ)៖ តូបអាជីវករខ្មែរដែលលក់ដូរនៅក្នុងផ្សារឡុងគឺ ប្រទេសថៃ ជាប់ព្រំប្រទល់ជាមួយក្រុងប៉ោយប៉ែត ខេត្តបន្ទាយមានជ័យ ចំនួន៤តូប ត្រូវបានអគ្គិភ័យឆាបឆេះ ដោយមួយតូបខូចខាតទាំងស្រុង និង៣តូបទៀតខូចខាតមួយចំនួន ដែលគិតជាទឹកប្រាក់អស់ប្រមាណ១០លានបាត ដែលហេតុការណ៍នេះ បានកើតឡើងនៅវេលាម៉ោង៣៖១៥នាទី ព្រឹកទៀបភ្លឺថ្ងៃទី២៥ ខែតុលា ឆ្នាំ២០១៦នេះ។ នេះបើយោងតាមមន្រ្តីនគរបាលបឹងសាគូ នៃវរសេនាតូចការពារព្រំដែនគោកលេខ៩១១ នៃស្នងការដ្ឋាននគរបាលខេត្តបន្ទាយមានជ័យ។

មន្រ្តីនគរបាលបានបញ្ជាក់ថា «នៅម៉ោង៣៖១៥នាទីព្រឹកទៀបភ្លឺនេះ នាទីយប់មានករណីអគ្គិភ័យឆេះតូបរបស់អាជីវករខ្មែរចំនួន៤តូប​ នៅចំណុចជួរថៃផានីត ដែលមានលេខតូប k7 k8 k9 និង k10 ម្ចាស់តូបឈ្មោះ កន្ថា និងនីតាចំណែកពីរនាក់ទៀតពុំទាន់បានអត្តសញ្ញាណនៅឡើយទេ»។

មន្រ្តីនគរបាលបានបន្តទៀត ក្រោយកើតហេតុភ្លាមៗ មានការជួយអន្តរាគមន៍ពីក្រុមការងាររថយន្តពន្លត់អគ្គិភ័យ ដែលមានការចូលរួមខាងតម្រួត និងទាហានឈុតខ្មៅ និងស្ថាប័នដែលពាក់ព័ន្ធ ហើយបានរលត់ជាស្ថាពរនៅម៉ោង៣៖៤៥នាទីយប់(ថ្ងៃដដែល) ។ សរុបនៃការ ខូចខាត៤តូប គឺខូចខាតទាំងស្រុង១ តូបឆេះតិចតួចសម្ភារលក់មានភួយ ខោអាវជជុះនិងខោអាវថ្មី សរុបជាប្រាក់អស់ជាង១០លានបាត៕

ប្រភព៖ Fresh News

កំណត់ហេតុខ្មែរឡូត៖

ដោយឡែក រំលឹកព័ត៌មានចាស់លើកមុនផងដែរថា  អគ្គិភ័យឆេះផ្ទះប្រជាពលរដ្ឋជាន់ទី២ ក្បែរផ្សារទួលសង្កែ បានរលត់ហើយ ក្រោយអន្តរាគមន៍ពីអាជ្ញាធរ និងសមត្ថកិច្ចទាន់ពេល ។ គួររំលឹកផងដែរថា អគ្គិភ័យដែលបានឆាបឆេះផ្ទះប្រជាពលរដ្ឋ នៅជាន់ទី២ តាមផ្លូវលេខ៩៣ ក្បែរផ្សារទួលសង្កែ ក្នុងទឹកដីសង្កាត់ស្រះចក ខណ្ឌដូនពេញ បានរលត់ទៅហើយ កាលពីវេលាម៉ោងប្រមាណ៣៖៤០នាទីរសៀលថ្ងៃទី១៩ ខែតុលា ឆ្នាំ២០១៦ កន្លងទៅ បន្ទាប់ពីមានការជួយអន្តរាគមន៍ទាន់ពេលវេលាពីអាជ្ញាធរ និងកម្លាំងសមត្ថកិច្ចពន្លត់អគ្គិភ័យ។

សមត្ថកិច្ចមូលដ្ឋានបានឲ្យដឹងថា មូលហេតុដែលនាំឲ្យមានគ្រោះអគ្គិភ័យនេះ កើតឡើងគឺមកពីឆ្លងចរន្តភ្លើង ប៉ុន្តែមិនបានបំផ្លាញទ្រព្យសម្បត្តិធំដុំនោះទេ។ រថយន្តពន្លត់អគ្គិភ័យចំនួន៨គ្រឿង បានទៅកាន់កន្លែងកើតហេតុ ប៉ុន្តែបានបាញ់តែមួយរថយន្តប៉ុណ្ណោះ។ នៅកន្លែងកើតហេតុគេក៏សង្កេតឃើញអភិបាលខណ្ឌដូនពេញ លោក គួច ចំរើន និងអភិបាលខណ្ឌឬស្សីកែវ លោក ជា ពិសី ក៏ដឹកនាំកម្លាំងទៅជួយអន្តរាគមន៍ផងដែរ៕