រាជធានីភ្នំពេញ ៖ បុរស២នាក់ជិះម៉ូតូ ម៉ាកហុងដាឌ្រីមស៊េរី២០១៧ ត្រូវបាននគរបាលខណ្ឌចំការមនធ្វើការឡោមព័ទ្ធ និងស្ទាក់ចាប់ខ្លួន បន្ទាប់ពីពួកគេបានធ្វើសកម្មភាព ឆក់យកទូរស័ព្ទពីជនបរទេសម្នាក់ ដែលកំពុងតែជិះម៉ូតូឌុប និយាយនៅតាមផ្លូវនោះ ។
ហេតុការណ៍នេះ បានបង្កឱ្យមានការភ្ញាក់ផ្អើល កើតឡើងកាលពីវេលាម៉ោង ១និង២៥នាទីរសៀល ថ្ងៃទី២៤ ខែតុលា ឆ្នាំ២០១៧ នៅត្រង់ចំណុចផ្លូវលេខ៤៣២ កែងផ្លូវលេខ៤៣០ ក្នុងសង្កាត់ទួលទំពូងទី២ ខណ្ឌចំការមន ។
ប្រភពព័ត៌មានពី សមត្ថកិច្ចខណ្ឌចំការមន បានប្រាប់ឱ្យដឹងថា ជនសង្ស័យទាំង២នាក់ដែលបានឃាត់ខ្លួនមាន ១-ឈ្មោះ ខឿន វឌ្ឍនៈ ភេទប្រុស អាយុ១៩ឆ្នាំ មុខរបរមិនពិតប្រាកដ ស្នាក់នៅម្តុំផ្សារពោធិ៍ចិនតុង ខណ្ឌពោធិ៍សែនជ័យ និង ២-ឈ្មោះ ភី វណ្ណៈ ភេទប្រុស អាយុ២១ឆ្នាំ មុខរបរជាជាងម៉ាស៊ីនត្រជាក់ មានទីលំនៅម្តុំផ្សារប៉េសេ ផ្លូវលេខ៣៧១ ភូមិត្នោតជ្រុំ សង្កាត់បឹងទំពុន ខណ្ឌមានជ័យ ។
ប្រភពបន្តថា មុនពេលកើតហេតុជនសង្ស័យ ទាំង២នាក់បានជិះម៉ូតូម៉ាក ហុងដា សេ១២៥ ស៊េរីឆ្នាំ២០១៧ ពណ៌ខ្មៅ គ្មានស្លាកលេខ មួយគ្រឿង តាមបណ្តោយផ្លូវព្រះមុនីវង្ស ម្តុំស្តុបបូកគោ ក៏បានប្រទះឃើញបុរសជនបរទេសម្នាក់ កំពុងនិយាយទូរស័ព្ទនៅលើម៉ូតូឌុប ។
ពេលនោះពួកគេទាំង ២នាក់ក៏បានជិះទៅក្បែរ និងធ្វើសកម្មភាពឆក់យកទូរស័ព្ទដៃម៉ាក iPhone6 plus ពណ៌ស១គ្រឿងពីបុរសជនបរទេសនោះ ភ្លាមៗនោះជនបរទេសរូបនោះក៏បានស្រែក ធ្វើឲ្យមានការភ្ញាក់ផ្អើល ដល់កម្លាំងនគរបាលខណ្ឌចំការមនដែលកំពុងតែធ្វើការល្បាត ក៏បានស្រែកតាមវិទ្យុ ទាក់ទងធ្វើការដេញស្ទាក់ចាប់បាននៅ ចំណុចខាងលើទាំង២នាក់តែម្តង ។
ក្រោយពេលកើតហេតុ ជនសង្ស័យជាចោរឆក់ទូរស័ព្ទដៃ ទាំង២នាក់ រួមទាំងម៉ូតូដែលជាមធ្យោបាយ ធ្វើសកម្មភាពឆក់នោះ ត្រូវបានបញ្ជូនទៅកាន់ អធិការដ្ឋាននគរបាលខណ្ឌចំការមន ដើម្បីធ្វើការសាកសួរ និងធ្វើកំណត់ហេតុចាត់ការទៅតាមផ្លូវច្បាប់ ចំណែកឯទូរស័ព្ទដៃម៉ាក iPhone6 plus ត្រូវបានរក្សាទុកជូនបុរសជាជនបរទេសរងគ្រោះវិញ ៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា ដោយឡែកករណីមួយវិញទៀត លាឈប់ពីសន្តិសុខភ្លាម បែកគំនិតឆក់ទូរស័ព្ទ IPhone មិនបានសម្រេច ត្រូវនគរបាលខណ្ឌជ្រោយចង្វារឃាត់ខ្លួន។
ជនសង្ស័យម្នាក់ ទើបតែសុំគេលាឈប់ ពីក្រុមហ៊ុនសន្តិសុខមួយកន្លែង ហើយបានធ្វើដំណើរត្រឡប់ទៅផ្ទះវិញ ដោយថ្មើរជើង ស្រាប់តែឃើញស្ត្រីរងគ្រោះឈរម្នាក់ឯង កាន់ទូរស័ព្ទ iPhone លេង ក៏បែកគំនិតឆក់ តែមិនបានសម្រេច ហើយត្រូវសមត្ថកិច្ចប៉ុស្ដិ៍ ជ្រោយចង្វារ សហការជាមួយកម្លាំងខណ្ឌ មកអន្តរាគមន៍ឃាត់ខ្លួនបានភ្លាមៗ ហេតុការណ៍នេះកើតឡើងនៅយប់ថ្ងៃទី១៩ ខែកញ្ញា ឆ្នាំ២០១៦ កន្លងទៅ នៅត្រង់ចំណុចជួរមាត់ទន្លេ ក្បែររង្វង់មូលនាងប្រាជ្ញបារមី ស្ថិតក្នុងក្រុម៤ ភូមិ១ សង្កាត់ជ្រោយចង្វារ ខណ្ឌជ្រោយចង្វារ។
លោកវរសេនីយ៍ត្រី ឯក សេរីវុធ អធិការរងនគរបាលយុត្តិធម៌ ខណ្ឌជ្រោយចង្វារ បានឲ្យដឹងថា មុនកើតហេតុស្ត្រីរង គ្រោះបានកាន់ ទូរស័ព្ទដៃ១គ្រឿងម៉ាក iPhone-៤ ពណ៍ស ដោយដើរមកឈរលេងនៅជួរមាត់ទន្លេ ដែលជាចំណុចកើតហេតុ ខណៈនោះស្រាប់តែលិចមុខ ជនសង្ស័យបានដើរមក ឈរក្បែរហើយក៍ធ្វើសកម្មភាព ឆក់យកទូរស័ព្ទពីជនរងគ្រោះតែមិនបានសម្រេចឡើយដោយជនរងគ្រោះជាស្ត្រី បានដឹងខ្លួនមុននិងក្ដាប់ទូរស័ព្ទណែននិងដៃ។
លោកបន្តថា បន្ទាប់ពីជនសង្ស័យធ្វើ សកម្មភាពឆក់ទូរស័ព្ទមិនបានសម្រេច ហើយបម្រុងរត់គេចខ្លួន ត្រូវជនរងគ្រោះស្រែកថា ចោរៗ ផ្អើឆោឡោទាំងប្រជាពលរដ្ឋ និងសមត្ថកិច្ចមូលដ្ឋានប៉ុស្ដិ៍ជ្រោយចង្វារ ខណ្ឌជ្រោយចង្វារ មកជួយអន្តរាគមន៍ឃាត់ខ្លួនជនសង្ស័យ បានភ្លាមៗ ដើម្បីយកមកសួរនាំ។
លោក ឯក សេរីវុធ បានបញ្ជាក់ទៀតថា ក្រោយឃាត់ខ្លួនសួរ នាំជនសង្ស័យបានឆ្លើយសារភាពប្រាប់សមត្ថកិច្ចថា រូបគេពិតជាបាន ធ្វើសកម្មភាពឆក់ទូរស័ព្ទដៃពី ជនរងគ្រោះពិតប្រាកដមែន និងទើបតែសុំក្រុមហ៊ុនលាឈប់ ពីការងារសន្តិសុខថែមទៀតផង។ ជនសង្ស័យ ត្រូវឃាត់ខ្លួនឈ្មោះ ហាប់ សុគ្រី ភេទប្រុស អាយុ២៥ឆ្នាំ ស្នាក់នៅផ្ទះគ្មានលេខ តាមបណ្ដោយផ្លូវបេតុង ស្ថិតក្នុងក្រុម៦ ភូមិ១ សង្កាត់ ជ្រោយចង្វារ ខណ្ឌជ្រោយចង្វារ រីឯជនរងគ្រោះឈ្មោះ ហោរ ធានី ភេទស្រី អាយុ១៨ឆ្នាំ ស្នាក់នៅផ្ទះជួល ផ្លូវIU ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
បច្ចុប្បន្ន ជនសង្ស័យត្រូវបានបន្តឃាត់ខ្លួននៅអធិការដ្ឋាននគរបាលខណ្ឌជ្រោយចង្វារ ដើម្បីកសាងសំនុំរឿងចាត់ការតាមនិតិវិធី ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
