រាជធានីភ្នំពេញ ៖ ស្ត្រីម្នាក់បានបាត់កូនស្រីសំណព្វចិត្ត ដែលមានអាយុទើបតែ១៦ឆ្នាំប៉ុណ្ណោះ មិនដឹងថានាងកំពុង ស្ថិតនៅកន្លែងណានោះឡើយ ដោយមានក្ដីបារម្ភយ៉ាងខ្លាំងពីសុវត្ថិភាពកូនស្រីនោះ ទើបនៅវេលាម៉ោង៥និង២០នាទី ល្ងាចថ្ងៃទី២៤ ខែតុលា ឆ្នាំ២០១៦ គាត់បានកាន់ឱបរូបថត កូនស្រីបណ្ដើរយំបណ្ដើរ ធ្វើដំណើរទៅកាន់ប៉ុស្ដិ៍នគរបាលចោមចៅ ដើម្បីដាក់ពាក្យបណ្ដឹងសុំឲ្យ នគរបាលជួយអន្តរាគមន៍ ស្វែងរកកូនស្រីគាត់មក វិញផង។
នគរបាលបានឲ្យដឹងថា ស្ត្រីជាម្តាយនោះឈ្មោះ ហៀង ចាន់ណា អាយុ៣៥ឆ្នាំ មុខរបរកម្មការិនីរោងចក្រ មានប្ដីឈ្មោះ គុយ ណាត អាយុ៣៧ឆ្នាំ មុខរបររត់ម៉ូតូឌុប ពួកគាត់មានកូនប្រុសម្នាក់និងកូនស្រីម្នាក់។ ដោយឡែកកូនស្រី ដែលកំពុងបាត់ខ្លួននេះឈ្មោះ ឈួន ស្រីនីត អាយុ១៦ឆ្នាំ មុខរបរកម្មការិនីរោងចក្រកាត់ដេរ ហើយនាងគឺជាកូនច្បងផងដែរ។ សព្វថ្ងៃស្នាក់នៅផ្ទះជួល ក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅក្នុងភូមិលឹង្គ ឃុំអង្គរាជ ស្រុកព្រះស្តេច ខេត្តព្រៃវែង ។
ស្ត្រីជាម្តាយ បាននិយាយថា កូនស្រីរបស់គាត់បានចាកចេញពីផ្ទះ កាលពីវេលាល្ងាចថ្ងៃទី២៣ ខែតុលា ហើយបានប្រាប់គាត់ថា ទៅចូលរួមកម្មវិធីជប់លៀងផ្ទះមិត្តភក្ដិ ប៉ុន្តែនាងមិនបានប្រាប់ថា ផ្ទះមិត្តភក្ដិនោះនៅ ភូមិណាកន្លែងណានោះឡើយ ចំណែករូបគាត់ក៏មិនបានសួរនាំនាង ពីផ្ទះមិត្តភក្ដិនៅទីណាដែរ។ ព្រោះកន្លង មកកូនស្រីគាត់មិនដែលដើរលេងទៅណាឆ្ងាយ ហើយមិនដែលដើរបាត់ពីផ្ទះ ដូចជាពេលនេះទេ លុះដល់វេលាយប់មិនឃើញ ត្រឡប់ទៅផ្ទះវិញសោះ ហើយគាត់ និងប្ដីបានតាមរកគ្រប់ទីកន្លែងទាំងយប់ ប៉ុន្តែមិនបានឃើញឡើយ។
លុះព្រឹកឡើងថ្ងៃទី២៤ ខែតុលា បានតាមរកទៀត ហើយក៏នៅតែមិនបានឃើញដដែល ទើបដល់វេលាល្ងាចថ្ងៃដដែល សម្រេចចិត្តទៅប្ដឹងនគរបាឲ្យ ជួយស្វែងរកតែម្ដង។ បន្ទាប់ពីទទួលបានពាក្យបណ្ដឹង ពីការបាត់កូនស្រីនោះ នគរបាលបានប្រកាសឲ្យតាមបណ្ដាគោលដៅនានា ជួយពិនិត្យមើលពីក្មេងស្រី ដែលមានភិនភាគដូចខាងលើនោះហើយ ប៉ុន្តែមិនទាន់មានគោលដៅណាមួយ បានប្រទះឃើញនៅឡើយ ហើយមិនដឹងថានាងទៅដើរលេង ជាមួយមិត្តភក្ដិលង់ខ្លួន មិនហ៊ានត្រឡប់ទៅផ្ទះ វិញខ្លាចឪពុកម្ដាយស្ដីបន្ទោស ឬក៏មានគ្រោះថ្នាក់អ្វីដោយ ប្រការណាមួយនោះទេ៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា ដោយឡែកករណីមួយវិញទៀត គួរឲ្យអាណិត! ក្មេងប្រុស២នាក់ នាំគ្នាដើរថ្មើរជើងស្វែងរកឪពុក រង្វេងផ្លូវពីកំពង់ស្ពឺដល់ភ្នំពេញ។
នៅថ្ងៃទី២៣ ខែសីហា ឆ្នាំ២០១៦ កន្លងទៅ មានក្មេងប្រុស២នាក់ ដែលជាកូនអ្នកកសិករ រស់នៅក្នុងភូមិតាឡាក់ ឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ ឯម្នាក់ទៀតគឺជាមិត្តភក្ដិ បានជូនគ្នា ដើម្បីតាមរកឪពុក ដោយពួកគេបាននាំគ្នា ធ្វើដំណើរដោយថ្មើរជើង តាំងពីផ្ទះមក ដល់រាជធានីភ្នំពេញ ក្នុងចម្ងាយផ្លូវរាប់សិបគីឡូម៉ែត្រ ត្រូវបានប្រជាពលរដ្ឋ បាននាំគ្នាឃាត់ឲ្យឈប់ ដើម្បីឲ្យនគរបាល ព្រោះខ្លាចមានគ្រោះថ្នាក់។
នគរបាលបានប្រាប់ឲ្យដឹងថា ក្មេងប្រុសទាំងពីរនាក់នោះម្នាក់ឈ្មោះ ហៀង ចិត្រ្តា អាយុ១១ឆ្នាំ មានឪពុកឈ្មោះ សាល មុខរបរស៊ីឈ្នួលឃ្វាលក្របីឲ្យគេ និង ម្ដាយឈ្មោះ ហេង មុខរបរកសិករ មានទីលំក្នុងនៅភូមិ តាឡាក់ ឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ និងមិត្តភក្ដិម្នាក់ទៀតឈ្មោះ ជឿន សុខគីម អាយុ១០ឆ្នាំ ឪពុកឈ្មោះ ស្នា និងម្ដាយឈ្មោះ ផល ដែលជាកសិករ មានទីលំនៅក្នុងភូមិជាមួយគ្នានោះដែរ។ ពួកគេបានធ្វើ ដំណើរចេញពីផ្ទះ ដោយមិនមានអ្វីជិះនោះទេ គឺដើរដោយជើងរហូត ដោយនឹកស្មានថា បានជួបឪពុក មិននឹកស្មានថា ត្រូវវង្វេងបែបនេះឡើយ ។
នគរបាលបានបន្តថា ពួកគេទាំង២នេះបានវង្វេងផ្លូវ រកឪពុកមិនឃើញឡើយ ពួកគេបាននាំគ្នាដើរត្រសែតអណ្ដែត គ្មានគោលដៅនិងគ្មានបាយគ្មានទឹកហូបឡើយ គឺដើរតាំងពីព្រឹករហូតដល់ យប់ជ្រៅក៏នៅតែរកឪពុកមិនឃើញទៀត ប៉ុន្តែសំណាងល្អបានជួប ប្រជាពលរដ្ឋ ឃើញគួរឲ្យអាណិត ក៏បានឃាត់ឲ្យឈប់ នាំទៅប្រគល់ឲ្យមេភូមិ និងត្រូវបានលោកមេភូមិផ្ដល់បាយទឹក និងទីកន្លែងដេកបានមួយយប់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]