ខេត្តសៀមរាប ៖ ហាងលក់សម្លៀកបំពាក់៤កន្លែងនៅក្រុងសៀមរាបត្រូវបានកម្លាំងសមត្ថកិច្ចចម្រុះចុះធ្វើឆែកឆេរ និងបង្ក្រាបកាលពីព្រឹកថ្ងៃទី២២ ខែតុលា ឆ្នាំ២០១៦ ។
សមត្ថកិច្ចបានឲ្យដឹងថា បន្ទាប់ពីទទួលពាក្យបណ្តឹងរបស់ក្រុមហ៊ុន មេធាវី អេចប៊ីអេស តំណាងឲ្យស្លាកសញ្ញា The North Face ដែលមានទីតាំងក្រុមហ៊ុននៅរាជធានីភ្នំពេញដែលនាំចូលផ្តាច់មុខនូវសំលៀកបំពាក់ និងរបស់មួយចំនួនទៀតម៉ាក (The North Face) ថា មានហាងលក់សម្លៀកបំពាក់មួយចំនួននៅក្នុងក្រុង-ខេត្តសៀមរាបបានលួចលក់ខុសច្បាប់រំលោភកម្មសិទ្ធិបញ្ញានូវផលិតផលរបស់ក្រុមហ៊ុនម៉ាក(The North Face) រួចមក កម្លាំងការិយាល័យនគរបាលប្រឆាំងបទល្មើសសេដ្ឋកិច្ចដែលមានលោកវរសេនីយ៍ត្រី ភោក សារិទ្ធ នាយរងការិយាល័យ តំណាងឱ្យលោកវរសេនីយឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តសៀមរាប និងមានការចូលរួមពីសំណាក់មន្ត្រីប៉ុស្តិ៍នគរបាលរដ្ឋបាលស្វាយដង្គំ ក្រោមការដឹកនាំដោយលោក ជួន សុបញ្ញា ព្រះរាជអាជ្ញារងអមសាលាដំបូងខេត្តសៀមរាប បានចុះធ្វើការឆែកឆេរ និងបង្ក្រាបកន្លែងលក់សម្លៀកបំពាក់ចំនួន៤កន្លែង រួមមាន ទី១-ឈ្មោះ Duty Free ២-ឈ្មោះ Cardomon Clothing Company ៣-ឈ្មោះ Brands Outlet ៤-Cambodia Outlet ហាងទាំងបួនខាងលើមានអ្នកគ្រប់គ្រងតែម្នាក់ ក្នុងនោះសមត្ថកិច្ចបានរកឃើញ ហើយរឹបអូសនូវសម្លៀកបំពាក់និងរបស់មួយចំនួនរួមមាន -កាបូបធំស្ពាយពីក្រោយចំនួន១៨៦កាបូប -កាបូបតូចស្ពាយពីក្រោយចំនួន១៧កាបូប -អាវរងារក្រាសចំនួន២៥៥ -អាវរងារស្ដើងចំនួន១៦៦ -អាវរងារប្រភេទរោមសត្វចំនួន២១ -អាវយឺត៣៤៤ -ស្រោមដៃចំនួន៣គូ -ស្រោមជើងចំនួន៤គូ -ស្បែកជើងឃ្លប់ចំនួន១២គូ ហើយបានបញ្ជូនរបស់ទាំងនោះទៅកាន់ស្នងការដ្ឋាននគរបាលខេត្តសៀមរាប និងនាំខ្លូនអ្នកគ្រប់គ្រងហាងយកទៅសួរនាំ និងដោះស្រាយទៅតាមផ្លូវច្បាប់ ។
យោងទៅតាមតំណាងក្រុមហ៊ុន មេធាវី អេចប៊ីអេស បានបញ្ជាក់ឱ្យដឹងទៀតថា ក្រុមហ៊ុន The North Face បាននាំចូលផ្តាច់មុខចូលក្នុងប្រទេសកម្ពុជានូវផលិតផលដែលបានឆែកឆេររកឃើងដូចការរៀបរាប់ខាងលើពីសហរដ្ឋអាមេរិក ហើយបានចុះបញ្ជីការពាណិជ្ជកម្ម និងបង់ពន្ធនាំចូលត្រឹមត្រូវស្របច្បាប់ ។ ក្នុងមួយរយៈនេះ គឺក្រុមហ៊ុនពិនិត្យឃើញមានជនខិលខូចមួយចំនួនបានលួចលាក់នាំចូលខុសច្បាប់នូវផលិតផលនេះពីប្រទេសវៀតណាមតាមច្រកអន្តរជាតិបាវិតហើយយកមកចែកចាយឲ្យអាជីវករមួយចំនួននៅតាមទីផ្សារក្នុងប្រទេសកម្ពុជាក្នុងតម្លៃថោក ជាហេតុធ្វើឲ្យក្រុមហ៊ុនខាតបង់ថវិកាមួយចំនួនធំ ក៏ដូចជាការខាតបង់នូវចំណូលចូលរដ្ឋផងដែរ ។
លោក ជូន សុបញ្ញា ព្រះរាជអាជ្ញារងអមសាលាដំបូងខេត្តសៀមរាបបានបញ្ជាក់ឱ្យដឹងថា បន្ទាប់ពីរកឃើញហាងដែលដាក់លក់របស់របរខាងលើដាក់តាំងលក់ផលិតផលរំលោភកម្មសិទ្ធិបញ្ញា នៅពេលនេះសមត្ថកិច្ចកំពុងតែឱ្យម្ចាស់ហាងធ្វើកិច្ចសន្យា និងផាកពិន័យតាមផ្លូវច្បាប់ និងជាការព្រមាន ហើយឱ្យម្ចាស់រូបនោះត្រូវបញ្ឈប់ការដាក់តាំងលក់ផលិតផលខុសច្បាប់រំលោភលើកម្មសិទ្ធិបញ្ញាតទៅទៀត ប្រសិនថ្ងៃក្រោយនៅតែប្រព្រឹត្តមិនរាងចាលសមត្តកិច្ចនឹងអនុវត្តទៅតាមនិតិវិធីច្បាប់ និងកសាងសំណុំរឿងបញ្ជូនខ្លួនទៅសាលាដំបូងខេត្ត ដើម្បីចាត់ការតាមផ្លូវច្បាប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]