រាជធានីភ្នំពេញ ៖ ប្តីប្រពន្ធ២នាក់ ខណៈចុះចូលទិញនំប៉័ង ទុកកូន២នាក់នៅក្នុងរថយន្តដោយមិនបាន ចាក់គន្លឹះទ្វាររថយន្ត ស្រាប់តែជនសង្ស័យ ២នាក់ជិះម៉ូតូមកដល់បើកទ្វារយក កាបូបលុយទៅបាត់ ពេលនោះកូនឃើញដែរ តែមិនហ៊ានស្រែករហូតទាល់តែជនសង្ស័យ ជិះម៉ូតូទៅបាត់ទើបហ៊ានស្រែក បង្កឲ្យមានការភ្ញាក់ផ្អើលកាលពីវេលាម៉ោង ១រសៀល ថ្ងៃទី២១ ខែតុលា ឆ្នាំ២០១៦នៅមុខហាងលក់នំប៉័ងភ្នំពេញ ដែលមានទីតាំងនៅតាមបណ្ដោយផ្លូវ ជាតិលេខ៤ ក្នុងភូមិ ព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះខាងលើ ប្ដីឈ្មោះ ហោ លាងស្រៀង អាយុជាង៤០ឆ្នាំ ប្រពន្ធឈ្មោះប៉ា ចន្ធី អាយុ៣២ឆ្នាំ មានទីលំនៅភូមិប្រទាល ឃុំអណ្ដូងទឹក ស្រុកបទុមសាគរ ខេត្តកោះកុង ។
ពួកគាត់ជិះរថយន្តម៉ាកហ្វត ពណ៌ខ្មៅ ពាក់ស្លាកលេខ ភ្នំពេញ 2N-9815 ហើយនៅក្នុងកាបូបរបស់គាត់នោះ មានលុយចំនួនជាង២លានរៀល និង៨៥០ដុល្លារ ព្រមទាំងគ្រឿងអលង្ការមាស និងប្លាទីនមួយចំនួនទៀត ដែលគេយកទៅដាក់បញ្ចាំនៅនឹងពួកគាត់ ដែលសរុបការបាត់បង់នោះទាំងអស់ មានចំនួនជាង៣ពាន់ដុល្លារ ។ ចំណែកក្រុមជនសង្ស័យដែល ជាចោរមានគ្នា២នាក់ ជិះម៉ូតូម៉ាកហុងដាឌ្រីម សេ១២៥ មួយគ្រឿងមិនចាំស៊េរីនិងស្លាកលេខឡើង ។
ប្រភពព័ត៌មាន បានឲ្យដឹងថា មុនពេលកើតហេតុ ជនរងគ្រោះ២នាក់ប្តីប្រពន្ធបានជិះរថយន្តត្រឡប់មកពី ទិញអីវាន់យកទៅលក់ដូរនៅផ្ទះ ដោយមានកូន២នាក់ទៀតទៅជាមួយដែរ លុះពេលទៅដល់ចំណុច កើតហេតុបានឈប់រថយន្ត ហើយបុរសជាប្ដីបានចុះទៅទិញនំបុ័ង និងបានបបួលឲ្យប្រពន្ធចុះដែរ ប៉ុន្តែប្រពន្ធគាត់ថា មិនចុះទេ ទើបមិនបានដាក់គន្លឹះទ្វាររថយន្ត ។
តែក្រោយពេលប្ដីចុះចេញ ពីរថយន្តបានបន្តិច ស្រាប់តែប្រពន្ធបានចុះ ទៅតាមក្រោយដែរ ដោយបានទុកឲ្យកូន ២នាក់នៅក្នុងរថយន្តនោះ និងមិនបានដាក់គន្លឹះទ្វាររថយន្តដដែល ខណៈនោះស្រាប់តែ ជនសង្ស័យ២នាក់បានជិះម៉ូតូ ១គ្រឿងទៅដល់បានបើកទ្វាររថយន្តយកកាបូបលុយ ដែលខណៈនោះកូនរបស់ពួកគាត់ មិនហ៊ានស្រែកឡើយ រហូតជនសង្ស័យជិះគេចខ្លួនបាត់ ទើបកូនស្រែកបង្កឲ្យ មានការភ្ញាក់ផ្អើលតែម្តង ។
ក្រោយពេលកើតហេតុ បុរសនិងស្ត្រីទាំងពីរនាក់ប្ដីប្រពន្ធនោះ បាននាំគ្នាជិះរថយន្តទៅកាន់សាលាសង្កាត់ចោមចៅ និងបានរត់ត្រហេបត្រហប ទៅរកមន្ត្រីនគរបាលឲ្យជួយអន្តរាគមន៍ប្រកាស តាមវិទ្យុទាក់ទងឲ្យបណ្ដា គោលដៅនានាជួយពួនស្ទាក់ រកមុខសញ្ញាក្រុមចោរខាងលើ ប៉ុន្តែមិនដឹងថា ជនទាំងនោះគេចខ្លួនបាត់ដល់ណាហើយទេ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]