រាជធានីភ្នំពេញ ៖ ប្អូនប្រុសពិធីការិនីទូរទស្សន៍កញ្ញាជីជី បានជួបគ្រោះថ្នាក់ចរាចរណ៍ ខណៈបើករថយន្តយ៉ាងលឿនបត់ ចូលផ្ទះត្រូវរថយន្តកូរ៉េដឹកទំនិញបើកលឿនដូចគ្នាចាប់ហ្វ្រាំងមិនទាន់ជ្រុល ទៅបុកពេញទំហឹងចំទ្វារមុខចំហៀង ខាងស្តាំបណ្តាលឲ្យខូចខាតទាំង២គ្រឿង ដែលហេតុការណ៍នេះកើតឡើង កាលពីវេលាម៉ោង១ និង៤០នាទីរំលងអាធ្រាត្រ ឈានចូលថ្ងៃទី២១ ខែតុលា ឆ្នាំ២០១៦ នៅតាមបណ្តោយផ្លូវភ្នំពេញ-ហាណូយ មុខច្រកចូលបុរីពិភពថ្មីផ្សារដីហុយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុរថយន្តរបស់ប្អូនពិធីការិនី កញ្ញា ជីជី ម៉ាកកាមរី ហាយប្រ៊ីត ពណ៌ទឹកមាស ពាក់ស្លាកលេខ ភ្នំពេញ 2X-3335 បើកបរតាមបណ្តោយផ្លូវហាណូយ ទិសដៅពីត្បូងទៅជើងយ៉ាងលឿន ខណៈមកដល់ចំណុចកើតហេតុ រថយន្តមិនបានបន្ថយល្បឿន និងអត់ស៊ីញ៉ូទេ ស្រាប់តែបត់ឆ្លងចូលផ្ទះក្នុងបុរីពិភពថ្មីតែម្តង ស្របពេលនោះរថយន្តកូរ៉េដឹកទំនិញ ពណ៌ខៀវ បើកបរដោយបុរសចំណាស់ ម្នាក់តាមផ្លូវហាណូយ ទិសដៅពីជើងទៅត្បូងក្នុងល្បឿនលឿនដូចគ្នាវ៉ាក់អើ ចាប់ហ្វ្រាំងអូសជាច្រើនម៉ែត្រជ្រុល ទៅបុកផ្ទប់រថយន្តហាយប្រ៊ីតកំពិតទ្វារមុខ និងវៀចម៉ែត្រចង្កូតកង់ផ្នែកខាងស្តាំធ្ងន់ធ្ងរ រីរថយន្តកូរ៉េផុងកាងដែកខាងមុខ ប៉ុន្តែសំណាងល្អអ្នកបើកបរទាំង ២នាក់មិនមាននរណាម្នាក់ រងរបួសនោះទេ ។
ក្រោយពេលកើតហេតុ គេឃើញមានវត្តមានកញ្ញា ជីជី ជាបងស្រី និងបងប្អូនចេញមុខមកដោះស្រាយសុំឲ្យខាងរថយន្ត កូរ៉េចេញថ្លៃជួសជុលទាំងស្រុង ពោលគឺយករថយន្តទៅជួសជុលឲ្យដូចដើម តែត្រូវខាងរថយន្តកូរ៉េបដិសេធ ព្រោះគាត់ជាអ្នកបើកបរ ជាកម្មករគេដែរ គាត់មានលទ្ធភាពឯណាសង ហើយគាត់ក៏បានទាក់ទងទៅក្រុមហ៊ុនហើយ តែតំណាងក្រុមហ៊ុននៅខេត្តឆ្ងាយពិបាក ក្នុងការធ្វើដំណើរមកទាំងយប់ តែខាងកញ្ញា ជីជីមិនព្រមសុំឲ្យចេញមកដោះ ស្រាយសងទាំងយប់ ។
នៅទីបំផុត ដោយការជជែកវែកញែកគ្នាបែកផ្សែងហើយនៅតែមិនអាចដោះស្រាយបាន ចុងក្រោយក៏សម្រេចឲ្យ សមត្ថកិច្ចជំនាញវាស់វែង យករថយន្តទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីធ្វើការដោះស្រាយគ្នានៅពេលព្រឹកបន្តទៀត ៕
ប្រភព៖ កោះសន្ដិភាព
កំណត់ត្រាខ្មែរឡូត៖
គួររំលឹកថា កាលពីម៉ោង ១៖១០នាទីរំលងអាធ្រាត្រ ឈានចូលថ្ងៃទី២១ ខែតុលា ឆ្នាំ២០១៦នេះដូចគ្នា ស្ថិតនៅតាមផ្លូវលេខ៥៩៨ ក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ក៏មានករណីយុវជន២នាក់ ត្រូវជនល្មើសមួយក្រុមជិះម៉ូតូដេញ តាមប្លន់ពីក្រោយ ស្រាប់តែភ័យពេកបានដួលម៉ូតូ ក៏ត្រូវជនល្មើសជិះយកទៅបាត់។
ជនរងគ្រោះម្នាក់ឈ្មោះ យូហាន ស្នាក់នៅខណ្ឌព្រែកព្នៅ បានប្រាប់ថា មុនកើតហេតុ គឺរូបគេ និងមិត្តភក្តិម្នាក់ទៀត មកពីផឹកស៉ី ដោយជិះម៉ូតូមួយគ្រឿងម៉ាក MSX ពណ៌ខ្មៅ មិនចាំស្លាកលេខ ដែលត្រូវក្រុមចោរដេញប្លន់ យកទៅបាត់នោះ មកពីម្តុំទួលសង្កែ។
ជនរងគ្រោះបានបន្តទៀតថា ស្រាប់តែខ្លួន និងមិត្តភក្តិកំពុងតែជិះលើផ្លូវលេខ៥៩៨ ក្នុងគោលបំណងទៅផ្ទះ នៅឯព្រែកព្នៅនោះ ក៏មានជនល្មើសមួយក្រុមជិះម៉ូតូ ពីរគ្រឿងម៉ាក Dream125 តាមពីក្រោយឃើញដូចនោះ ជនរងគ្រោះទាំងពីរភ័យពេក ខំប្រឹងជិះម៉ូតូរត់តែជិះមកជិត ដល់ស្ថានីយ៍ទូរទស្សន៍ប៉ុស្តិ៍លេខ៣ បានដួលម៉ូតូក៏ធ្វើឲ្យក្រុមចោរដេញប្លន់ ទាំងនោះបានមកទាន់ ហើយក៏ដេញវាយជនរងគ្រោះទាំងពីរ រត់ចែកជើងគ្នាធ្វើឲ្យក្រុមប្លន់លើកយកម៉ូតូជនរងគ្រោះជិះចេញ ទៅបាត់ដោយសុវត្ថិភាព។
ក្រោយកើតហេតុជនរងគ្រោះទាំងពីរ បានត្រឹមតែទៅដាក់ពាក្យបណ្តឹង នៅប៉ុស្តិ៍ទួលសង្កែ ទាំងសោកស្តាយម៉ូតូ ដែលក្រុមចោរប្លន់យកទៅ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]