សាន ស្រីឡៃ មានរឿងអ្វី ទើបស្រក់ទឹកភ្នែកបែបនេះ?

ភ្នំពេញ៖ បេក្ខនារីវគ្គផ្តាច់ព្រ័ត្រ ក្នុងកម្មវិធី The Voice Cambodia រដូវកាលទី២ អ្នកនាង សាន ស្រីឡៃ កំពុងតែទទួលបានភាពល្បីល្បាញ នៅក្នុងវិថីសិល្បៈ ក្រោយពីផ្ទុះនូវបទចម្រៀងមួយបទរបស់នាង មានចំណងជើងថា "នឹកគេស្ទើរស្លាប់ខ្លួនហើយ"។

បើក្រឡេកមើលទំព័រហ្វេសប៊ុករបស់ តារាស្រីរូបនេះ បានឃើញនាង ទើបតែបង្ហោះរូបថតមួយសន្លឹក ជាមួយទឹកមុខស្រងូតស្រងាត់ ថែមទាំងសម្រក់ទឹកភ្នែកទៀត ដោយមិនដឹងថា តើរូបនាងកំពុងតែជួបបញ្ហាអ្វី។ ក្នុងនោះ អ្នកនាង សាន ស្រីឡៃ ក៏បានពោលពាក្យកំសត់ ដែលសរសេរថា "ចង់បានអ្វីពីខ្ញុំ ខ្ញុំគ្មានស្អីឲ្យទៀតទេអស់ហើយ"។ 

សារមួយនេះ បានធ្វើឲ្យមហាជនរឹតតែឆ្ងល់ក្នុងចិត្តថា តើ អ្នកនាង សាន ស្រីឡៃ មានរឿងអ្វី ដូចមានអ្នកណាមកគំរាម រឺទាមទារអ្វីពីនាង ទើបធ្វើឲ្យនាងពោលពាក្យ ជាមួយនឹងរូបថតឃើញទឹកភ្នែកបែបនេះ។

យ៉ាងណាមិញ អ្នកគាំទ្រនៅតែផ្តល់កម្លាំងចិត្តឲ្យនាង ទោះបីនាងស្ថិតក្នុងស្ថានភាពបែបណាក៏ដោយ ហើយក៏ផ្តាំឲ្យនាងតស៊ូ និងជំនះរាល់បញ្ហាអស់ទាំងនោះផងដែរ៕ 

កំណត់ហេតុខ្មែរឡូត៖

ដោយឡែក រំលឹកព័ត៌មានចាស់លើកមុនផងដែរថា  អ្នកនាង សាន ស្រីឡៃ បានបង្ហាញមុខស្វាមីរបស់នាង។

មហាជនមានការភ្ញាក់ផ្អើលយ៉ាងខ្លាំង ពេលបានលឺដំណឹងថា បេក្ខនារី The Voice Cambodia រដូវកាលទី២ វគ្គផ្តាច់ព្រ័ត្រ សាន ស្រីឡៃ មានស្វាមី ក្រោយពីធ្វើកិច្ចសម្ភាស ជាមួយនឹង លោក មាសរិទ្ធី ក្នុងស្ថានីយទូរទស្សន៍ហង្សមាស។

ចំពោះព័ត៌មានដែល បេក្ខនារីរូបស្អាតនេះ មានស្វាមីរួចហើយ ក៏ក្លាយជាចំនុចរំសើបមួយ ដែលធ្វើឲ្យអ្នកគាំទ្រ រឹតតែចង់ដឹងថា តើរូបនាង ហ៊ានបង្ហាញមុខស្វាមីជាសារធាណៈដែរទេ ក្រោយពីគ្រប់គ្នាបានដឹងលឺ នូវរឿងរ៉ាវអស់ទាំងនេះហើយនោះ។

ក្នុងនោះដែរ បេក្ខនារីវគ្គផ្តាច់ព្រ័ត្រ សាន ស្រីឡៃ ក៏មិនខ្លាចក្នុងការទម្លាយនូវមុខមាត់ពិត របស់ស្វាមីរបស់នាងនោះដែរ ហើយថែមសរសេររៀបរាប់ក្នុងទំព័រហ្វេសប៊ុកដែរថា "ក្នុងមួយជីវិតរបស់ស្រី តើមានមនុស្សប្រុសប៉ុន្មាននាក់ដែលតាមស្រលាញ់យើង? ក្នុងមួយជីវិតរបស់មនុស្សស្រី មានមនុស្សប្រុសប៉ុន្មាននាក់ ដែលសុំអ្នកធ្វើសង្សារ?ហើយមានមនុស្សប្រុសប៉ុន្មាននាក់ដែលចូលស្តីដណ្តឹងអ្នក ពីម្តាយរបស់អ្នក?សម្រាប់ខ្ញុំ មនុស្សប្រុសដែលសុំ ខ្ញុំធ្វើសង្សារដាច់ខាតខ្ញុំមិនអាចស្រលាញ់ឡើយ ព្រោះសង្សារទោះស្រលាញ់គ្នាយ៉ាងងណា ក៏បានត្រឹមជាតែសង្សារ ពេលគេអស់ចិត្ត នោះយើងក៏អស់តម្លៃ។ទោះមនុស្សប្រុសម្នាក់នេះមិនស្អាត មិនក្មេង មិនមាន តែគាត់ហ៊ានចូលដល់ម្តាយរបស់ខ្ញុំ។ទោះបីខ្ញុំមិនស្រលាញ់គាត់ មិនដែលស្គាល់គាត់ តែបើម្តាយព្រមលើកខ្ញុំឲ្យទៅគាត់ ខ្ញុំក៏យល់ព្រម ព្រោះខ្ញុំជឿជាក់ថាម្តាយរបស់ខ្ញុំមើលមនុស្សមិនខុស ហើយក៏គ្មានម្តាយណាដែលចង់ឲ្យកូនពិបាកទេ ។ការរៀបការតាមការទុកដាក់របស់ម្តាយ ជាការសងគុណដ៏ធំធេងបំផុតរបស់កូនស្រី។ ពីមនុស្សមិនដែលស្រលាញ់គ្នា មិនដែលស្គាល់គ្នា ទីបំផុតយើងក៏ស្រលាញ់គ្នា យល់ចិត្តគ្នា ទោះបីគាត់មិនមែនជាអ្នកមានទ្រព្យស្តុកស្តម្ភ តែគ្រប់ពេលដែលខ្ញុំនៅក្បែរគាត់ ខ្ញុំប្រៀបបាននឹងម្ចាស់ក្សត្រីយ៏ម្នាក់ដ៏សែនមានក្តីសុខ។ មានគ្រួសារមានអ្វីត្រូវខ្មាស់ ខ្លាចគេ គ្រាន់តែបង្ហាញពិភពលោកឲ្យបានដឹង ថាពួកយើងស្រលាញ់គ្នា បើគ្រាន់តែក្លាយជាអ្នកសិល្បះម្នាក់ ត្រូវបោះបង់មនុស្ស ដែលស្រលាញ់យើងចោល បោះបង់មនុស្សប្រុសល្អម្នាក់ មិនចាំបាច់ឡើយ ។ មួយជីវិតរបស់មនុស្សស្រីអ្វីដែលចង់បាន គឺប្តីល្អម្នាក់ នេះហើយជាអ្វីដែលមនុស្សស្រីគ្រប់រូបជៀសមិនផុត។ អរគុណអ្នកម្តាយជាទីស្រលាញ់ ដែលបានមើលមនុស្សមិនខុស។ សូមអោយក្តីស្រលាញ់មួយនេះ ស្ថិតស្ថេរយូរអង្វែង មិនថាមានអ្វីកើតឡើង ក៏ពួកយើងនៅតែជាគ្រួសារល្អ"។

ជាពិសេស ក៏មានអ្នកលេងបណ្តាញសង្គមភាគច្រើន បានកោតសរសើរពីសេចក្តីក្លាហានរបស់ សាន ស្រីឡៃ ដែលនាងហ៊ានបង្ហាញមុខស្វាមីជាសារធាណៈ ដោយមិនខ្លាច ការធ្លាក់កូដ រឺលែងល្បីតទៅទៀត។ ហើយក៏មានអ្នកគាំទ្រ នៅតែអះអាងថា ទោះបីរូបនាងមានគ្រួសារក៏ដោយក្តី ក៏ពួកគេនៅតែស្រឡាញ់ គាំទ្រនូវសមត្ថភាពរបស់នាងដដែល៕

• សាន ស្រីឡៃ
• យុវវ័យ