ភ្នំពេញ៖ កាលពីវេលាយប់មិញ នៅក្នុងទំព័រហ្វេសបុក របស់ សហព័ន្ធកីឡាកបាល់ទាត់ជាតិកម្ពុជា បានចេញសេចក្តីប្រកាសជូនដំណឹងមួយស្តីអំពី ការគោរពព្រះករុណាព្រះបាទសម្តេចព្រះនរោត្តមសីហនុ មុននឹងការប្រកួតរវាង កម្ពុជា និងឡាវ ចាប់ផ្តើម។
យោងតាមសេចក្តីជូនដំណឹងនេះ សហព័ន្ធបានថ្លែងឲ្យដឹងថា «នៅថ្ងៃទី ១៥ ខែតុលា ឆ្នាំ២០១៦ ខាងមុននេះសហព័ន្ធកីឡាបាល់ទាត់កម្ពុជានឹងធ្វើការគោរពវិញ្ញាណក្ខន្ធសម្រាប់ខួប៤ឆ្នាំនៃការយាងចូលព្រះទិវង្គតរបស់ព្រះករុណាព្រះបាទសម្តេចព្រះនរោត្តមសីហនុ ព្រះមហាវិរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ មុនការចាប់ផ្ដើម» ។
គួរបញ្ជាក់ផងដែរថា បន្ទាប់ពីបានចេញផ្សាយសេចក្តីជូនដំណឹងនេះរួចមក ក៏មានអ្នកគាំទ្រភាគច្រើន បានសម្តែងនូវការពេញចិត្ត និងអរគុណដល់សហព័ន្ធផងដែរ ពីព្រោះនេះក៏ជាការសំណូមពររបស់បងប្អូនអ្នកគាំទ្រជាច្រើននាក់ផងដែរ។ មួយវិញទៀត ក៏មានមតិអ្នកគាំទ្រខ្លះបានសំណូមពរឲ្យដាក់ព្រះឆាយាល័ក្ខព្រះអង្គ ក្នុងអំឡុងពេលគោរពវិញ្ញាក្ខ័ន្ធ នៅផ្ទាំង LED ថែមទៀតផង។
គួរបញ្ជាក់បន្ថែមទៀតថា នៅថ្ងៃទី១៥ ខែតុលា ក្នុងការប្រកួតរវាងកម្ពុជា និងឡាវ នៃវគ្គជម្រុះពានរង្វាន់ AFC Suzuki Cup ខាងមុខនេះ ក៏ជាថ្ងៃដែល ព្រះបាទសម្តេចនរោត្តមសីហនុ យាងចូលព្រះទីវង្គត កាលពី៤ឆ្នាំមុនផងដែរ ។ ដូច្នេះហើយដោយមានការសំណូមពរពីអ្នកគាំទ្រជាច្រើន ទើបសហព័ន្ធបានរៀបចំឲ្យមានការគោរពវិញ្ញានក្ខ័ន្ធ ដើម្បីរំលឹកដល់វិញ្ញានក្ខ័ន្ធ ព្រះអង្គ មុននឹងការប្រកួតចាប់ផ្តើម៕
ការប្រកួតនឹងប្រព្រឹត្តទៅនៅថ្ងៃសៅរ៍ខាងមុខនេះ នៅវេលាម៉ោង ៦:៣០នាទីល្ងាច ក្នុងពហុកីឡដ្ឋានជាតិអូឡាំពិក ដូច្នេះសូមបងប្អូនដែលស្នេហាកីឡាបាល់ទាត់ ចូលរួមគាំទ្រ និងផ្តល់កម្លាំងចិត្តដល់ក្រុមជម្រើសជាតិយើងទាំងអស់គ្នា៕
ប្រភព៖ សហព័ន្ធកីឡាបាល់ទាត់កម្ពុជា
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា FFC ដាក់លក់សំបុត្រទស្សនាវគ្គជម្រុះ AFF Suzuki Cup ជាផ្លូវការ ។ គួររំលឹកផងដែរថា សំបុត្រទស្សនាការប្រកួតជម្រុះពានរង្វាន់អាស៊ាន AFF Suzuki Cup 2016 ត្រូវបានសហព័ន្ធកីឡាបាល់ទាត់កម្ពុជា (FFC) ដាក់លក់ជាផ្លូវការហើយនៅថ្ងៃទី១០ ខែតុលានេះ ខណៈការប្រកួតនឹងធ្វើឡើងនៅថ្ងៃទី១៥,១៨,២១ ខែតុលាខាងមុខនេះ នៅលើទីលានពហុកីឡដ្ឋានជាតិ និងកីឡដ្ឋាន RSN របស់ក្លឹបភ្នំពេញក្រោន។
តម្លៃសំបុត្រចូលទស្សនាការប្រកួតម្ដងៗ ក្នុងរយៈពេល ៣ថ្ងៃខាងលើនេះ គឺរក្សាត្រឹម ១ម៉ឺនរៀល និង ៥ពាន់រៀលដដែល។ ចំពោះកម្មវិធីប្រកួតរបស់ក្រុមគោព្រៃកម្ពុជា មានដូចជាថ្ងៃទី១៥ ខែតុលា ប៉ះឡាវ, ថ្ងៃទី១៨ ខែតុលា ប៉ះប្រ៊ុយណេ និងថ្ងៃទី២១ ខែតុលា ប៉ះទីម័រខាងកើត ហើយ ៣ប្រកួតនេះ នឹងធ្វើឡើងនៅវេលាម៉ោង ៦៖៣០នាទីល្ងាច លើទីលានពហុកីឡដ្ឋានជាតិដូចគ្នា។
គួរបញ្ជាក់ថា ក្រុមជម្រើសជាតិតំណាង ៤ប្រទេសខាងលើនេះ នឹងធ្វើការប្រកួតសន្សំពិន្ទុ១ជើងប៉ុណ្ណោះ ដើម្បីស្វែងរកក្រុមមានពិន្ទុខ្ពស់ជាងគេ ឡើងទៅជុំផ្ដាច់ព្រ័ត្រនៃពាន AFF Suzuki Cup 2016 ដោយត្រូវចូលរួមជាមួយពូល B ខណៈក្រុមខ្លាំង ៣ក្រុមកំពុងរង់ចាំ គឺមានក្រុមជម្រើសជាតិវៀតណាម ម៉ាឡេស៊ី និងមីយ៉ាន់ម៉ា៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]