Rooney ធ្វើឲ្យអ្នកគាំទ្រមិនពេញចិត្ត ថ្វីត្បិតអង់គ្លេសឈ្នះ ២-០ ខណៈ អាល្លឺម៉ង់ បន្តឈ្នះ ក្នុងវគ្គជ​ម្រុះ World Cup (មានវីដេអូ)

អឺរ៉ុប៖ ខ្សែបម្រើប្រយុទ្ធរបស់ក្លិបបិសាចក្រហម Manchester United កីឡាករ Wayne Rooney កាលពីយប់មិញនេះ បានធ្វើឲ្យអ្នកគាំទ្រនៅក្នុងកីឡដ្ឋាន Wembley សម្តែងនូវការមិនពេញចិត្តជាមួយនឹងទម្រង់លេងរបស់ខ្លួន ទោះបីជាក្រុមជម្រើសជាតិអង់គ្លេស បានយកឈ្នះ ម៉ាល់តា ក្នុងលទ្ធផល ២-០ យ៉ាងណាក្តី ។

នៅក្នុងអំឡុងពេលប្រកួត Rooney ត្រូវបានអ្នកគាំទ្រស្រែកហ៊ោរបែបប្រមាថ ដែលនេះសបញ្ជាក់ឲ្យឃើញថា ភាគច្រើននៃអ្នកគាំទ្រមិនសូវជាពេញចិត្តនៅពេលដែល ប្រធានក្រុមជម្រើសជាតិអង់គ្លេសរូបនេះ ជាប់ក្នុងជម្រើស១១នាក់ដំបូង។

ក្រោយបញ្ចប់ការប្រកួត គ្រូបង្វឹកដែលទើបចូលកាន់តំណែងថ្មី លោក Gareth Southgate បានថ្លែងថា «ខ្ញុំដូចជាមិនយល់ទេថា ហេតុអ្វីបានជាអ្នកគាំទ្រធ្វើបែបនេះចំពោះ Rooney» ។

តែទោះជាយ៉ាងណាក៏ដោយ កំណត់ត្រារបស់ Rooney ជាមួយក្រុមជម្រើសជាតិគឺធ្វើបានល្អណាស់ ពោលគឺ កីឡាកររូបនេះ ជាអ្នកស៊ុតបញ្ចូលទីបានច្រើនជាងគេឲ្យក្រុមជម្រើសជាតិ ក្នុងចំនោមកីឡាករផ្សេងៗនាពេលបច្ចុប្បន្ននេះ៕

ក្រលេកមើលការប្រកួតមួយគូផ្សេងទៀត ដែលជាជំនួបរវាង ជើងឯកពិភពលោក ឆ្នាំ២០១៤ អាល្លឺម៉ង់ និងក្រុមជម្រើសជាតិឆែក ដែលលទ្ធផលបញ្ចប់ការប្រកួត អាល្លឺម៉ង់ ឈ្នះ ៣-០ ។ គួរបញ្ជាក់ផងដែរថា អាល្លឺម៉ង់ មិនទាន់ស្គាល់ពាក្យថាចាញ់នៅឡើយទេ ហើយចំនែកឯ ៣គ្រាប់ កាលពីយប់មិញនេះ ស៊ុតដោយកីឡាករ Thomas Mueller ២គ្រាប់ម្នាក់ឯង និងមួយគ្រាប់ទៀតដោយកីឡាករ Toni Kroos ។

ដូច្នេះ អាល្លឺម៉ង់នៅតែបន្តឈរលើកំពូលតារាងនៃពូលC មាន៦ពិន្ទុ តាមពីក្រោយដោយក្រុមជម្រើសជាតិ Azerbaijan មាន៦ពិន្ទុដូចគ្នា ប៉ុន្តែចាញ់គ្រាប់បាល់៕ 

ទស្សនាវីដេអូ Highlights នៃការប្រកួត៖

ប្រភព៖ Dailymail