រាជធានីភ្នំពេញ ៖ សង្សារ១គូជាមួយមិត្តភក្តិប្រុសម្នាក់ បានជិះម៉ូតូ១គ្រឿងដោយឲ្យ នារីជាអ្នកឌុបហើយយុវជនជាសង្សារ អង្គុយឱបចង្កេះពីក្រោយ ខណៈមកដល់មុខក្លិប មីតណាយ ត្រូវជនសង្ស័យវាយប្លន់យកម៉ូតូ ទៅបាត់ដោយសុវត្ថិភាព កាលពីវេលាម៉ោង១១យប់ ថ្ងៃទី២៧ ខែកញ្ញា ឆ្នាំ២០១៦ នៅតាមបណ្តោយផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
តាមសម្តីរបស់ជនរងគ្រោះមាន ឈ្មោះ ហ៊ុល សុខខេង ភេទប្រុស អាយុ២១ឆ្នាំ មុខរបរដេរពូក ស្នាក់នៅសង្កាត់ផ្សារដើមថ្កូវ ខណ្ឌចំការមន បានឲ្យដឹងថា ម៉ូតូដែលបានបាត់បង់នោះម៉ាក Zoomer-X ពណ៌ខ្មៅ ពាក់លេខភ្នំពេញ 1GA-0237 ។
ជនរងគ្រោះបានប្រាប់ឲ្យដឹងទៀតថា មុនពេលកើតហេតុ ខណៈពេលដែលពួកគេមានគ្នា៦នាក់ស្រី៣នាក់ ប្រុស៣នាក់ ត្រូវជាសង្សារនឹងគ្នា ជិះម៉ូតូ២គ្រឿង ម៉ាក MSX និងម៉ាក Zoomer-X ដោយម៉ូតូរបស់ខ្លួនជិះគ្នា៣នាក់ ប្រុស២នាក់ និងស្រីម្នាក់ជាអ្នកបើកម៉ូតូ គោលបំណងនាំគ្នាទៅដើរលេង និងចូលក្លឹប តែមិនទាន់បានចូលក្លឹបនៅឡើយទេ ខណៈពេលកំពុងតែជិះ ម៉ូតូ MSX ជិះនៅខាងមុខដាច់ឆ្ងាយពីគ្នាបន្តិច ស្រាប់តែមានជន សង្ស័យមួយក្រុមមានគ្នា៦នាក់ ជិះម៉ូតូ៣គ្រឿង ក្នុងនោះម៉ូតូរបស់ជនសង្ស័យម៉ាក Let’s ១គ្រឿងបានធ្វើសកម្មភាព ជិះកៀរម៉ូតូខ្លួនឲ្យចូល អែបចិញ្ចើមផ្លូវ រួចហើយបានចុះមកវាយ បណ្តាលឲ្យយុវជនដែលអង្គុយ ក្រោយគេម្នាក់រងរបួសស្រាល ធ្វើឲ្យជនរងគ្រោះទាំង៣នាក់ភ័យស្លន់ស្លោរបាននាំគ្នារត់ចោលដោយមិនបាន ដកកូនសោម៉ូតូទៅជាមួយទេ ភ្លាមៗនោះជនសង្ស័យម្នាក់បានឡើងជិះម៉ូតូរបស់ខ្លួនយកទៅបាត់ដោយសុវត្ថិភាព ។
ក្រោយពេលកើតហេតុ ជនរងគ្រោះត្រូវបានសមត្ថកិច្ច នាំទៅដាក់ពាក្យបណ្តឹងនៅប៉ុស្តិ៍នគរបាលចោមចៅ ដើម្បីកំណត់មុខសញ្ញា យកមកផ្តន្ទាទោសតាមច្បាប់ ៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា ដោយឡែកករណីមួយវិញទៀត យុវជន២នាក់ទើបតែមកពីស្រុកកំណើត មកទិញម៉ូតូយកទៅជិះរៀននៅឯស្រុកកំណើតវិញ ខណៈពេលទិញម៉ូតូបានហើយ ជូនមិត្តភក្ដិត្រឡប់មកផ្ទះ ស្រាប់តែត្រូវក្រុមចោរមួយក្រុមដេញកាប់ប្លន់ម៉ូតូរហូតបានសំរេច កាលពីវេលាម៉ោង០៣ទៀបភ្លឺឈានចូលថ្ងៃទី២៦ កញ្ញា កន្លងទៅ ស្ថិតត្រង់ចំណុចផ្លូវលំ ក្នុងភូមិអូរបែកក្អម សង្កាត់ទឹកថ្លា ខណ្ឌសែនសុខ ។
ជនរងគ្រោះជាម្ចាស់ម៉ូតូឈ្មោះឡាន់ រ៉ាឆាន់ អាយុ១៩ឆ្នាំ ជាសិស្សថ្នាក់ទី១១ មានស្រុកកំណើតនៅភូមិទួលក្រសាំង ឃុំព្រៃទន្លេ ស្រុកបន្ទាយមាស ខេត្តកំពត រីឯម៉ូតូដែលត្រូវចោរប្លន់បាត់ម៉ាកនិច ពណ៌.សលាយក្រហម គ្មានស្លាកលេខ ។ ចំណែកអ្នកជិះពីក្រោយជាមិត្តភក្ដិជនរងគ្រោះឈ្មោះស្មាច់ រ៉ាន់ អាយុ១៨ឆ្នាំ ជាសិស្ស និងមានស្រុកកំណើតជាមួយគ្នា ។
តាមប្រភពឱ្យដឹងថា មុនពេលកើតហេតុ រូបគេទើបតែឡើងមកពីស្រុក ទើបតែបានបីថ្ងៃតែប៉ុណ្ណោះ មកទិញម៉ូតូយកទៅជិះទៅសាលារៀននៅឯស្រុកកំណើត ហើយរាល់ថ្ងៃរូបគាត់ស្នាក់នៅបណ្ដោះអាសន្នជាមួយបងនៅម្ដុំបឹងសាឡាង ខណ្ឌទួលគោក ។
មុនពេលកើតហេតុ រូបគេទើបតែជូនមិត្តភក្ដិទៅផ្ទះម្ដុំផ្លូវ២០០៤ ហើយបំណងជិះត្រលប់មកផ្ទះបងនៅម្ដុំបឹងសាឡាងវិញ ខណ:ជិះ មកដល់ចំណុចស្តុបណតប្រ៊ីត ស្រាប់តែមានម៉ូតូ២គ្រឿងម៉ាក FTR ពណ៌.ស និងមួយគ្រឿងទៀត ម៉ាកលែតពណ៌ខ្មៅ ជិះគ្នាបួននាក់ បានដេញតាមមកពីក្រោយ ធ្វើឱ្យភ័យជិះម៉ូតូរហូតដល់ចំណុចកើតហេតុ ជនរងគ្រោះផ្ដួលម៉ូតូរត់គេចខ្លួន ។ ពេលនោះហើយ ដែលចោរបានដកដាវសាម៉ូរៃកាប់ពីក្រោយ បណ្ដាលឱ្យរងរបួសស្រាល (ជាំខ្នង) ។
ពេលនោះជនរងគ្រោះ បានដកសោម៉ូតូរត់មករកឱ្យគេជួយ ចំនែកឯក្រុមចោរវិញម្នាក់ ក្នុងចំណោមបួននាក់ បានចុះមកលើកម៉ូតូបំណងជិះរត់ តែជាអកុសលម៉ូតូអស់សាំង ទើបជនសង្ស័យខាងលើនោះ បានសណ្តោងគ្នារត់គេចខ្លួនបាត់ស្រមោល ។ ក្រោយពេលកើតហេតុ ជនរងគ្រោះត្រូវបានសមត្ថកិច្ចជូនមកដាក់ពាក្យបណ្ដឹងនៅប៉ុស្ដិ៍នគរបាលរដ្ឋាបាលទឹកថ្លា ដើម្បីស្វែងរកម៉ូតូយកមកវិញ ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
