ខេត្តសៀមរាប ៖ ភ្នាក់ងារទេសចរណ៍ មានតួនាទីសំខាន់ណាស់ក្នុងការណែនាំទិសដៅទស្សនា មើលសកម្មភាពនានារបស់ភ្ញៀវទេសចរ ពន្យល់ណែនាំ ក៏ដូចជាជួយដោះស្រាយបញ្ហា ផ្សេងៗដែលកើតឡើងជាយថាហេតុក្នុងការទស្សនានៅតំបន់អង្គរ ។
សកម្មភាពដែលភ្នាក់ងារទេសចរណ៍តែងតែយកចិត្តទុកដាក់ និងជួបជាប្រចាំ គឺការជួយសង្គ្រោះភ្ញៀវពេលមានគ្រោះថ្នាក់ ការរើសបានរបស់ភ្ញៀវ និងទប់ស្កាត់ករណីភ្ញៀវប្រព្រឹត្តមិនសមរម្យនៅក្នុងពេលទស្សនា ។ យោងតាមរបាយការណ៍សកម្មភាពការងារនៅខែសីហា ឆ្នាំ២០១៦ របស់នាយកដ្ឋានអភិវឌ្ឍន៍ទេសចរណ៍អង្គរនៃអាជ្ញាធរជាតិអប្សរាបានបង្ហាញថា ក្រុមការងារជួយសង្គ្រោះភ្ញៀវបានចំនួន១៥ករណីដែលរងរបួសដោយរអិល ជំពប់ជើង បណ្តាលឱ្យដួល គ្រេច ថ្លោះដៃជើង ងងឹតមុខ ចុកពោះ ប៉ះក្បាលនឹងហោជាង ឬរោងទង និងធ្លាក់ពីលើរ៉ឺម៉ក ។ បញ្ហាទាំងនេះមិនមានច្រើនទេនៅតំបន់អង្គរ ដែលពេលខ្លះកើតឡើង ដោយសារភ្ញៀវធ្វេសប្រហែសមិនគោរពតាមការណែនាំ ឬស្លាកសញ្ញាហាមឃាត់ និងសុខភាពផ្ទាល់ខ្លួនរបស់ពួកគាត់ជាដើម ។
ទោះជាយ៉ាងណាក្តី ក្រុមភ្នាក់ងារទេសចរណ៍អាជ្ញាធរជាតិអប្សរា សហការជាមួយនគរបាលទេសចរណ៍ និងនគរបាលការពារបេតិកភណ្ឌ បានជួយសង្គ្រោះទាន់ពេលវេលានៅនឹងកន្លែងចំពោះករណី ស្រាលៗ រីឯករណីធ្ងន់គឺត្រូវបញ្ជូនទៅមន្ទីរពេទ្យ ។
ក្រុមភ្នាក់ងារទេសចរណ៍អាជ្ញាធរជាតិអប្សរា នគរបាលទេសចរណ៍ និងនគរបាលការពារបេតិកភណ្ឌធ្លាប់បានចូលរួមវគ្គបណ្តុះបណ្តាលជំនាញសង្គ្រោះបឋម និងមានបរិក្ខារសង្គ្រោះបឋមជាប់ខ្លួនស្រាប់ ។ ដោយឡែកចំពោះការរើសបានរបស់របរភ្ញៀវដែលភ្លេច ឬជ្រុះនៅតាមបណ្តាប្រាសាទវិញ គឺមាន១៨ករណី ក្នុងនោះរកឃើញ១៥ករណី និងរកមិនឃើញ៣ករណី។ ឯករណីរកមិនឃើញ ភ្នាក់ងារទេសចរណ៍បានណែនាំឱ្យភ្ញៀវដាក់ពាក្យបណ្តឹងនៅអង្គភាពនគរបាលទេសចរណ៍ ។
សម្ភារដែលភ្ញៀវភ្លេច និងបាត់ជាទូទៅមានដូចជា៖ ទូរសព្ទដៃ កាបូបស្ពាយ កាបូបលុយ ម៉ាស៊ីនថត កាតអេធីអ៊ឹម លិខិតឆ្លងដែន ជើងទម្រម៉ាស៊ីនថត ។ ក្នុងករណីរកឃើញសម្ភារ ហើយរកម្ចាស់មិនឃើញ ភ្នាក់ងារទេសចរណ៍បានប្រគល់ជូននគរបាលទេសចរណ៍ជាអ្នករក្សាទុក ដើម្បីរង់ចាំម្ចាស់មកទាក់ទង ។ រាល់សកម្មភាពទាំងនេះទទួលបាននូវការអរគុណ និងកោតសរសើរអ្នកទេសចរជាតិ និងអន្តរជាតិមិនដាច់ពីមាត់ ព្រមទាំងការបង្ហាញនូវក្តីស្រឡាញ់ និងទំនុកចិត្តមកលើភ្នាក់ងារទេសចរណ៍នៃអាជ្ញាធរជាតិអប្សរាទៀតផង ។
ក្រៅពីនោះ ក្រុមភ្នាក់ងារទេសចរណ៍ក៏បានហាមឃាត់ភ្ញៀវដែលប្រព្រឹត្តមិនសមរម្យបានចំនួន២៨ករណីផងដែរ ដូចជា៖ ការបង្ហោះ Drone ថតរូបបង្ហាញម៉ូដ បម្រុងថតរូបលើកបដាជាភាសាបរទេស ឡើងកន្លែងហាមឃាត់ និងគ្រោះថ្នាក់ ស្លៀកសម្លៀកបំពាក់សិចស៊ី ជនបរទេសថតរូបអាពាហ៍ពិពាហ៍ដោយគ្មានច្បាប់អនុញ្ញាត ថតរូបកាយវិការមិនសមរម្យ ថតរូបអាជីវកម្មដោយគ្មានច្បាប់អនុញ្ញាត ជក់បារីជាដើម ។
អាជ្ញាធរជាតិអប្សរាតែងតែយកចិត្តទុកដាក់ជានិច្ចលើគ្រប់បញ្ហាដែលកើតឡើងនៅក្នុងតំបន់អង្គរ ពិសេសគឺសន្តិសុខ សុវត្ថិភាព និងភាពងាយស្រួលដល់ភ្ញៀវទេសចរសំដៅធ្វើយ៉ាងណាគឺឱ្យភ្ញៀវទេសចរមកទស្សនាកម្ពុជាម្តងហើយចង់មកម្តងទៀត ជាពិសេសជួយយកចិត្តទុកដាក់ពេលភ្ញៀវមានបញ្ហា ដែលនេះជាសន្តានចិត្តដែលខ្មែរមានតាំងពីដូនតាមក ៕
ប្រភព៖ កោះសន្តិភាព
កំណត់ហេតុខ្មែរឡូត៖ គួររំលឹកព័ត៌មានពាក់ព័ន្ធ កាលពីលើកមុនផងដែរថា ជាមោទនភាពដែលជាតម្លៃធំធេងមួយទៀតសម្រាប់ព្រះរាជាណាចក្រកម្ពុជា និង ប្រជាពលរដ្ឋកម្ពុជាទាំងមូល បន្ទាប់ពីយើងបានទទួលជ័យលាភីពានរង្វាន់ថ្មីៗពីទីភ្នាក់ងារប្រឹក្សាយោបល់លើការធ្វើដំណើរ ទេសចរណ៍ (TripAdvisor) ដែលទីក្រុងសៀមរាបបានឈ្នះជា «គោលដៅទេសចរណ៍ល្អបំផុតក្នុងអាស៊ីសម្រាប់ឆ្នាំ២០១៦ Siem Reap as the Best Destination in Asia 2016» និងប្រាសាទអង្គរវត្ត បានឈ្នះជា «ប្រាសាទល្អបំផុតក្នុងអាស៊ីសម្រាប់ឆ្នាំ២០១៦ Angkor Wat as the Best Landmarks in Asia 2016» ។
ផ្តើមពីនោះ ហើយកាន់តែមោទនភាពថែមទៀតនោះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏នឹងត្រូវទទួលនូវជ័យលាភីពានរង្វាន់ «កម្ពុជា ជាគោលដៅទេសចរណ៍ល្អបំផុតលើពិភពលោកសម្រាប់ឆ្នាំ២០១៦ Cambodia – the World Best Tourist Destination for 2016» ដែលនឹងត្រូវប្រគល់ដោយ ក្រុមប្រឹក្សាភិបាលទេសចរណ៍ និង ពាណិជ្ជកម្មអឺរ៉ុប ហើយពិធីប្រគល់នេះនឹងរៀបចំជាផ្លូវការនៅវិមានសន្តិភាព នាព្រឹកថ្ងៃទី២២ ខែមិថុនា ឆ្នាំ២០១៦ នេះ ។
សូមជម្រាបថា ដោយទទួលបានការអនុញ្ញាតដ៏ខ្ពង់ខ្ពស់ពីរាជរដ្ឋាភិបាលនៃព្រះរាជាណាចក្រកម្ពុជា ក្រសួងទេសចរណ៍ បានអញ្ជើញគណៈប្រតិភូក្រុមប្រឹក្សាភិបាលទេសចរណ៍ និង ពាណិជ្ជកម្មអឺរ៉ុប ចំនួន៥រូប ដែលដឹកនាំដោយលោកបណ្ឌិតសាស្ត្រាចារ្យ Mr. Anton Caragea ប្រធានក្រុមប្រឹក្សាភិបាលទេសចរណ៍ និង ពាណិជ្ជកម្ម នៃសហភាពអឺរ៉ុប មកធ្វើទស្សនៈកិច្ចនៅកម្ពុជា ចាប់ពីថ្ងៃទី១៦ ដល់ថ្ងៃទី២៣ ខែមិថុនា ឆ្នាំ២០១៦ ដើម្បីផ្តល់ជ័យលាភីពានរង្វាន់ជូនដល់រាជរដ្ឋាភិបាលកម្ពុជា «កម្ពុជា ជាគោលដៅទេសចរណ៍ល្អបំផុតលើពិភពលោក សម្រាប់ឆ្នាំ២០១៦ Cambodia – the World Best Tourist Destination for 2016» ព្រមទាំងប្រកាស «កម្ពុជា ជាគោលដៅវប្បធម៌ពេញនិយមសម្រាប់ឆ្នាំ២០១៦ The Favorite Cultural Destination for 2016» ថែមទៀត ។
មន្ត្រីក្រសួងទេសចរណ៍បានឲ្យដឹងថា ក្រុមប្រឹក្សាភិបាលទេសចរណ៍ និង ពាណិជ្ជកម្មអឺរ៉ុប ត្រូវបានបង្កើតឡើងតាំងពីឆ្នាំ២០០៥ ដោយមានសមាជិកមកពីប្រទេសទាំង២៧ក្នុងសហគមន៍អឺរ៉ុប ។ ក្រុមប្រឹក្សានេះគឺជាស្ថាប័នចាស់ជាងគេ និង មានសារៈសំខាន់ក្នុងសហគមន៍អឺរ៉ុប ដែលមានជំនាញលើវិស័យស្រាវជ្រាវ និង ផ្សព្វផ្សាយទេសចរណ៍ ដោយមានទីផ្សារអតិថិជនរហូតដល់៨០០លាននាក់ក្នុងទូទាំងសហគមន៍អឺរ៉ុប ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]