រាជធានីភ្នំពេញ ៖ យុវជន២នាក់ទើបតែមកពីស្រុកកំណើត មកទិញម៉ូតូយកទៅជិះរៀននៅឯស្រុកកំណើតវិញ ខណៈពេលទិញម៉ូតូបានហើយ ជូនមិត្តភក្ដិត្រឡប់មកផ្ទះ ស្រាប់តែត្រូវក្រុមចោរមួយក្រុមដេញកាប់ប្លន់ម៉ូតូរហូតបានសំរេច កាលពីវេលាម៉ោង០៣ទៀបភ្លឺឈានចូលថ្ងៃទី២៦ កញ្ញា ស្ថិតត្រង់ចំណុចផ្លូវលំ ក្នុងភូមិអូរបែកក្អម សង្កាត់ទឹកថ្លា ខណ្ឌសែនសុខ ។
ជនរងគ្រោះជាម្ចាស់ម៉ូតូឈ្មោះឡាន់ រ៉ាឆាន់ អាយុ១៩ឆ្នាំ ជាសិស្សថ្នាក់ទី១១ មានស្រុកកំណើតនៅភូមិទួលក្រសាំង ឃុំព្រៃទន្លេ ស្រុកបន្ទាយមាស ខេត្តកំពត រីឯម៉ូតូដែលត្រូវចោរប្លន់បាត់ម៉ាកនិច ពណ៌.សលាយក្រហម គ្មានស្លាកលេខ ។ ចំណែកអ្នកជិះពីក្រោយជាមិត្តភក្ដិជនរងគ្រោះឈ្មោះស្មាច់ រ៉ាន់ អាយុ១៨ឆ្នាំ ជាសិស្ស និងមានស្រុកកំណើតជាមួយគ្នា ។
តាមប្រភពឱ្យដឹងថា មុនពេលកើតហេតុ រូបគេទើបតែឡើងមកពីស្រុក ទើបតែបានបីថ្ងៃតែប៉ុណ្ណោះ មកទិញម៉ូតូយកទៅជិះទៅសាលារៀននៅឯស្រុកកំណើត ហើយរាល់ថ្ងៃរូបគាត់ស្នាក់នៅបណ្ដោះអាសន្នជាមួយបងនៅម្ដុំបឹងសាឡាង ខណ្ឌទួលគោក ។
មុនពេលកើតហេតុ រូបគេទើបតែជូនមិត្តភក្ដិទៅផ្ទះម្ដុំផ្លូវ២០០៤ ហើយបំណងជិះត្រលប់មកផ្ទះបងនៅម្ដុំបឹងសាឡាងវិញ ខណ:ជិះ មកដល់ចំណុចស្តុបណតប្រ៊ីត ស្រាប់តែមានម៉ូតូ២គ្រឿងម៉ាក FTR ពណ៌.ស និងមួយគ្រឿងទៀត ម៉ាកលែតពណ៌ខ្មៅ ជិះគ្នាបួននាក់ បានដេញតាមមកពីក្រោយ ធ្វើឱ្យភ័យជិះម៉ូតូរហូតដល់ចំណុចកើតហេតុ ជនរងគ្រោះផ្ដួលម៉ូតូរត់គេចខ្លួន ។ ពេលនោះហើយ ដែលចោរបានដកដាវសាម៉ូរៃកាប់ពីក្រោយ បណ្ដាលឱ្យរងរបួសស្រាល (ជាំខ្នង) ។
ពេលនោះជនរងគ្រោះ បានដកសោម៉ូតូរត់មករកឱ្យគេជួយ ចំនែកឯក្រុមចោរវិញម្នាក់ ក្នុងចំណោមបួននាក់ បានចុះមកលើកម៉ូតូបំណងជិះរត់ តែជាអកុសលម៉ូតូអស់សាំង ទើបជនសង្ស័យខាងលើនោះ បានសណ្តោងគ្នារត់គេចខ្លួនបាត់ស្រមោល ។ ក្រោយពេលកើតហេតុ ជនរងគ្រោះត្រូវបានសមត្ថកិច្ចជូនមកដាក់ពាក្យបណ្ដឹងនៅប៉ុស្ដិ៍នគរបាលរដ្ឋាបាលទឹកថ្លា ដើម្បីស្វែងរកម៉ូតូយកមកវិញ ។
ប្រភព៖ កោះសន្តិភាព
កំណត់ហេតុខ្មែរឡូត៖ ដោយឡែក ករណីមួយផ្សេងទៀត កាលពីលើកមុន ក្រុមចោរប្លន់ម៉ូតូចំនួន៣នាក់ ក្នុងចំណោម៤នាក់ ត្រូវបានកម្លាំងនគរបាលប៉ុស្ដិ៍ទួលសង្កែ សហការជាមួយកម្លាំងនគរបាលព្រហ្មទណ្ឌ ខណ្ឌឫស្សីកែវ តាមបង្ក្រាបនិងឃាត់ខ្លួន បានជាបន្តបន្ទាប់ ក្រោយធ្វើសកម្មភាពវាយយកម៉ូតូ ពីប្រជាពលរដ្ឋបានសម្រេច នៅថ្ងៃទី១៧ ខែកញ្ញា ឆ្នាំ២០១៦នេះ។
លោក ហ៊ុយ ហៀន នាយនគរបាលប៉ុស្ដិ៍ទួលសង្កែ បានឲ្យដឹងថា ការបង្ក្រាប និងឃាត់ខ្លួនជនសង្ស័យទាំងនេះ បានធ្វើឡើងក្រោយពីកម្លាំងរបស់លោកបានស្រាវជ្រាវ កាលពីយប់ថ្ងៃទី១១ រហូតមកដល់ព្រឹកថ្ងៃទី១៧ ខែកញ្ញា ឆ្នាំ២០១ ៦ នៅចំណុចលើផ្លូវ២៧៣កែងផ្លូវរថភ្លើង ស្ថិតក្នុងក្រុមទី១ ភូមិទួលគោក សង្កាត់ទួលសង្កែ ខណ្ឌឫស្សីកែវ។
លោក ហ៊ុយ ហៀន បានបញ្ជាក់ថា «ជំហានដំបូងកម្លាំងសមត្ថកិច្ចយើង បានទទួលជនសង្ស័យជាបក្ខពួកក្រុមចោរ វាយយកម៉ូតូ២នាក់ និងម៉ូតូ១គ្រឿងពីសមត្ថកិច្ចខណ្ឌទួលគោក ដែលបង្ក្រាបបានបន្ទាប់ពី ធ្វើសកម្មភាពវាយយកម៉ូតូ១គ្រឿង ពីជនរងគ្រោះដើម្បីបន្តស្រាវជ្រាវស្វែងរក ចាប់ខ្លួនបក្ខពួកដែលនៅសេសសល់»។
លោកបន្តថា ក្រោយទទួលបានជនសង្ស័យ២នាក់ ពីសមត្ថកិច្ចខណ្ឌទួលគោកហើយនោះ និងដោយមានការបញ្ជាផ្ទាល់ពីលោកវរសេនីយ៍ឯក ទៀង ច័ន្ទសារ អធិការនគរបាលខណ្ឌឫស្សីកែវ កម្លាំងសមត្ថកិច្ចប៉ុស្ដិ៍ទួលសង្កែ និងកម្លាំងព្រហ្មទណ្ឌខណ្ឌឫស្សីកែវ ក៏បន្តស៊ើបអង្កេត បានតម្រុយខ្លះៗ រហូតមកដល់ព្រឹកថ្ងៃទី១៧ កញ្ញា នេះកម្លាំងសមត្ថកិច្ចបានឈានទៅបង្ក្រាប និងឃាត់បក្ខពួកជនសង្ស័យបានម្នាក់ទៀតតែម្ដង។ ដោយឡែក បក្ខពួកក្រុមម្នាក់ទៀតឈ្មោះ និត បាននិងកំពុងរត់គេចខ្លួន។
នាយប៉ុស្ដិ៍ដដែលបានបន្ថែមថា ជនសង្ស័យត្រូវឃាត់ខ្លួនទី ១-ឈ្មោះ រស់ ច័ន្ទសុភ័ក្រដារា អាយុ២៨ឆ្នាំ មុខរបរសន្តិសុខឯកជន( ឃាត់ខ្លួន) ទី២-ឈ្មោះ ទ្រី មួយអ៊ី ភេទស្រី អាយុ២១ឆ្នាំ មុខរបរមិនប្រាកដ ទី៣-ឈ្មោះរៀម រ៉ាស៊ី ហៅពៅឆ្វេង ភេទប្រុស អាយុ២៤ឆ្នាំ មុខមិនពិតប្រាកដ និងត្រូវបានសមត្ថកិច្ចឃាត់ខ្លួន ខណៈជនសង្ស័យទី៤-ឈ្មោះ និត បាន និងកំពុងរត់គេចខ្លួន។ ជនសង្ស័យទាំង៤នាក់ មានទីលំនៅមិនពិតប្រាកដ។ រីឯជនរងគ្រោះ បន្ទាប់ពីកើតហេតុ មិនបានមកដាក់ពាក្យបណ្ដឹងនោះឡើយ។
ចំណែកម៉ូតូ១គ្រឿងដែលសមត្ថកិច្ច ដកហូតពីក្រុមជនសង្ស័យម៉ាកហុងដាសង់ឌ្រីមសេ១២៥ ពណ៌ខ្មៅ សេរីឆ្នាំ២០១៤។ សូមបញ្ជាក់ថា ជនសង្ស័យជាក្រុមចោរវាយយកម៉ូតូទាំង៣ នាក់និងវត្ថុតាងត្រូវបញ្ជូនមកសាកសួរនៅអធិការដ្ឋាន នគរបាលខណ្ឌឫស្សីកែវ ដើម្បីកសាងសំណុំរឿងចាត់ការតាមនីតិវិធី និងបន្តស្រាវជ្រាវស្វែងរកចាប់ខ្លួន បក្ខពួកម្នាក់ទៀត ដែលកំពុងរត់គេចខ្លួនផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
