រាជធានីភ្នំពេញ ៖ លោកគ្រីស្យង់ ហ្គោកឺឡាំង ដេប៉ាលីយ៉ែរ (Christian GAUQUELIN des PALLIERES ) ដែលត្រូវបានគេស្គាល់ថា ជាស្ថាបនិកនៃអង្គការភាពញញឹមនៃកុមារ ដែលជាអង្គការមួយបានជួយកុមារកំព្រា និងគ្មានទីពឹងស្ទើររាប់ពាន់នាក់ឲ្យមានការរៀនសូត្រ និងមានការងារល្អធ្វើក្នុងសង្គមនោះ ពេលនេះលោកមានទទួលមរណភាពហើយ ក្នុងវ័យ៨២ឆ្នាំ ដោយសាររោគាពាធ កាលពីវេលាម៉ោង៧យប់ ថ្ងៃទី២៤ ខែកញ្ញា ឆ្នាំ២០១៦ នៅទីតាំងអង្គការភាពញញឹមនៃកុមារ ស្ថិតក្នុងផ្ទះលេខ៤០២ ភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
អង្គការភាពញញឹមនៃកុមារ ត្រូវបានបង្កើតឡើងតាំងពីឆ្នាំ១៩៩៤មកម្ល៉េះ ។ អង្គការមួយនេះបង្កើតឡើងដោយប្តីប្រពន្ធជាជនជាតិបារាំង គឺលោកគ្រីស្យង់ ហ្គោកឺឡាំង ដេប៉ាលីយ៉ែរ (Christian GAUQUELIN des PALLIERES ) និងលោកស្រី ម៉ារីហ្វ្រង់ ដេប៉ាលីយ៉ែរ ដែលបង្កើតឡើងក្នុងគោលដៅជួយសង្គ្រោះកុមាររើសសម្រាម កុមារក្រីក្រគ្មានទីពឹង គ្មានផ្ទះស្នាក់អាស្រ័យត្រឹមត្រូវ ឬបាត់បង់ឪពុកម្តាយជាដើម ដោយបានយកពួកគេមកអប់រំ ណែនាំ រៀនសូត្រ តាមកម្រិតនៃសាលារដ្ឋ ឬចំណេះដឹងទូទៅ នៃកម្រិតសិក្សា បង្ហាត់បង្រៀនទាំងចំណេះដឹង ចំណេះធ្វើ និងជំនាញផ្សេងៗ ដល់ក្មេង និងជួយរកការងារឲ្យធ្វើពេលបញ្ចប់ការសិក្សា នៃអង្គការខាងលើ ។ បន្ថែមពីនេះក៏មានផ្តល់នូវទីកន្លែងស្នាក់នៅដល់ក្មេងៗដែលភាគច្រើនមកពីជនបទ និងមួយចំនួនជាក្មេងកំព្រាឪពុកម្តាយ ដោយប្តីប្រពន្ធទាំង២នាក់ដែលជាស្ថាបនឹកបានប្រើប្រាស់ថវិការផ្ទាល់ខ្លួនទិញដីដ៏ធំមួយទំហំជាង១ហិកតា និងបានសាងសង់ជាអាគារសិក្សា បណ្ណាល័យអានសៀវភៅ បន្ទប់ហូបចុក ស្នាក់នៅ និងអាគាររដ្ឋបាលទូទៅជាច្រើនទៀត ដើម្បីសម្រាប់ផ្គត់ផ្គង់ដល់ការរៀនសូត្រ និងរស់នៅរបស់ក្មេងៗ ។
សូមបញ្ជាក់ថា ស្ថាបនិកទាំង២នាក់ប្តីប្រពន្ធខាងលើនេះមានសញ្ជាតិដើមជាជនជាតិបារាំង ពួកគាត់បានចូលមករស់នៅក្នុងទឹកដីនៃប្រទេសកម្ពុជាតាំងពីឆ្នាំ១៩៩០ ហើយពួកគាត់បានស្នើទៅដល់ព្រះមហាក្សត្រដើម្បីសុំចូលជាសញ្ជាតិខ្មែរ ក៏ត្រូវបានព្រះបរមរតនកោដ្ឋ នរោត្តម សីហនុ ឡាយព្រហស្ថឯកភាពតាំងពីឆ្នាំ២០០៤មកម្ល៉េះ ។
យ៉ាងណាមិញ បច្ចុប្បន្នសពបានរៀបចំពិធីតម្កល់នៅក្នុងទីតាំងផ្ទាល់របស់អង្គការភាពញញឹមនៃកុមារ ដើម្បីឲ្យបងប្អូនញាតិជិតខាងមកគោរពវិញ្ញាណក្ខន្ធសព និងត្រៀមដឹកយកទៅកាន់វត្តឫស្សីសាញ់នៅរសៀលថ្ងៃចន្ទ ដើម្បីបូជាតាមប្រពៃណី ។
សូមបញ្ជាក់ថា នៅក្នុងនោះគេសង្គេតឃើញមានវត្តមានសិស្ស និងអតីតសិស្សជាច្រើនដែលធំធាត់នៅក្នុងអង្គការខាងលើបាននាំគ្នាមកគោរពវិញ្ញាណក្ខន្ធលោក ស្យង់ ហ្គោកឺឡាំង ដេប៉ាលីយ៉ែរ (Christian GAUQUELIN des PALLIERES) យ៉ាងកកកុញផងដែរ ៕
ប្រភព៖ កោះសន្តិភាព
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា តារាសម្ដែងប្រុសជើងចាស់ខ្មែរ ទទួលមរណភាព ដោយសារជំងឺដុះសាច់ក្នុងខួរក្បាល ។ គួររំលឹកផងដែរថា នេះជារឿងដ៏ក្រៀមក្រំ ដែលតារាប្រុសសិល្បៈជើងចាស់ខ្មែរ លោក ហង្សផល្លីមធុរ៉ា បានលាចាកលោក កាលពីម៉ោង ៦ព្រឹកត្រូវនៅថ្ងៃទី ០១ សីហា ឆ្នាំ២០១៦ កន្លងទៅ ដោយសារតែជំងឺដុះសាច់ក្នុងខួរក្បាល នៅឯមន្ទីរពេទ្យរុស្សី។
នេះបើតាមបណ្ដាញទំនាក់ទំនងសង្គមអ្នកសិល្បៈ ដូចជា អ្នកនាង ស៊ុុន ណារីម៉ូនីកា និងអ្នកនាង ចាន់ តារាទី បានបង្ហោះជាសារ និងរូបភាពដ៏គួរឲ្យសង្វេគ ពីលោក ហង្សផល្លីមធុរ៉ា ដែលគាត់បានទទួលមរណភាពក្នុងវ័យ ៥២ឆ្នាំ។ នៅក្នុងសារក៏បានឲ្យដឹងទៀតថា ក្រុមគ្រួសាររបស់គាត់ បានខ្វះខាតថវិកាសម្រាប់ធ្វើបុណ្យ ដែលអ្នកនាងសំណូមពរ ឲ្យបងប្អូនទាំងអស់គ្នាជួយដល់រូបគាត់ផងដែរ។
គួរបញ្ជាក់ថា លោក ហង្សផល្លីមធុរ៉ា ធ្លាប់បានរៀបការជាមួយ នារីអនិកជនអាមេរិកម្នាក់ និងបានក្លាយជាថៅកែរោងចក្រកិនស្រូវ នៅឯខេត្ដបាត់ដំបង តែបែរជាធ្លាក់ខ្លួនក្រ ក្រោយពីលែងលែះប្រពន្ធ ជាមួយនឹងបញ្ហាគ្រួសារ ដែលអ្វីកាន់តែខ្លោចចិត្ដទៀតនោះ គឺរូបគាត់គ្មានប្រាក់ព្យាបាលខ្លួន នៅពេលដែលធ្លាក់ខ្លួនឈឺ នេះបើតាមប្រភពព័ត៌មានក្នុងស្រុកបានចុះផ្សាយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]