ខេត្តព្រៃវែង ៖ ថ្មីៗនេះមានប្រជាពលរដ្ឋជាច្រើន នៅស្រុកពាមរក៍ បានបង្ហាញនៅការភ្ញាក់ផ្អើល និងងឿងឆ្ងល់ជាខ្លាំង ដោយសារបានឃើញជនជាតិវៀតណាមមួយក្រុម កំពុងដើរបោះបង្គោលថ្មធ្វើពីបេតុងនៅតាមទីសាធារណៈដូចជាក្បែរដងផ្លូវ ក្នុងសាលារៀន និងតាមវត្តអារាមជាដើម ដោយមិនដឹងថាគេបោះបង្គោលនោះក្នុងចេតនាអ្វីនោះទេ។
ជាក់ស្តែងកាលពីប៉ុន្មានថ្ងៃមុននេះ ក្រុមជនជាតិវៀតណាមទាំងនោះ បានចូលទៅបោះបង្គោលនៅក្បែរចេតីយ មួយកន្លែងក្នុងវត្តបាបោងលើ ក្រោយពេលបោះរួចហើយក៏ត្រូវម្ចាស់ ចេតីយវាយកំទេចចោលវិញ ដោយអះអាងថា ធ្វើអោយប៉ះពាល់ចេតីយ និងខូចហុងស៊ុយរបស់គេ។ ជុំវិញការចុះបោះបង្គោលនេះ កុំថាឡើយតែប្រជាពលរដ្ឋ សូម្បីតែសមត្ថកិច្ច អាជ្ញាធរមូលដ្ឋានរួមទាំងមន្ត្រីជំនាញ សុរិយោដីផងនោះ ក៏មិនបានដឹងរឿងច្បាស់នោះដែរ ហេតុនេះហើយទើប មិនបានផ្សព្វផ្សាយបន្តទៅដល់ប្រជាពលរដ្ឋ ទើបនាំឲ្យប្រជាពលរដ្ឋភ្ញាក់ផ្អើល រហូតដល់មានអ្នកខ្លះយកទៅនិយាយថា វៀតណាមចូលមកបោះបង្គោល យកដីនៅកណ្តាលស្រុកថែមទៀតផង។
លោក ភុន សម្ភស្ស អភិបាលស្រុកពាមរក៍បានឲ្យដឹងថា ក្រុមជនជាតិវៀតណាមទាំងនោះ មានគ្នាប៉ុន្មាននាក់ ហើយគេមានគម្រោងចុះបោះបង្គោលនៅទីតាំងណាខ្លះ ចំនួនប៉ុន្មាន លោកមិនបានដឹងនោះទេ ព្រោះគេមិនបានហៅឲ្យចូលរួមជាមួយ។ ប៉ុន្តែលោកទទួលបានលិខិត មួយពីសាលាខេត្តព្រៃវែង ដែលបញ្ជាក់ថាក្រុមជនជាតិវៀតណាមទាំងនោះ គេចុះបោះបង្គោលកំណត់រយៈកម្ពស់ តែត្រង់ថារយៈកម្ពស់អ្វីនោះលោកមិនដឹងនោះទេ។
ចំណែកលោក អេង ផេងអាន ប្រធានមន្ទីរសុរិយោដីខេត្ពព្រៃវែងបានឲ្យដឹងថា រឿងគេចុះបោះបង្គោលនោះលោកបានដឹងដែរ ព្រោះលោកក៏បានទទួលលិខិតពីសាលាខេត្តដែរ ដោយក្នុងលិខិតនោះគេបានបញ្ជាក់ថា ជាក្រុមបច្ចេកទេសចុះមកបោះបង្គោលកំណត់រយៈកម្ពស់ តែត្រង់ថារយៈកំពស់នោះគឺជាអ្វីលោកមិនបានដឹង ហើយក៏មិនយល់នោះដែរ ព្រោះមិនបានចូលរួមជាមួយគេ។ រីឯលោក អ៊ុយ សាគុន នាយករដ្ឋបាលសាលាខេត្តព្រៃវែង ក៏អះអាងថាមិនបានដឹងដូចគ្នាដែរ ដោយខាងសាលាខេត្តគ្រាន់តែទទួលបានលិខិតមួយ ពីក្រសួងរៀបចំដែនដីនគររូបនីយកម្ម និងសំណង់ ដែលផ្ញើជូនអភិបាលខេត្តស្នើសុំកិច្ចសហការក្នុងការអនុវត្តគម្រោងការស្តារ និងធ្វើឲ្យប្រសើរឡើងនូវបណ្តាញរយៈកម្ពស់នៅកម្ពុជា។
ប៉ុន្តែការអនុវត្តជាក់ស្តែង គេធ្វើនៅតំបន់ណា ពេលណា អ្នកណាជាអ្នកបោះបង្គោលត្រូវបោះមានចំនួនប៉ុន្មាន ហើយផ្តល់ផលប្រយោជន៍អ្វីខ្លះពីការបោះបង្គោលនេះ ខាងខេត្តមិនបានដឹងនោះទេ។ ជុំវិញការបោះបង្គោលធ្វើឲ្យមានការភ្ញាក់ផ្អើលដល់ប្រជាពលរដ្ឋ និងមន្ត្រីរាជការក្នុងខេត្តព្រៃវែងនេះ ត្រូវបានលោក ណុប ណារិន អនុប្រធាននាយកដ្ឋានភូមិសាស្ត្រ ប្រាប់កោះសន្តិភាពឲ្យដឹងតាមទូរសព្ទ័ថា ការចុះបោះបង្គោលនេះ មិនមែនវៀតណាមគេមកបោះនៅកណ្តាលស្រុកដើម្បីយកដី ដូចដែលអ្នកស្រុកខ្លះយល់ច្រឡំនោះទេ។
ប៉ុន្តែវាជាការអនុវត្តគម្រោង ការស្តារ និងធ្វើឲ្យប្រសើរឡើងនូវបណ្តាញរយៈកម្ពស់នៅកម្ពុជា ដែលគម្រោងនេះស្ថិតនៅក្រោមជំនួយឥតសំណងរបស់ប្រទេសវៀតណាម ក្នុងរង្វង់ទឹកប្រាក់ជិត ១០លានដុល្លារ ដោយអ្នកអនុវត្តចុះបោះបង្គោលនេះមានចំនួន៥ក្រុម និងចុះបោះនៅគ្រប់ខេត្តទាំងអស់ទូទាំងប្រទេសតែម្តង។ លោក ណុប ណារិន បានបន្តទៀតថា គម្រោងនេះវៀតណាមគេផ្តល់ថវិកា ព្រមទាំងអ្នកបច្ចេកទេសរបស់គេឲ្យចុះមកធ្វើផ្ទាល់តែម្តង ចំណែកខ្មែរយើងរង់ចាំតែទទួលយកប៉ុណ្ណោះ។
ប៉ុន្តែក្នុងពេលចុះបោះបង្គោលផ្ទាល់នោះ ក៏មានមន្ត្រីជំនាញអគ្គនាយកដ្ឋានសុរិយោដី និងភូមិសាស្ត្រចុះទៅជាមួយដែរ ដោយគម្រោងនេះបានចាប់អនុវត្តតាំងពីឆ្នាំ២០០៩មកម្ល៉េះ តែមិនដែលមានបញ្ហាអ្វីនោះទេ ទើបតែមកដល់ស្រុកពាមរក៍ ខេត្តព្រៃវែងនេះស្រាប់តែមានបញ្ហាកើតឡើង ដោយសារតែមន្ត្រីជំនាញ និងអាជ្ញាធរមូលដ្ឋាន មិនបានផ្សព្វផ្សាយជាសាធារណៈឲ្យប្រជាពលរដ្ឋបានយល់ច្បាស់។
ហើយដោយសារបញ្ហានេះដែរពេលនេះលោកបានហៅ អ្នកចុះបោះបង្គោលទាំង៥ក្រុមនោះ ឲ្យត្រឡប់ទៅក្រសួងវិញហើយ ដើម្បីរៀបចំផែនការកំណត់ទីតាំងភូមិសាស្ត្រត្រូវចុះបោះបង្គោលឲ្យបានច្បាស់ និងធ្វើផែនការផ្សព្វផ្សាយជាសាធារណៈឲ្យបានទូលំទូលាយសិន ដើម្បីឲ្យប្រជាពលរដ្ឋបានយល់ច្បាស់ ចៀសវាងការយល់ខុសតទៅទៀត។ លោក ណុប ណារិន បានបញ្ជាក់ថា សម្រាប់បង្គោលកំណត់រយៈកម្ពស់នេះ នៅកម្ពុជាយើងបានបោះម្តងរួចមកហើយ កាលពីសម័យសង្គមរាស្ត្រនិយម ប៉ុន្តែក្រោយមកដោយសារតែភ្លើងសង្គ្រាម បានបំផ្លាញបង្គោលទាំងនោះឲ្យខូចខ្ទេចខ្ទីអស់ទៅហើយ។
ទើបពេលនេះក្រសួងបានរៀបចំបោះបង្គោលកំណត់រយៈកម្ពស់នេះសារជាថ្មី គឺបោះដើម្បីវាស់កម្ពស់ដីនៅតាមទីតាំងនីមួយៗ ដោយធៀបទៅនឹងទឹកសមុទ្រ។ ចំណែកសារៈប្រយោជន៍របស់វា គឺអាចឲ្យយើងដឹងថា ទីតាំងតំបន់ណាខ្ពស់ តំបន់ណាទាប ដូច្នេះវាងាយស្រួលសម្រាប់ការសាងសង់ ប្រពន្ធ័ធារាសាស្ត្រ ក៏ដូចជាសំណង់ផ្សេងៗដោយមិនព្រួយបារម្មណ៍ពីរឿងទឹកជំនន់ជន់លិចជាដើម ជាពិសេសនៅពេលខាងមុខយើងក៏អាចយកបង្គោលរយៈកម្ពស់នេះ ធ្វើជាគោលសម្រាប់ការវាស់វែងធ្វើប្លង់ដីធ្លីតាមរយៈ GPS ផងដែរ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]