រាជធានីភ្នំពេញ ៖ ដោយមានជំនឿថា អំឡុងពេលនេះបទចម្រៀងមិនចម្លងពីបរទេសកាន់តែមានការគាំទ្រពីមហាជនខ្លាំងឡើងនោះ លោកម៉ា ច័ន្ទបញ្ញា ជាអ្នកចម្រៀងនិងជាអ្នកនិពន្ធវ័យក្មេង រំពឹងថាយ៉ាងយូរ៤ទៅ៥ឆ្នាំទៀតបទចម្រៀងខ្មែរនឹងល្បីដូចបរទេស ពិសេសលេងចម្លងពីបរទេស ។
ដោយការជឿជាក់ចំពោះបទចម្រៀងថ្មីមិនចម្លងតាមគេនោះ លោកម៉ា ច័ន្ទបញ្ញា លើកឡើងកាលពីពេល ថ្មីៗកន្លងមកថា ខ្មែរអាចនឹងបំបាត់ការលួចចម្លងស្នាដៃពីបរទេសបានក្នុងអំឡុង៥ឆ្នាំខាងមុខ បើសន្ទុះនៃការគាំទ្រកាន់តែច្រើនស្របពេលដែលអ្នកនិពន្ធមានឆន្ទៈក្នុងការនិពន្ធបទថ្មី ។ ការអះអាងបែបនេះក្រោយពីឃើញបទចម្រៀងនិពន្ធដោយអ្នកនិពន្ធវ័យក្មេងមួយចំនួនទទួលបានការគាំទ្រពីប្រិយមិត្តអ្នកស្តាប់ ។
លោកម៉ា ចន្ទ័បញ្ញា ជាអ្នកចម្រៀងផ្ដោតលើបទនិពន្ធថ្មីនិយាយថា «ក្នុងរយៈពេល៥ឆ្នាំនេះបទចម្រៀងនិពន្ធថ្មីមានការពេញនិយមខ្លាំង ហើយខ្ញុំរំពឹងថារយៈពេល៥ឆ្នាំទៀតបទចម្រៀងថ្មីរបស់កម្ពុជាអាចធ្វើបានដើម្បីប្រកួតប្រជែងនិងចេញទៅក្រៅប្រទេសកាន់តែច្រើន ។ ការនិពន្ធបទចម្រៀងថ្មីប្រៀបបានទៅនឹងការទុកមរតកសម្រាប់មនុស្សជំនាន់ក្រោយដែលមិនខុសពីតារាចម្រៀងជើងចាស់ក្នុងទសវត្សរ៍ទី៦០និង៧០ទេ ដែលពួកគាត់បានបន្សល់ទុកបទចម្រៀង ល្អៗសម្រាប់មនុស្សជំនាន់ក្រោយ ។ ដូច្នេះខ្ញុំស្នើអ្នកនិពន្ធបង្កើតស្នាដៃនិពន្ធថ្មីប្រកបដោយគុណភាព និងបរិមាណឲ្យកាន់តែច្រើនឡើង ។ ដោយសារបច្ចេកវិទ្យាមានការជឿនលឿនច្រើន ទើបបទចម្រៀងថ្មីកាន់តែមានសន្ទុះ និងធ្វើឲ្យអ្នកស្តាប់ចង់បានអ្វីដែលថ្មី ។ ខ្ញុំក៏ស្នើឲ្យអ្នកវិនិយោគលើផ្នែកផលិតបទចម្រៀង និងផ្នែក ផ្សេងៗទៀតជួយគាំទ្រលើកស្ទួយស្នាដៃសិល្បៈដែលជាស្នាដៃថ្មីកើតឡើងដោយកូនខ្មែរដើម្បីឲ្យមានស្ថិរភាពក្នុងការបង្កើតបទចម្រៀងថ្មី » ។
ថ្មីៗកន្លងមកលោកម៉ា ច័ន្ទបញ្ញាទើបមកពីប្រទេសឥណ្ឌូណេស៊ី ដើម្បីចូលរួមកម្មវិធី YES Academy ASEAN ដែលរៀបចំដោយស្ថានទូតអាមេរិក ។ លោកបញ្ញាត្រូវស្ថានទូតអាមេរិកជ្រើសរើសឲ្យទៅចូលរួមកម្មវិធីនោះក្នុងនាមជាតំណាងកម្ពុជា ក្នុងនាមជាអ្នកចម្រៀង និងនិពន្ធទំនុកច្រៀង។ម្ចាស់បទ «ម្ចាស់គ្រងសុបិនស្នេហ៍» លោកបញ្ញាឱ្យដឹងថា៖ កម្មវិធី YES Academy ASEAN គឺជាកម្មវិធីមួយ ដែលផ្ដោតសំខាន់ទៅលើសិល្បៈ ជាពិសេសគឺផ្ដោតទៅលើសិល្បៈតន្ត្រីតែម្ដង ។ កម្មវិធីសិល្បៈនេះរៀបចំដោយស្ថានទូតអាមេរិកក្នុងគោលបំណងឲ្យប្រទេសអាស៊ានទាំងអស់បានឈ្វេងយល់ និងសិក្សាពីសិល្បៈតន្ត្រីនៃបណ្ដាប្រទេសអាស៊ានទាំងមូល ។
លោកម៉ា ចន្ទ័បញ្ញា និយាយថា «ការចេញទៅលើកនេះខ្ញុំទទួលបានបទពិសោធន៍កាន់តែច្រើន សិក្សាបានច្រើនអំពីការតែងនិពន្ធ ក៏ដូចជាបង្ហាញនូវអ្វីដែលជាសិល្បៈរបស់កម្ពុជាទៅកាន់បរទេសឲ្យគេបានស្គាល់កាន់តែច្បាស់នូវភាពស្រស់ស្អាត និងរស់រវើករបស់សិល្បៈខ្មែរផងដែរ» ៕
ប្រភព៖ កោះសន្តិភាព
កំណត់ហេតុខ្មែរឡូត៖ ដោយឡែក ករណីមួយផ្សេងទៀត កាលពីលើកមុន អតីតបេក្ខជន ដែលធ្លាក់ចេញពីកម្មវិធី «Cambodian idol» សប្តាហ៍ទី៧ លោក អ៊ាម វន្នី មានដើមកំណើតពីខេត្ដបាត់ដំបងរូបនេះ បានបង្ហោះវីដេអូខ្លីមួយ បន្ទាប់ពីមានអត្ថបទព័ត៌មានចេញផ្សាយ រឿងពិធីករក្នុងប្រទេសថៃ និយាយទាក់ទងនឹង TheVoiceCambodia កាលពីមួយរយៈកន្លងទៅ។
នេះបើតាមវីដេអូ ដែលមានរយៈពេល ជាង៦នាទី បានបង្ហាញយ៉ាងច្បាស់ពី រូបភាពលោក អ៊ាម វន្នី ដែលអង្គុយនៅក្នុងរថយន្ដ ហើយធ្វើការរៀបរាប់ពីរឿងមួយចំនួន ក្រោយពីមានវេបសាយក្នុងស្រុកមួយ ចុះផ្សាយទាក់ទងនឹងប្រធានបទ ការយកបទថៃមកប្រលងក្នុងកម្មវិធី #TheVoiceCambodia ដែលធ្វើឲ្យប្រជាជនស្រុកគេ មានមោទនភាព ។
នៅក្នុងនោះ លោក អ៊ាម វន្នី បាននិយាយពី មូលហេតុមួយចំនួនដែលខ្លួនមិនចង់ច្រៀងបទ ចម្លងពីបរទេស ដូចជា កាលពីតីតកាលលោកធ្លាប់ ធ្វើជាពលករធ្វើការនៅក្នុងប្រទេសថៃ ហើយអ្នកស្រុកនៅទីនោះ តែងតែសួរគាត់ថា ហេតុអ្វីក៏ខ្មែរយកបទចម្រៀងរបស់ប្រទេសគេមកច្រៀង តើស្រុកខ្មែរមិនមានបទថ្មីទេ? ....... យ៉ាងណាមិញ ចង់ជ្រាបច្បាស់ សូមទស្សនាវីដេអូ ដែលដកស្រង់ចេញពីទំព័រហ្វេសប៊ុក លោក អ៊ាម វន្នី ផ្ទាល់៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
