(ភ្នំពេញ)៖ សេចក្តីរាយការណ៍ពីភ្នាក់ងារ Fresh News ដែលកំពុងចុះយកព័ត៌មានផ្ទាល់ នៅករណីអគ្គិភ័យឆេះ ផ្ទះប្រជាពលរដ្ឋ នៅសង្កាត់បឹងសាឡាង ខណ្ឌទួលគោក បានរាយការណ៍មកថា នៅពេលនេះអគ្គិភ័យ កំពុងបន្តឆាបឆេះ រាលដាលដល់ផ្ទះប្រជាពលរដ្ឋផ្សេងៗទៀត យ៉ាងសន្ធោសន្ធៅ សមត្ថកិច្ចនៅមិនទាន់ គ្រប់គ្រងបានទាំងស្រុងនោះទេ។
កម្លាំងសមត្ថកិច្ច និងរថយន្តពន្លត់អគ្គិភ័យប្រមាណ ១០គ្រឿង កំពុងជួយអន្តរាគមន៍៕
ប្រភព៖ Fresh News
កំណត់ហេតុខ្មែរឡូត៖
គួររំលឹកថា កាលពីម្សិលមិញនេះ ក៏មានករណីអស់ផ្ទះមួយខ្នង នៅឯខេត្ដបន្ទាយមានជ័យផងដែរ ដោយសារតែប្តីកំពុងបូមសាំងដាក់ដបទុកលក់ ប្រពន្ធមកដាំស្លរក្បែរ។
នេះបើតាមប្រភពបានឲ្យដឹងថា ផ្ទះលក់ចាប់ហ៊ួយរបស់ប្រជាពលរដ្ឋមួយគ្រួសារ តាមបណ្តោយផ្លូវជាតិលេខ៥ នៅមុខវត្តផ្សារកណ្តាល ភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ត្រូវបានអគ្គីភ័យឆាបឆេះយ៉ាងសន្ធោសន្ធៅ ដែលបណ្តាលមកពីផ្ទះធុងសាំងកាលពីម៉ោង១៨និង២០នាទីព្រលប់ថ្ងៃទី១១ ខែកញ្ញា ឆ្នាំ២០១៦នេះ។
លោក មាស ម៉េងហួង នាយប៉ុស្តិ៍នគរបាលរដ្ឋបាលសង្កាត់ផ្សារកណ្តាលបានឲ្យដឹងថា ករណីអគ្គីភ័យនេះគឺបណ្តាលមកពី ម្ចាស់ផ្ទះខ្លួន ឯងធ្វើឲ្យឆេះ មុនពេលកើតហេតុស្ត្រីជាប្រពន្ធបានដាំស្លក្នុងផ្ទះលក់ចាប់ហ៊ួយហ្នឹង បន្ទាប់មកស្រាប់តែប្តីបានប្រមូលដបសាំង មកបូម ពូប៊ីដុង ច្រកទុកសម្រាប់លក់ ពេលកំពុងបូមទើបតែបាន៣ដប ស្រាប់តែភ្លើងកន្លែងដាំស្លក្បែរនោះបានឆាបឆេះពេញទំហឹងតែម្តង បណ្តាលឲ្យខូចខាតឥវ៉ាន់គ្រប់ប្រភេទទាំងស្រុង តែសំណាងល្អមិនបណ្តាលឲ្យជនណាម្នាក់រងរបួសឬស្លាប់បាត់បង់ជីវិត។
ម្ចាស់ផ្ទះកើតហេតុមានឈ្មោះ តឿន នាង ភេទ ស្រី អាយុ ៣៦ ឆ្នាំ រស់នៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ មានមុខរបរជាអ្នកលក់ចាប់ហ៊ួយ ភេសជ្ជះគ្រប់ប្រភេទ និងលក់សាំង។ ភ្លាមនោះទាំងអ្នកស្រុក អាជ្ញាធរ កម្លាំងអាវុធហត្ថ នគរបាលក្រុងប៉ោយប៉ែត បានជួយពន្លត់ និងបានប្រើសប្រាស់អស់ទឹកមួយរថយន្តទើបភ្លើង រលត់ទៅវិញទាំងស្រុង៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
