(ភ្នំពេញ)៖ តារាសម្ដែងល្បី ប្រចាំក្នុងប្រទេសកម្ពុជា កញ្ញា ម៉ាក សែនសូនីតា បានថ្លែងឲ្យដឹងថា ក្នុងពេលដែលនាងចូលរួម សម្ដែងរឿង «ចន្ទ្រា» ដែលជាស្នាដៃទី២ របស់ផលិតកម្ម Angkor Picture នាងបានប្រឈមមុខនឹងគ្រោះជាច្រើន ព្រោះឈុតឆាកនីមួយៗ គឺពិបាកសម្ដែងខ្លាំង ហើយត្រូវសម្ដែងច្រើនដង និងស្ទើរតែផុតដង្ហើមម្ដងៗ ក៏មាន ជាពិសេសឈុតសម្ដែង ក្នុងទឹក។
ថ្លែងនៅក្នុងសន្និសីទបើកសម្ពោធ បញ្ចាំងរឿង «ចន្រ្ទា» នាល្ងាចថ្ងៃទី០៧ ខែកញ្ញា ឆ្នាំ២០១៦នេះ តារាសម្ដែងមានទីផ្សារខ្ពស់ និងមានសម្រស់គួរជាទីទាក់ទាញ កញ្ញា ម៉ាក សែនសូនីតា បានបញ្ជាក់ថា ឈុតឆាកដែលនាងត្រូវសម្ដែង ក្នុងរឿង «ចន្រ្ទា» គឺមានលក្ខណៈពិបាកៗច្រើន ជាពិសេសគឺត្រង់ឈុត ក្នុងទឹក និងនៅក្បែរជ្រោះជ្រៅ ជាដើម។ អ្វីដែលនាងចាំមិនភ្លេចនោះ គឺត្រង់ឈុតនាង ត្រូវគេចង់ដាក់ក្នុងទឹក ហើយនាងមិនចេះបើកភ្នែកក្នុងទឹកនោះទេ ទើបត្រូវសម្ដែងច្រើនដង ទម្រាំតែទទួលយកបាន។
ម៉ាក សែនសូនីតា និយាយថា «ពេលហ្នឹងគេចងខ្ញុំកុំឲ្យរើ ហើយទម្លាក់ចូលក្នុងទឹក ប៉ុន្តែខ្ញុំស្ទើរតែផុតដង្ហើម ទើបខំប្រឹងរើឡើងរលាត់ដៃ ..!។ អូយបង.!ឈុតនេះពិបាកទ្រាំមែនទែន ហើយអ្នកដឹកនាំសម្ដែង តម្រូវឲ្យខ្ញុំបើកភ្នែកក្នុងទឹក តែខ្ញុំមិនចេះបើក ទើបត្រូវថតច្រើនដង..ខ្ញុំត្រូវអត់ដកដង្ហើម ស្ទើរផុតម្ដងៗ..!»។
យ៉ាងណាមិញ ទោះបីជាមានឈុតឆាកលំបាកៗច្រើន ហើយត្រូវឆ្លងកាត់ព្រៃជ្រោះ ទាំងយប់ទាំងថ្ងៃ ប្រឈមនឹងគ្រោះថ្នាក់ក្ដី ក៏តារាសម្ដែង ម៉ាក សែនសូនីតា ហៅ តូតា បង្ហាញពីអារម្មណ៍រីករាយ និងសប្បាយចិត្ត ព្រោះនាងមិនស្មានថា រឿង«ចន្រ្ទា» ត្រូវទទួលបានជោគជ័យខ្លាំង ស្ទើរមិននឹកស្មានដល់ ពេលយកទៅដាក់បញ្ចាំងនៅក្នុងប្រទេសថៃ។ នាងប្រាប់ថា ខ្សែភាពយន្តនេះ ជារឿងលើកទី១សម្រាប់វត្តមានរបស់នាងសម្ដែង ហើយត្រូវបានយកទៅបញ្ចាំង នៅក្រៅប្រទេស។
បើតាមការសន្និដ្ឋានរបស់ ម៉ាក សែនសូនីតា បានបញ្ជាក់ថា រឿង«ចន្រ្ទា» មានលក្ខណៈបច្ចេកទេសតាមស្ដង់ដារ របស់ភាពយន្តបរទេស ទាំងសាច់រឿង ប្លង់ថត ការកាត់ត សំឡេង និងចំណុចពិសេសៗជាច្រើនទៀត ដែលអាចឲ្យអន្តរជាតិទទួលយកបាន ហើយនាងពិតជារំភើបណាស់ ដែលភាពយន្តខ្មែរ ត្រូវបានអន្តរជាតិ ចាប់អារម្មណ៍បែបនេះ៕
ប្រភព៖ Khmertalking
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា ខ្សែភាពយន្តខ្មែរនឹងចាក់បញ្ចាំងនៅប្រទេសថៃ ។ គួររំលឹកផងដែរថា តារាសម្តែងជើងចាស់ អ្នកនាងចន ច័ន្ទលក្ខិណា បានចេញដំណើរពីកម្ពុជា ទៅកាន់ប្រទេសថៃជាមួយនឹងផលិតករ និងសិល្បករមួយចំនួន ដើម្បីចេញទៅផ្សព្វផ្សាយខ្សែភាពយន្តខ្មែរ ដែលនឹងចាក់បញ្ចាំងនៅប្រទេសថៃ ។ អ្វីដែលភ្ញាក់ផ្អើល និងកោតសរសើរ គឺនាងបានបង្ហាញនូវសម្លៀកបំពាក់ ដែលច្នៃពីក្រមាខ្មែរ ឡើងលើឆាកក្នុងបទសម្ភាសន៍ ជាមួយនឹងស្ថានីយទូរទស្សន៍ប៉ុស្តិ៍ លេខ៧របស់ថៃ ។
តារាសម្តែងអ្នកនាងចន ច័ន្ទលក្ខិណា, កញ្ញាតូតា, លោកញ៉ែម សុគន្ធ, លោកយ៉ែម សំអូន, នាយក្រូច និងតារាសម្តែងមួយចំនួនទៀត បានចាកចេញពីកម្ពុជា ជាមួយនឹងផលិតករនៃផលិតកម្ម Angkor Picture កាលពីថ្ងៃទី៤ កញ្ញា កន្លងទៅនេះ ដើម្បីផ្សព្វផ្សាយ និងសម្ពោធខ្សែភាពយន្តខ្នាតធំរបស់ខ្មែរគឺរឿង «ចន្ទ្រា» នៅព្រះរាជាណាចក្រថៃ ។
វត្តមានបង្ហាញក្នុងបទសម្ភាសន៍ពិសេស តារាសម្តែងចន ច័ន្ទលក្ខិណា បានគ្រងសម្លៀកបំពាក់ជារ៉ូប ដែលច្នៃដោយផាមួង និងក្រមាខ្មែរ ដែលធ្វើឲ្យអ្នកទស្សនាមានការចាប់អារម្មណ៍ជាខ្លាំង ហើយវាបានឆ្លុះបញ្ចាំងពីអត្តសញ្ញាណនៃការច្នៃសម្លៀកបំពាក់របស់ខ្មែរផងដែរ ។
សំលៀកបំពាក់ស្រដៀងគ្នានេះ ត្រូវបានគេឃើញតារាសម្តែងកញ្ញាមាន សូនីតា តែស្លៀកពាក់ជាញឹក ក្នុងគោលបំណងលើកកម្ពស់តម្លៃក្រមា ដ៏ដូចជាសំលៀកបំពាក់ខ្មែរ ពិសេសបានផ្តល់ឱកាសការងារ ដល់ប្រជាពលរដ្ឋខ្មែរ ដែលប្រកបរបរត្បាញហូង ផាមួង និងក្រមាខ្មែរផងដែរ ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
