រាជធានីភ្នំពេញ ៖ គ្មានអ្នកណាដឹងសោះឡើយថា លោកប៉ែន ចំរ៉ុង ដែលដាច់ដោចគ្នាជាមួយនាងភិន សុដាលីស បានងាកទៅរកសង្សារចាស់ ដែលជានារីនៅអាមេរិកម្នាក់ ខណៈដែលធ្លាប់តោះតើយបោះបង់គ្នាជាច្រើនឆ្នាំមកនោះ ។ ម្ល៉ោះហើយ ទើបព័ត៌មានមួយនេះ ក្លាយជាការចាប់អារម្មណ៍ ព្រោះតែប៉ែន ចំរ៉ុង បែរជាសុខៗប្តូរពីគូស្នេហ៍ក្នុងស្រុក រកនារីអតីគូស្នេហ៍ឡើងវិញសោះឡើយ។
តារាសម្ដែង និងជាពិធីករលោកប៉ែន ចំរ៉ុង ដែលបានសម្រេចចិត្តបោះបង់ភរិយា គឺនាងភិន សុដាលីស ចោល ហើយងាកទៅរកអតីតសង្សារចាស់ គឺអ្នកនាងថាច់ ផល្លា អាណិកជននៅអាមេរិកវិញ ។ ក្រោយពីត្រូវរ៉ូវគ្នាវិញ អាណិកជនរូបនេះ បានត្រៀមសំបុត្រយន្តហោះស្កាត់មកជួបលោកប៉ែន ចំរ៉ុង ជាថ្មីក្នុងពេលឆាប់ៗនេះ ។
អ្នកនាងថាច់ ផល្លា អាយុ៣៥ឆ្នាំ ដែលអ្នកក្នុងចង្កោមសិល្បៈដឹងថា ជាអតីតគូស្នេហ៍លោក ប៉ែន ចំរ៉ុង អស់រយៈពេលជាច្រើនឆ្នាំ មុនពេលចាប់ផ្តើមស្នេហ៍តារាសម្តែង ភិន សុដាលីស ។ នាងបានចេញទៅរស់នៅប្រទេសអាមេរិក២៣ឆ្នាំហើយ ។ អ្នកនាងឧស្សាហ៍ឡើងចុះស្រុកខ្មែរញឹកញាប់ ដោយសារតែនាងក៏ជាតារាសិល្បៈមួយរូប ដែលបានចុះមកថតកុននៅកម្ពុជាកន្លងមក។
អ្នកនាងសម្ដែងរឿងលើកដំបូងនៅកម្ពុជា ក្រោមចំណងជើងថា «សុំកើតជាកូនភ្លោះបី» និងបានសម្ដែងជាតួឯកក្នុងរឿងទី២ក្នុងរឿង «ឈាមស្រែកស្បែកហៅ» ជាដើម ។ កន្លងមក អាណិកជនរស់នៅសហរដ្ឋអាមេរិកកញ្ញា ថាច់ ផល្លា បានខូចចិត្តស្អិតទ្រូងរីងរៃមិនតិចទេ ក្រោយពីសង្សាបណ្តូលចិត្តគឺលោក ប៉ែន ចំរ៉ុង បានដាច់ចិត្តបោះបង់ចោលរូបនាងទៅស្រលាញ់ ភិន សុដាលីស ហើយនាងថែមទាំងជិះយន្តហោះមកស្រុកខ្មែរផ្ទាល់ ដើម្បីទាមទារលុយដែល ប៉ែន ចំរ៉ុងជំពាក់គ្រានៅត្រូវរ៉ូវគ្នានោះ ។ ប៉ុន្តែរងើកភ្លើងស្នេហ៍ដែលរលត់នេះបានឆាប់ឆេះជាថ្មីក្រោយពី ប៉ែន ចំរ៉ុងលែងលះភារិយាជាផ្លូវការ ហើយ ប៉ែន ចំរ៉ុង ព្យាយាមប្រើប្រាស់សម្តីផ្អែម ក្នុងន័យផ្សះផ្សារចំណងស្នេហ៍នេះឡើងវិញ ។
ប្រភពពីអ្នកសិល្បៈដែលស្និទ្ធនឹងពួកគេទាំងពីរបញ្ជាក់ថា គ្រា ប៉ែន ចំរ៉ុង និងសង្សារចាស់ឈ្លោះគ្នា គឺពួកគេបាន Block Facebook គ្នាចោលទាំងអស់ ប៉ុន្តែនៅសល់ Skype មួយ ទើបជាហេតុធ្វើឲ្យលោក ប៉ែន ចំរ៉ុង មានឱកាសសួរនាំ និងរៀបរាប់ពីស្ថានភាពស្នេហារបស់ខ្លួន និង ភិន សុដាលីស ក្នុងពេលរង្គោះរង្គើ។
គាប់ជួនជាក្នុងពេលនោះអ្នកនាង ផល្លា ដែលបាក់ចិត្តស្រឡាញ់លោក ហេង ស៊ីមន ជាតួជំនួស ស្រាប់តែមានរឿងអន់ចិត្តគ្នា ហើយរង្គោះរង្គើទំនាក់ទំនងផង ទើបបណ្ដាលឲ្យអតីតគូស្នេហ៍ទាំងពីរត្រលប់មកត្រូវរ៉ូវគ្នាវិញ ។
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា រឿងរ៉ាវបណ្ដឹងលែងលះដ៏គួរឲ្យភ្ញាក់ផ្អើល និងក្លាយជារឿងដ៏សើប ចង់ដឹងពីសំណាក់មហាជនទូទៅ ចំពោះជម្លោះប្ដីប្រពន្ធរវាងតារាសម្ដែង ប៉ែន ចំរ៉ុង និងនាង ភិន សុដាលីស នៅល្ងាចថ្ងៃទី២០ ខែកក្កដា នេះ ត្រូវបានចៅក្រមសាលាដំបូងសម្រេចចេញសាលក្រមលែងលះជាផ្លូវការរបស់ពួកគេ ទាំងពីរជាស្ថាពរហើយ បន្ទាប់ពីធ្វើការសម្រុះសម្រួលជាច្រើនលើកច្រើនសារ មិនទទួលបានលទ្ធផលរួចមក។
អ្នកនាំពាក្យសាលាដំបូងរាជធានីភ្នំពេញ លោក អ៉ី រិន បានបង្ហើបប្រាប់ Fresh News និង Khmertalking នៅមុននេះបន្តិចថា សវនការក្នុងសំណុំ រឿងបណ្ដឹងលែងលះភរិយា របស់តារាសម្ដែង លោក ប៉ែន ចំរ៉ុង ត្រូវបានបញ្ចប់រួចរាល់នៅថ្ងៃនេះហើយ ប៉ុន្តែជុំវិញខ្លឹមសារលំអិតនៃសាលក្រមក្នុងរឿងនេះ លោកសុំមិនធ្វើអត្ថាធិប្បាយឲ្យច្រើនបានទេ ព្រោះទាក់ទៅនឹងសិទ្ធិបុគ្គល។ ជាមួយគ្នានេះសវនការក៏ត្រូវធ្វើឡើងក្នុងបន្ទប់របស់លោកចៅក្រមដែរ ពោលមិនបានធ្វើឡើងក្នុងបន្ទប់កាត់ក្ដី ជាសាធារណៈនោះទេ។
យ៉ាងណាមិញ ទោះបីជាមន្រ្តីតុលាការ មិនបានបកស្រាយលំអិត ស្ដីពីសាលក្រមនេះ ព្រោះជាសិទ្ធិបុគ្គល និងជាសំណុំរឿងរដ្ឋបវេណីក្ដី ប៉ុន្តែបើតាមប្រភពពីអ្នកដែលជិតស្និទ្ធនឹងតារាសម្ដែង ភិន សុដាលីស បានទម្លាយថា លោក ប៉ែន ចំរ៉ុង ដែលជាប្ដីហេងស៊យចង់ផ្គត់ផ្គង់ និងផ្ដល់អាហារកិច្ចដល់កូនក្នុងផ្ទៃរបស់ ភិន សុដាលីស ពេលកូននេះប្រសូត្រមក ប៉ុន្តែ ភិន សុដាលីស បានបដិសេធមិនទទួលយកអាហារកិច្ចពីលោក ប៉ែន ចំរ៉ុង នោះឡើយ។
សូមបញ្ជាក់ថា តារាសម្តែងប្រុសលោក ប៉ែន ចំរ៉ុង បានសម្រេចចិត្តដាក់ពាក្យបណ្តឹង ប្តឹងសុំលែងលះភរិយាអ្នកនាង ភិន សុដាលីស ចាប់តាំងពីអំឡុងពេលមុនពិធីបុណ្យចូលឆ្នាំខ្មែរ ក្រោមហេតុផលថា រស់នៅមិនចុះសម្រុងជាមួយគ្នា បន្ទាប់ពីធ្លាប់ឆ្លងកាត់ការរស់នៅកម្សត់កម្រ អស់រយៈពេល ប្រមាណ១ឆ្នាំ រហូតឈានដល់សាងដំណក់ឈាមរួមគ្នា មានកូនក្នុងផ្ទៃជាង៧ខែមកហើយនោះ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]