(ភ្នំពេញ)៖ តារាសម្តែង និងកំប្លែងជើងចាស់ ដែលកំពុងមានជំងឺស្ពាយជាប់ខ្លួន រស់នៅដោយកំសត់ តែលតោលម្នាក់ឯង លោកយាយ ណយ សំណាង កាលពីថ្ងៃទី០៥ ខែកញ្ញា ឆ្នាំ២០១៦ម្សិលមិញនេះ ស្រាប់អាការៈជំងឺបេះដូង បានផ្តើមធ្វើទុក្ខជាថ្មី ខណៈកំពុងតថសម្តែងខ្សែភាពយន្ត បង្កការភ្ញាក់ផ្អើល ដល់តារាសម្តែងផ្សេងៗទៀត នាំគ្នារត់ខ្វែងដៃខ្វែងជើង ដើម្បីជួយសង្គ្រោះគាត់យកទៅកាន់មន្ទីរពេទ្យ។
តាមការបញ្ជាក់ នៅលើបណ្តាញសង្គមហ្វេសប៊ុក របស់តារាសម្តែងប្រុសល្បីឈ្មោះ និងលេចធ្លោលើសកម្មភាពមនុស្សធម៌ លោក សាវិន ហ្វីលីព បានបញ្ជាក់ថា «ម្សិលមិញជួយយាយ ណាង ពេលបេះដូងគាត់ធ្វើទុក្ខខ្លាំង ថប់ដង្ហើមបាត់មាត់ បាត់ក ពេលកំពុងថត ជាមួយខ្ញុំ។ អាណិតគាត់ណាស់ ម៉ែយើងម៉ែគេ គាត់អាយុ៧៣ឆ្នាំហើយ នៅមកខំថត ដើម្បីកម្រៃចិញ្ចឹមជីវិតចុងក្រោយទៀត!»។
តារាសម្តែងលោក សាវិន ហ្វីលីព បានបន្ថែមថា «ជូនពរឲ្យម៉ែ ណយ សំណាង ឆាប់ជា និងមានអាយុយឺនយូរ។ សូមសមាគមសិល្បៈ និងសប្បុរសជនក្នុងនិងក្រៅប្រទេស មេត្តាជួយបរិច្ចាគថវិកាខ្លះៗ ជួយដល់គាត់យកបុណ្យផង សុខភាពគាត់យ៉ាប់ខ្លាំងណាស់ បើលោកអ្នកបានឃើញញផ្ទាល់ភ្នែក ដូចខ្ញុំ!»។
សូមបញ្ជាក់ថា តារាពហុជំនាញ លោកយាយ ណយ សំណាង បច្ចុប្បន្ននៅក្នុងខ្លួនគាត់ គឺកំពុងពោពេញការញាំញី ដោយជំងឺជាច្រើនមុខ ដូចជា៖ លើសឈាម ខ្វះជាតិស្ករ ខ្សោយបេះដូង ហើយមិនតែប៉ុណ្ណោះ យាយ ណាង នៅប្រឹងសម្តែងទាំងដង្ហើម ត្រដរខ្យល់ ព្រោះដើម្បីជីវិតរស់ចុងក្រោយ។ ខ្សែជីវិតរបស់យាយ ណយ សំណាង ពេលនេះត្រូវបានគេកត់សម្គាល់ថា កាន់តែកម្សត់ជីវភាព រស់នៅប្រចាំថ្ងៃ ក៏កាន់តែធ្លាក់ដុនដាប់ វេចបង្វេចដើរជួលតែផ្ទះគេ ជ្រកកោនហើយរហូតធ្លាក់ខ្លួន ទៅរស់នៅវត្តទៀតផង។
នេះដូចពាក្យគេថា សំណាងតែឈ្មោះ ពីរោះទាំងសំឡេង និងមានសមត្ថភាព កំប្លែង ច្រៀងអាយ៉ៃ មហោរី និងថែមទាំងមានងារពីប្រជាប្រិយភាព លើវិថីសិល្បៈតារាជើងចាស់ ពហុជំនាញទៀត តែវាសនាចារមិនដូចឈ្មោះនោះឡើយ ពិតជាអាណិតលោកយាយណាស់៕
ប្រភព៖ Khmertalking
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា ឌីជេ ឧត្តម ក្មួយប្រុសបង្កើតតារាកំប្លែងយាយ ណយ សំណាង ទទួលមរណភាព បន្ទាប់ពីជួបគ្រោះថ្នាក់ចរាចរណ៍មួយថ្ងៃ ។ គួររំលឹកផងដែរថា ប្រភពព័ត៌មានពីផេសសិល្បករកម្ពុជា របស់តារាសម្តែង លោក អ៉ឹម ជីវ៉ា បានសរសេរបង្ហោះកាលពី៣ម៉ោងមុននេះថា «Dj UD ហៅឧត្តម បានរងគ្រោះថ្នាក់ចរាចរណ៍ កាលពីពីយប់ថ្ងៃទី ០៩ខែ សីហា ឆ្នាំ២០១៦ នៅផ្លូវមុនីវង្សទល់មុខក្លិបកម្សាន្តរ៉ុក ដោយ Dj រូបនេះជិះម៉ូតូ បុកជាមួយឡានភ្លាមៗនោះ ក៏មានរថយន្តយកទៅសង្រ្គោះបន្ទាន់ រហូតដល់ថ្ងៃទី១១ខែសីហា វេលារម៉ោង៥រសៀល ម្សិលមិញនេះ ដោយស្ថានភាពជំងឺធ្ងន់ធ្ងរពេក ធ្វើឲ្យជនរងគ្រោះស្លាប់បាត់បង់ជីវិតតែម្តង។ រីឯសពកំពុងដំកល់ធ្វើបុណ្យ នៅវត្តទួលទំពូង បូជានៅថ្ងៃទី១២ វេលារម៉ោង៧យប់ នៅវត្តទួលទំពូង!»។
ប្រភពបានបន្តថា «ដោយឡែកសំរាប់តារាកំប្លែងលោកយាយ ណយ សំណាង វិញកំពុងធ្លាក់ខ្លួនឈឺផងដែរ ស្របពេលដែលក្មួយដែលខំចិញ្ចឹម តាំងពីតូចដូចជាកូនបង្កើត បានទទួលមរណៈភាព។ លោកយាយ ណយ សំណាង ធ្លាក់ខ្លួនឈឺជិតមួយខែហើយ ដោយជំងឺបេះដូង និងវ័យចាស់ជរា។ កន្លងមកលោកយាយ ណយ សំណាង មិនបានថត ឬសម្តែងតាមកម្មវិធីទូរទស្សន៍ ដោយសារតែបញ្ហាជំងឺនេះឯង»។
ផេសសិល្បករកម្ពុជា របស់តារាសម្តែងលោក អ៉ឹម ជីវ៉ាបានលើកឡើងទៀតថា «តារាចម្រៀងល្បីលោក វណ្ណា ស័ក្ក ដែលត្រូវជាកូនបង្កើត លោកយាយ ណាង ជាអ្នកគ្រប់គ្រងរ៉ាប់រង ជីវភាពគ្រួសារទាំងអស់។ សូមបងប្អូនសិល្បករ-សិល្បការិនី និង សប្បុរសជនទាំងអស់ មេត្តាចូលរួមពិធីបុណ្យសព Dj ឧត្តម ដែលត្រូវជាក្មួយបង្កើត លោកយាយ ណាង ដោយក្តីអនុគ្រោះផង!»។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
