រាជធានីភ្នំពេញ ៖ បេក្ខនារី The Vioce រដូវកាលទី២ នាងសាន ស្រីឡៃ បានបញ្ចេញបទចម្រៀងលើកដំបូងរបស់ខ្លួនក្នុងផលិតកម្មរស្មីហង្សមាស ។ បទចម្រៀងរបស់សាន ស្រីឡៃ មានចំណងជើងថា «នឹកគេស្ទើរស្លាប់ខ្លួនហើយ»និពន្ធបទភ្លេងដោយលោកមាស សុគន្ធ និងនិពន្ធទំនុកច្រៀងដោយលោកទ្រី សក្កដា ។
តាមរយៈបទចម្រៀងដំបូងនេះសាន ស្រីឡៃ រំពឹងទទួលបានការគាំទ្រ ខណៈពេលដែលបេក្ខជនជាប់ជ័យលាភីផ្សេងទៀតក៏បានចេញបទចម្រៀងរបស់ខ្លួនដែរ ។
សាន ស្រីឡៃ បានបញ្ចេញសារលើហ្វេសប៊ុកកាលពីពេល ថ្មីៗកន្លងមកថា «មិនដឹងយ៉ាងណាទេ សាន ស្រីឡៃអើយ តែយ៉ាងណាក្តីនាងខ្ញុំសូមអរគុណសម្រាប់ការគាំទ្ររបស់ពុកម៉ែបងប្អូន និង មិត្ដៗជាទីស្រឡាញ់ទាំងអស់គ្នា ។ អរគុណដែលអ្នកទាំងអស់គ្នាធ្វើឱ្យខ្ញុំមានថ្ងៃនេះ ហើយពិសេសនោះគឺសូមអគុណដល់គ្រូរបស់ខ្ញុំ គឺបងស្រីពេជ្រ សោភា គឺគាត់តែម្នាក់ដែលបានផ្ដល់ភាពខ្វះខាតដែលខ្ញុំមាន គាត់ព្យាយាមធ្វើឱ្យក្មេងល្ងង់ម្នាក់នេះឱ្យស្គាល់អ្វីដែលហៅថា «សិល្បៈ» ។ ខ្ញុំនឹងធ្វើតាមដំបូន្មានមានរបស់បងរហូតទៅ អរគុណខ្លាំងណាស់បើគ្មានការស្រឡាញ់ពី បងៗទាំងអស់នោះ ម្លេ៉ះពេលនេះក្ដីបំណងសាន ស្រីឡៃ មិនដឹងថាយ៉ាងម៉េចឡើយ ។ ខ្ញុំមានបទផ្ទាល់ខ្លួន ហើយសង្ឃឹមថាពុកម៉ែបងប្អូន និង មិត្ដៗ ស្រឡាញ់គាំទ្រទាំងអស់គ្នា អរគុណច្រើន ។
ថ្ងៃនេះនាងខ្ញុំសុំអរគុណដល់មនុស្សស្រី២នាក់ ជាពិសេសអស់ពីបេះដូង ទីមួយសុំអរគុណដល់អ្នកម្តាយរបស់ខ្ញុំដែលតែងតែលើកទឹកចិត្តកូនស្រីម្នាក់នេះ និងជាកម្លាំងចិត្តដល់កូនមកដល់ពេលនេះ ។ ទោះបីកូនអ្នកស្រែ កូនគ្មានសាច់ញាតិជាអ្នកសិល្បៈ ទោះបីជាកូនធ្លាប់ចុះចាញ់វារាប់រយដង តែអ្នកម៉ែនៅតែលើកទឹកចិត្តកូនឱ្យដើរទៅមុខរហូតកូនមានបទចម្រៀងសម្រាប់ខ្លួនឯងក្នុងឆាកជីវិត ។ ម៉ែដឹងទេ ក្មេងស្រីតូចម្នាក់ដែលធ្លាប់តែច្រៀងឱ្យម៉ែស្តាប់ពេលនេះបានក្លាយជាអ្នកចម្រៀងពិតប្រាកដ ហើយកូនសន្យាថា កូនមិនចោលម៉ែឱ្យពិបាកឡើយ ។ ម៉ែគឺជាអ្វីគ្រប់បែបសព្វយ៉ាងរបស់កូន ។
ទីពីរចង់អរគុណដល់បងភា បើគ្មានមួយកៅអីពីបងភានៅវគ្គ Blind Audition ទេប្រហែលខ្ញុំក៏មិនមានថ្ងៃនេះដែរ បងភាគឺជាអ្នកមានគុណធំធេងណាស់ក្នុងមួយឆាកជីវិតរបស់ខ្ញុំ ។ ខ្ញុំនឹងចងចាំអំពើល្អ និងការជួយសព្វបែបសព្វយ៉ាងពីបងមកលើនាងខ្ញុំ ។ បងភាជាមនុស្សស្រីម្នាក់ដែលកម្រនឹងមាននៅលើលោកនេះ ទឹកចិត្តដ៏ប្រពៃរបស់បងភា តារាស្រីមួយចំនួនមិនមានឡើយ ។ ខ្ញុំអរគុណព្រះជាម្ចាស់ដែលធ្វើឱ្យខ្ញុំស្គាល់បងភា គុណដ៏ធំធេងមួយនេះខ្ញុំនឹងតបស្នងដល់បងភានៅថ្ងៃណាមួយប្រសិនបើខ្ញុំមានឱកាស»៕
ប្រភព៖ កោះសន្តិភាព
កំណត់ហេតុខ្មែរឡូត៖ ដោយឡែក រំលឹកពត័មានចាស់ កាលពីលើកមុនផងដែរថា តារាចម្រៀង និងគ្រូបង្វឹក (Coach)ក្នុងកម្មវិធី «The Voice Cambodia» អ្នកនាង ពេជ្រ សោភា ត្រូវបានគេកត់សម្គាល់ឃើញថា នាងហាក់មានយីអ៊ុនខ្ពស់ឡើងវិញ បន្ទាប់ពីបទចម្រៀង Original Song ជាច្រើនត្រូវបានផលិតចេញលក់ នៅលើទីផ្សារចម្រៀង ពិសេសគឺតាមរយៈ «បទរាំញីកែវជើង»។ មិនតែប៉ុណ្ណោះអ្នកនាង ពេជ្រ សោភា ក៏ក្លាយជាគ្រូបង្វឹក (Coach) របស់កម្មវិធី «The Voice Cambodia» រដូវកាលទី២ដែលរៀបចំ ដោយស្ថានីយទូរទស្សន៍ ហង្សមាស ផងដែរ។
ដ្បិតតែយ៉ាងនេះក៏ពិតមែន តែចំពោះអ្នកនាង ពេជ្រ សោភា ត្រូវបានមហាជន អ្នកគាំទ្រជាច្រើនមើលឃើញថា នាងជាគូ្របង្វឹកដែលមានសមត្ថភាព ក្នុងការជ្រើសរើសត្រូវជាមួយបេក្ខជន ប្រឡងនៅក្នុងកម្មវិធី «The Voice Cambodia» ខណៈដែលមានមិត្តក្នុងហ្វេសប៊ុកមួយចំនួនធំ ក៏បានយល់ឃើញដូចគ្នានេះដែរ។ ម្យ៉ាងទៀត ពេជ្រ សោភា ក៏ត្រូវបានគេលើកសរសើរ ពីទង្វើល្អៗជាមួយបេក្ខជន និងបេក្ខនារីជាកូនក្រុម ផងដែរ។
ប្រភពពីអ្នកនិយមលេងបណ្តាញ សង្គមហ្វេសប៊ុកបានលើកឡើងថា «ខ្ញុំសូមសរសើរបងភា ជាមនុស្សមានទឹកចិត្តចេះជួយទុក្ខធុរៈដល់កូនក្រុម គាត់ដោយបានឲ្យ ស្រីឡៃ ស្លៀករ៉ូបរបស់គាត់ ព្រោះគាត់មិនចង់ឲ្យ ស្រីឡៃ ចំណាយច្រើនទៅលើសម្លៀកបំពាក់ មកប្រឡងចង់ឲ្យទុកលុយទៅព្យាបាលម្តាយ ។ មិនមែនតែ ស្រីឡៃ ម្នាក់ទេ ដែលបងភា ជួយតាំងពី The voice season 1 បងភាតែងតែជួយដល់កូនក្រុម»។
តារាចម្រៀងស្រីថ្គាមខ្លា អ្នកនាង ពេជ្រ សោភា បានអង្គុយលើកៅអី «The Voice Cambodia» រដូវកាលទី២ក្នុងចំណោមតារារួមដំបូល មានដូចជាកញ្ញា ឱក សុគន្ធកញ្ញា, លោក ឆន សុវណ្ណរាជ និងលោក ណុប បាយ៉ារិទ្ធ។ គ្រូបង្វឹករូបនេះ មិនខុសពីគ្រូបង្វឹក៣នាក់ផ្សេងទៀតដែរ គឺមានតួនាទីក្នុងការជ្រើសរើសបង្ហាត់បង្រៀន និង ណែនាំដល់កូនក្រុម ដើម្បីយកទៅប្រឡងចម្រាញ់ យកអ្នកខ្លាំងពិតក្នុងចំណោម បេក្ខជន-បេក្ខនារី ៣ឬ៤នាក់ចុងក្រោយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]