(ភ្នំពេញ)៖ ក្រុមបាល់ទាត់ជម្រើសជាតិកម្ពុជា បានប្រកួតចាញ់ក្រុមម្ចាស់ផ្ទះហុងកុង ដោយលទ្ធផល ៤-២ នៅក្នុងជំនួបមិត្តភាពអន្ដរជាតិទើបបញ្ចប់មុននេះបន្ដិច នៅកីឡដ្ឋាន Mong Kok នៃទីក្រុងហុងកុង ហើយនេះក៏ជាលើកទី៥ ដែរ ដែលកម្ពុជាបរាជ័យក្រោមថ្វីជើងក្រុមហុងកុង ក្នុងចំណោមលទ្ធផលធ្លាប់ជួបគ្នា ៦ប្រកួតទាំងលើកនេះ ដោយក្រុមគោព្រៃកម្ពុជា ធ្លាប់ឈ្នះម្ដងគត់ដោយលទ្ធផល ២-១ ក្នុងជំនួបពានរង្វាន់ AFC Asain Cup កាលពីឆ្នាំ១៩៧២ ។

ជំនួបមិត្តភាពនេះ ក្រុមម្ចាស់ផ្ទះហុងកុង បានបើកឆាកនាំមុខ ១គ្រាប់មុនត្រឹមនាទី១១ ដែលធ្វើសម្រេចដោយកីឡាករ Jaimaes Mckeo មុននឹងខ្សែបម្រើវ័យក្មេងកម្ពុជា ច្រឹង ពលរដ្ឋ វាយបកតាមស្មើ ១-១ នៅនាទី២០ ។ បន្ទាប់មកទើបហុងកុងបានបន្ថែម ២គ្រាប់ទៀតមុនបញ្ចប់តង់ទី១ ដែលធ្វើសម្រេចដោយកីឡាករ Itaparica នៅនាទី៣១ និងកីឡាករ Alessandro ធ្វើសម្រេចគ្រាប់ទី៣ ដោយការទាត់បាល់ពិន័យ ១១ម៉ែត្រនៅនាទី៤២ ក្រោយកីឡាករ ច្រឹង ពលរដ្ឋ បង្កកំហុសក្នុងតំបន់គ្រោះថ្នាក់ ។

ឈានចូលតង់ទី២ ថ្វីត្បិតកីឡាករក្រុមភ្ញៀវកម្ពុជាមានមាឌតូចជាក្រុមហុងកុងក៏ពិតមែន រហូតតាមបាន ១គ្រាប់វិញ ដែលតែតបញ្ចូលទីដោយកីឡាករ ចាន់ វឌ្ឍនាកា នៅនាទីទី៦១ បន្ទាប់ពីទទួលបានបាល់ពីកីឡាករ ប្រាក់ មុន្នីឧត្តម ។ ប៉ុន្ដែគួរឲ្យសោកស្ដាយឈានដល់នាទីទី៨៦ កីឡាករហុងកុង Kwan Yee បានបន្ថែម ១គ្រាប់ទៀត ដែលជាគ្រាប់ចុងក្រោយធ្វើឲ្យហុងកុង យកឈ្នះក្រុមគោព្រៃកម្ពុជា ៤-២ តែម្ដង ។

គួរបញ្ជាក់ថា នេះគឺជាការប្រកួតដកស្រង់បទពិសោធន៍របស់ក្រុមជម្រើសជាតិកម្ពុជា ដើម្បីត្រៀមធ្វើម្ចាស់ផ្ទះវគ្គជម្រុះពានរង្វាន់ AFF Suzuki Cup 2016 នៅពាក់កណ្ដាលខែតុលាខាងមុខនេះ ដោយត្រូវប្រជែងកៅអីជុំបន្ដជាមួយក្រុមជម្រើសជាតិឡាវ ប្រ៊ុយណេ និងក្រុមជម្រើសជាតិទីម័រខាងកើត ៕ 

ប្រភព៖ freshnews

កំណត់ហេតុខ្មែរឡូត៖

ដោយឡែក រំលឹកព័ត៌មានចាស់លើកមុនផងដែរថា ក្នុងក្របខ័ណ្ឌបាល់ទាត់ បាន ដណ្តើមពានរង្វាន់ ស្តេចប្រុយណេ Hassanal Bolkiah ពូល B ក្រុមជម្រើសជាតិ ក្រោយអាយុ ២១ ឆ្នាំ របស់កម្ពុជា បានបំបាត់ U21 សឹង្ហបុរី ដោយលទ្ធផល ៣ទល់នឹង១ មិនគួរអោយជឿ។

ក្រោយការដឹកនាំ របស់គ្រូបង្វឹក សញ្ជាតិកូរ៉េខាងត្បូង ក្រុម U21 របស់កម្ពុជា បានបើកការនាំមុខ ដោយថ្វីជើង របស់ កីឡាករ ចាន់ វឌ្ឍនាកា នៅនាទីទី ២២ បន្ទាប់មកកីឡាករ ណុប តុលា បន្តស៊ុតបញ្ចូលទី គ្រាប់បាល់ទីពីរ នៅនាទីទី ៣៧ ខណៈជិតចប់តង់ទីមួយ នៅនាទីទី ៤២ កីឡាករ ឩត្តម របស់កម្ពុជា បន្ថែមមួយគ្រាប់ទៀត ជួយអោយ U21 កម្ពុជា នាំមុខ U21 សឹង្ហបុរី ៣ទល់នឹង០ នៅតង់ទីមួយ។ ទោះជាយ៉ាងណាក៏ដោយ ក្រុម U21 របស់សឹង្ហបុរី ក៏បានវាយបកបានមួយគ្រាប់មកវិញ ដោយកីឡាករ Muhd Zakir Samsudin នៅនាទីទី ៥៥ ផងដែរ។ 

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]