ខេត្តកំពត ៖ បុរសជាកម្មកររោងចក្រស៊ីម៉ងត៍ម្នាក់ត្រូវបានកម្លាំងនគរបាលប៉ុស្តិ៍រដ្ឋបាលឃុំកណ្តោលសហការជាមួយកម្លាំងនគរបាលអធិការដ្ឋាននគរបាលស្រុកទឹកឈូ ចាប់ឃាត់ខ្លួនកាលពីវេលាម៉ោង១០ព្រឹក ថ្ងៃទី២៧ ខែសីហា ឆ្នាំ២០១៦នេះ បន្ទាប់ពីសមត្ថកិច្ចទទួលពាក្យបណ្តឹងពីក្រុមគ្រួសារក្មេងស្រីរងគ្រោះប្តឹងចោទប្រកាន់ថា បានធ្វើសកម្មភាពចាប់រំលោភរហូតបានសម្រេច ។
សមត្ថកិច្ចនគរបាលប៉ុស្តិ៍រដ្ឋបាលឃុំកណ្តោលបានឲ្យដឹងថា ជនសង្ស័យឈ្មោះ សិត សារ៉េន ភេទប្រុស អាយុ២៧ឆ្នាំ មានមុខរបរជាកម្មកររោងចក្រស៊ីម៉ងត៍ ចក្រីទីងកំពត មានទីលំនៅភូមិទឹកក្រហម ឃុំកណ្តោល ស្រុកទឹកឈូ ខេត្តកំពត ចំណែកក្មេងស្រីរងគ្រោះទើបតែមានអាយុ១៥ឆ្នាំ ជាសិស្ស មានទីលំនៅក្នុងស្រុកទឹកឈូ ។
លោកវរៈសេនីយ៍ត្រី ណុប ចាន់ភាព អធិការរងស្រុកទឹកឈូ បានឲ្យដឹងថា កាលពីវេលាម៉ោង៨ព្រឹក ថ្ងៃទី២៦ ខែសីហា ឆ្នាំ២០១៦ ក្មេងស្រីរងគ្រោះបានជិះកង់យកបាយម្ហូបទៅឲ្យឪពុករបស់នាងនៅឯចម្ការឆ្ងាយពីផ្ទះ ខណៈកំពុងជិះកង់តាមផ្លូវស្រាប់តែជនសង្ស័យចេញមកផ្លូវឲ្យឈប់កង់រួចចាប់អូសដៃចូលទៅក្នុងព្រៃជើងភ្នំគីឡូដួល ស្ថិតក្នុងភូមិមានរិទ្ធ ឃុំកណ្ដាល រួចអូសចូលទៅចំការចម្ងាយប្រមាណជា២០ម៉ែត្រចាប់រំលោភរហូតបាសំរេច ព្រមទាំងគំរាមសម្លាប់ទៀត ។
លោកវរៈសេនីយ៍ត្រី ណុប ចាន់ភាព បន្តឲ្យទៀតថា ក្រោយពីបានទទួលបានពាក្យបណ្តឹង នៅព្រឹកថ្ងៃទី២៧សីហា កម្លាំងសមត្ថកិច្ចបានចុះទៅឃាត់ខ្លួន និងនាំជនសង្ស័យមកកាន់អធិការដ្ឋានស្រុកទឹកឈូ ដើម្បីធ្វើការសាកសួរ ។
លោកអធិការរងបញ្ជាក់ថា ក្រោយពីសមត្ថកិច្ចសាកសួរ ជនសង្ស័យបានឆ្លើយសារភាពប្រាប់សមត្ថកិច្ចដូចដែលក្មេងស្រីរងគ្រោះបានប្តឹងមកសមត្ថកិច្ចដែរ ។ ហើយនៅរសៀលថ្ងៃទី២៧ ខែសីហា ឆ្នាំ២០១៦ សមត្ថកិច្ចការិយាល័យយុត្តិធម៌ នៃអធិការដ្ឋាននគរបាលស្រុកទឹកឈូបានកសាងសំណុំបញ្ជូនទៅស្នងការដ្ឋាននគរបាលខេត្ត ដើម្បីចាត់ការបន្តតាមនិតិវិធី ៕
ប្រភព៖ កោះសន្តិភាព
កំណត់ហេតុខ្មែរឡូត៖
ស្រដៀងគ្នានេះដែរ ករណីមួយផ្សេងទៀត ពូរំលោភក្មួយស្រី អាយុ១១ឆ្នាំ ខណៈនាំទៅបេះផ្កា នៅលើភ្នំគីរីរម្យ គួររំលឹកផងដែរថា កម្លាំងនគរបាលស្រុកភ្នំស្រួច បានធ្វើការឃាត់ខ្លួនជនសង្ស័យម្នាក់ បន្ទាប់ពីបាននាំក្មួយស្រីអាយុ១១ឆ្នាំ ទៅបេះផ្កានៅលើភ្នំគិរីរម្យ កាលពីម៉ោងប្រមាណ១១៖០០នាទី ថ្ងៃទី២៤ ខែសីហា ឆ្នាំ២០១៦ កន្លងទៅ។
បើតាមមន្រ្តីនគរបាល បានឲ្យដឹងថា ជនសង្ស័យដែលត្រូវឃាត់ខ្លួនឈ្មោះ ស៊ឿន រ៉ា អាយុ៣១ឆ្នាំ មុខរបរបេះផ្ការលក់ មានទីលំនៅភូមិថ្មី (គីរីរម្យ) ឃុំចំបក់ ស្រុកភ្នំស្រួច ជាបុរសមានប្រពន្ធ និងកូនចំនួន៣នាក់ផងដែរ ដោយឡែកក្មេងស្រីរងគ្រោះ ត្រូវជាក្មួយស្រីខាងប្រពន្ធជនសង្ស័យ។
មន្រ្តីនគរបាល បានឲ្យដឹងទៀតថា មុនពេលកើតហេតុ ជនសង្ស័យបានដឹកក្មេងស្រីរងគ្រោះ ទៅបេះផ្កា នៅចំណុចភ្នំបៃតងលើឧទ្យានជាតិគីរីរម្យ ហើយបានធ្វើសកម្មភាពរំលោភ បានសំរេច ក្រោយមកត្រូវបានកម្លាំង សមត្ថកិច្ចធ្វើការឃាត់ខ្លួន បញ្ជូនមកអធិការដ្ឋាន នគរបាលស្រុកភ្នំស្រួច ដើម្បីចាត់ការតាមនីតិវិធីច្បាប់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
