ខេត្តកំពង់ស្ពឺ ៖ ចាត់ទុកថា មហាសំណាងណាស់ ដោយបុរសម្នាក់កំពុងតែ ដេកក្នុងផ្ទះ ក៏មានរថយន្តមួយគ្រឿង បានបុករះចូលផ្ទះ ហើយរុញផ្ទប់ជញ្ជាំង តែមិនបណ្តាលឱ្យមនុស្សស្លាប់ គ្រាន់តែរបួសធ្ងន់-ស្រាល ហើយត្រូវគេបញ្ជូនទៅសង្គ្រោះភ្លាមៗ ។
ហេតុការណ៍នេះ កើតឡើងកាលពីវេលាម៉ោង ០១រំលងអធ្រាត្រថ្ងៃទី២៧ សីហា ២០១៦ ស្ថិតតាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ៦៤-៦៥ ក្នុងភូមិត្រពាំងក្រឡឹង ឃុំគិរីវ័ន្ត ស្រុកភ្នំស្រួច ខេត្តកំពង់ស្ពឺ ។
ម្ចាស់ផ្ទះរងគ្រោះឈ្មោះឡ ហៀក ភេទប្រុស អាយុ៦៧ឆ្នាំ រងរបួសធ្ងន់ ព្រមទាំងខូចរថយន្តមួយគ្រឿង ម៉ាកកាមរីឆ្លាម ពណ៌ត្រីឆ្លូញ មានពាក់ស្លាកលេខភ្នំពេញ2i-6840 ចំណែកអ្នកបើកបង្កបានគេចខ្លួនបាត់ ។
ប្រភពពីសាក្សីបានឱ្យដឹងថា នៅមុនពេលកើតហេតុ គេឃើញរថយន្ត១គ្រឿងម៉ាកហ៊ីណូ ពណ៌ទឹកសមុទ្រ ពាក់ស្លាកលេខព្រះសីហនុ3A-2485 សណ្តោងរ៉ឺម៉កគ្មានស្លាកលេខ ធ្វើដំណើរពីលិចទៅកើត បានរេចង្កូតទៅបុករថយន្ត ១គ្រឿងទៀត ម៉ាកហ៊ីយ៉ាន់ដាយ ពណ៌.ស ពាក់ស្លាកលេខសៀមរាប2A1369 ធ្វើដំណើរពីកើតទៅលិច រងការខូចខាតជាយ៉ាងដំណំ ដែលអ្នកបើកត្រូវស្គាល់ឈ្មោះងីម គឹមយីវ អាយុ២៨ឆ្នាំ មានទីលំនៅភូមិផ្សារត្រពាំងក្រឡឹង ឃុំគិរីវ័ន្ត ស្រុកភ្នំស្រួច រងរបួសធ្ងន់ អ្នករួមដំណើរ២នាក់ឈ្មោះច្រាង ភេទប្រុស អាយុ៣០ឆ្នាំ រស់នៅភូមិព្រំរលក ឃុំតាំងស្យា ស្រុកភ្នំស្រួច រងរបួសធ្ងន់ និងម្នាក់ទៀតឈ្មោះខេង យក្សភេទប្រុស អាយុ៣៥ឆ្នាំ មានទីលំនៅភូមិមាត់សាយ ឃុំតាំងស្យា ស្រុកភ្នំស្រួច រងរបូសស្រាល ។
បើតាមម្ចាស់ផ្ទះ ក៏បានឱ្យដឹងដែរថា មុនពេលកើតហេតុ រូបគាត់កំពុងសំរានលើក្តារងឿក្នុងផ្ទះ ស្រាប់តែឮសូរសំឡេងបុកប្រាវ រថយន្តនោះបន្តបុកចូលមកក្នុងផ្ទះរបស់គាត់ ថែមទាំងរុញគាត់ ដែលកំពុងសំរានលើក្តារងឿ ទៅផ្ទប់នឹងជញ្ជាំង បើកុំតែបានរថយន្តរបស់គាត់ នៅពីមុខមិនដឹងជាយ៉ាងម៉េចទេ ។
សមត្ថកិច្ចបន្តទៀតថា ក្រោយកើតហេតុ កម្លាំងជំនាញចរាចរណ៍ បានបញ្ជូនជនរងគ្រោះទៅសង្គ្រោះនៅមន្ទីរពេទ្យ ចំណែករថយន្តបង្ក និងរថយន្តរងគ្រោះ ត្រូវបានរក្សាទុកនៅអធិការដ្ឋាននគរបាលស្រុកភ្នំស្រួច រង់ចាំស្រាវជ្រាវរកម្ចាស់ចូលខ្លួនដោះស្រាយ ។
សមត្ថកិច្ចបានសន្និដ្ឋាន ជំហានដំបូងថា ទំនងជាអ្នកបើករថយន្តងងុយដេក ទើបបង្កឱ្យមានគ្រោះថ្នាក់បែបនេះ ។ ប្រភពចុងក្រោយថា នៅវេលាម៉ោង០២ និង០៨នាទីថ្ងៃដដែល អ្នកបើករថយន្តឈ្មោះងីម គឹមយីវ បានស្លាប់ហើយនៅមន្ទីរពេទ្យលោក
សង្ឃ ។
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកដែរថា ដោយឡែកករណីស្រដៀងគ្នានេះដែរ សំណាងណាស់ មនុស្សប្រុសស្រីបីនាក់ នៅក្នុងរថយន្ត រួមជាមួយម្ចាស់ផ្ទះដែលកំពុងដេកលង់លក់ មិនបណ្តាលឲ្យរងរបួស គ្រាន់តែខូចខាតទ្រព្យសម្បត្តិតែប៉ុណ្ណោះ នៅក្នុងហេតុការណ៌ បើករថយន្តទៅបុកចូលផ្ទះ នាម៉ោង៣៖០០នាទីរំលងអាធ្រាត្រ នៅថ្ងៃទី១៩ ខែសីហា ឆ្នាំ២០១៦ កន្លងទៅ ស្ថិតនៅតាមបណ្តោយផ្លូវវេងស្រេង ក្នងសង្កាត់ចោមចៅ ខណ្ឌពោធិសែនជ័យ។
ម្ចាស់ផ្ទះដែលរងការខូចខាត ទ្រព្យសម្បត្តិដោយសារ រថយន្តបុកចូលនោះបានប្រាប់ថា នៅវេលាកើតហេតុរូបគាត់ រួមជាមួយក្រុមគ្រួសារកំពុងតែសម្រាន ស្រាប់តែឮសម្លេងផ្ទុះដូចគ្រាប់បែក ក៏ភ្ញាក់ដឹងខ្លួនហើយភ័យជាខ្លាំង ស្មានតែផ្ទុះអី លុះពេលចេញមើលក៏ឃើញ រថយន្តកូរ៉ូឡាមួយគ្រឿង បានបើកបុកតូប និងបុកទ្វារផ្ទះ បណ្តាលឲ្យខូចខាតទ្រព្យសម្បត្តិតែប៉ណ្ណោះ ដោយសាររថយន្តបែកកង់ មិនអាចទៅទៀតបាន កុំអីគ្រួសារគាត់ត្រូវមានអ្នករងរបួសបាត់ទៅហើយ ឯចំណែកខាងរថយន្តបង្កវិញ ក៏មិនមានអ្នកណារងរបួសដែរ គ្រាន់តែខូចខាតទ្រព្យសម្បត្តិដូចគ្នា។
ក្រោយកើតហេតុដោយសារ តែគ្រោះថ្នាក់ខាងលើនេះ មិនបណ្តាលឲ្យមានមនុស្សរងរបួស ទើបខាងម្ចាស់រថយន្ត និងម្ចាស់ផ្ទះចរចាសងសំណង នៅកន្លែងផ្ទាល់តែម្តង៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
