ដើម្បីការងារ ត្រូវភ្លើងឆេះមុខ មើលសឹងមិនយល់អស់រាប់ឆ្នាំ ចុងក្រោយត្រូវបានវះកាត់ ផ្លាស់ប្តូរមុខមាត់ថ្មី បានសម្រេច

អាមេរិក៖ លោក Patrick Hardison វ័យ ៤២ឆ្នាំ ជាមន្រ្តីផ្នែកពន្លត់អគ្គីភ័យមួយរូប ដោយសារតែអំឡុងពេល បំពេញបេសកម្មការងារ បានធ្វើឲ្យរូបលោកជួបគ្រោះថ្នាក់ ដ៏សែនអាក្រក់មួយ និងមិននឹកស្មានដល់ ដែលបានបណ្តាលឲ្យផ្ទៃមុខរបស់គាត់ រងការឆាបឆេះ សឹងមើលលែងយល់។

បើតាមប្រភពបានឲ្យដឹងថា អស់រយៈពេលជាង ១៤ឆ្នាំកន្លងមកហើយ ដែលលោក Hardison បានរស់នៅជាមួយនឹងទុក្ខព្រួយ រងភាពអាម៉ាស់យ៉ាងខ្លាំង ពីសំណាក់មនុស្សនៅជុំវិញខ្លួនលោក ខណៈមនុស្សមួយចំនួន ពេលសម្លឹងមើលមុខគាត់ម្តងៗ តែងតែមានអារម្មណ៍ថាភ័យខ្លាច សូម្បីតែកូនរបស់គាត់ផ្ទាល់ ក៏មានភាពភិតភ័យ និងផ្ទៃមុខដ៏គួរឲ្យខ្លាច របស់លោក Hardison ផងដែរ។ នោះក៏ដោយសារតែ ផ្ទៃមុខរបស់គាត់ ត្រូវបានបំផ្លាញស្ទើរតែទាំងស្រុង មើលលែងយល់ ពោលប្រៀបបីដូចជា មនុស្សក្រៅភពយ៉ាងអីចឹង ក្រោយពីបុរសកំសត់រូបនេះ ត្រូវបានដំបូងផ្ទះដែលកំពុងឆាបឆេះ បាក់ដួលសង្កត់លើគាត់ បណ្តាលឲ្យប៉ះទង្គិចលើផ្ទៃមុខយ៉ាងខ្លាំង ក្នុងគ្រាបំពេញបេសកម្មការងារ។ ប៉ុន្តែទោះបីជាយ៉ាងណាក្តី ក៏លោក Hardison នៅតែជាបុគ្គលមួយរូប ដែលរក្សាបានជំហរ យ៉ាងរឹងមាំជានិច្ចផងដែរ។

ប្រភពបន្តថា ប៉ុន្តែក្នុងរយៈពេលចុងក្រោយមកនេះ ពោលគឺជាងមួយឆ្នាំកន្លងមកហើយ រហូតមកទល់ពេលបច្ចុប្បន្ននេះ លោក Hardison បានទទួលការព្យាបាល វះកាត់ផ្លាស់ប្តូរមុខមាត់ថ្មី ក្រោយស្នាដៃគ្រូពេទ្យជំនាញ ប្រមាណជា ១០០នាក់ បូករួមជាមួយនឹង បុគ្គលិកជំនួយការពេទ្យ ជាច្រើននាក់ទៀតផងដែរ ដែលមានចំណាយពេលអស់ប្រមាណជា ២៦ម៉ោង ដើម្បីបញ្ចប់ក្នុងប្រត្តិបត្តិការនេះ នៅមន្ទីរពេទ្យមួយកន្លែង ស្ថិតក្នុងទីក្រុង ញូវយ៉ក សហរដ្ឋអាមេរិក។

លោក Hardison បាននិយាយថា «ចាប់ពីពេលនេះទៅ ខ្ញុំលែងមានអារម្មណ៍ថា អាម៉ាស់ ឬខ្មាសគេដូចមុនហើយ។ អ្វីៗវាបានផ្លាស់ប្តូរ មកជាធម្មតាវិញ ហើយវាក៏ជាអ្វីដែលខ្ញុំ មិននឹកស្មានដល់ដែរ ថាវានឹងអាចត្រឡប់ម្តងទៀត ដូចពេលនេះយ៉ាងដូច្នេះសោះ។ ឥលូវនេះ ខ្ញុំក្លាយជាមនុស្សថ្មីម្នាក់ ដែលមុខមាត់ស្អាតបាត ដូចគេដូចឯង ហើយក៏អាចដើរចេញ ទៅណាមកណា បានដោយសេរីផងដែរ» ។

គួរឲ្យដឹងថា លោក Hardison បានជួយគ្រោះថ្នាក់ ដ៏អកុសលនេះ នៅក្នុងអំឡុងខែកញ្ញា ឆ្នាំ២០១១ កន្លងទៅ ពោលគឺកាលណោះគាត់មានអាយុត្រឹមតែ ២៧ឆ្នាំតែប៉ុណ្ណោះ ខណៈដែលរូបគាត់បាន ចូលខ្លួនជួយសង្គ្រោះនារីម្នាក់ ដែលបានជាប់គាំងក្នុងផ្ទះមួយកន្លែង អំឡុងពេលអគ្គីភ័យឆាបឆេះ យ៉ាងសន្ធោសន្ធៅ ស្ថិតក្នុងទីក្រុង Senatobia រដ្ឋ Mississippi សហរដ្ឋអាមរិក ទើបបណ្តាលឲ្យជីវិតរបស់គាត់ បានផ្លាស់ប្តូរ។

ទោះបីជាយ៉ាងណាក៏ដោយ សមិទ្ធផល ដែលទទួលបានពេលនេះ បានធ្វើឲ្យលោក Hardison រួមជាមួយនឹងក្រុមគ្រួសារ របស់លោកផ្ទាល់តែម្តង ត្រេកអរយ៉ាងខ្លាំង ក្រោយពីមុខមាត់របស់គាត់ អាចផ្លាស់ប្តូរមកសាជាថ្មី ក្រោមស្នាដៃដ៏មានជំនាញ របស់ក្រុមវេជ្ជបណ្ឌិតផងដែរ ៕ 

ប្រភព៖ បរទេស

• ការងារ
• ជីវិត
• ជំរុញទឹកចិត្ត