ភ្នំពេញ៖ កាលពីថ្ងៃសៅរ៍កន្លងទៅនេះ មានព័ត៌មានចុះផ្សាយស្ដីពី សិស្សស្រីសាលាម្នាក់ ជិះម៉ូតូទៅផឹកកាហ្វេ ទុកម៉ូតូនៅមុខហាង ត្រូវចោរមិនស្គាល់អត្តសញ្ញាណ លួចនាំយកទៅបាត់ ដោយសុវត្ថិភាពនៅចំណុចមុខហាងលក់កាហ្វេ ដែលអត្ថបទព័ត៌មានមួយនេះ ត្រូវបានប្រិយមិត្ដអ្នកអានម្នាក់ បានស្នើរសុំឲ្យខ្មែរឡូត ជួយកែសម្រួល ខណៈសាមីខ្លួនក៏បានធ្វើការបកស្រាយ។
ការស្នើរសុំនេះ បានធ្វើឡើងតាមរយៈប្រអប់សារទំព័រហ្វេសប៊ុកខ្មែរឡូត ដែលម្ចាស់គណនីឈ្មោះ Chhorn Barry បានសំណូមពរឲ្យខ្មែរឡូត ជួយធ្វើការចុះផ្សាយអត្ថបទថ្មីមួយ ដើម្បីកុំឲ្យអ្នកដទៃយល់ច្រលំថា ប្អូនស្រីរបស់ខ្លួន ជាយុវតីជនរងគ្រោះ ទៅផឹកកាហ្វេមិនបានចូលរៀន។ មួយវិញទៀត នេះបើតាមរូបភាព និងសារពីយុវតីរងគ្រោះផ្ទាល់ឈ្មោះ ទូច ស្រីល័ក្ខ ដែលបានបង្ហោះលើបណ្ដាញសង្គមរបស់ខ្លួន ក្រោយពីមានការចុះផ្សាយព័ត៌មាន បានឲ្យដឹងថា៖ <<ខ្ញុំមិនបានចូលផឹកកាហ្វេទេ គ្រាន់តែខ្ញុំទិញហើយខ្ញុំដើរចូលសាលា MJC វិញ ហើយមុននឹងចូល ខ្ញុំក៏បានឈរមើលម៉ូតូដែរ បានខ្ញុំដើរចូលវិញ ហើយប្រហែលជា ១៥នាទីខ្ញុំចេញមកស្រាប់តែមិនឃើញម៉ូតូខ្ញុំតែម្ដង ហើយម៉ូតូខ្ញុំក៏មិនមែនទុកមុខហាងកាហ្វេដែរ គឺខ្ញុំទុកនៅមុខសាលា MJC ទេ ផ្សាយព័ត៌មានមិនពិតចឹង អ្នកមិនដឹងថាខ្ញុំគិតសាលាទៀត>> ។
ដោយឡែកបើ់តាមអត្ថបទព័ត៌មានចាស់ ដែលបានចុះផ្សាយបានឲ្យដឹងថា យុវតីរងគ្រោះខាងលើ និងជាម្ចាស់ម៉ូតូឈ្មោះ ទូច ស្រីល័ក្ខ ភេទស្រី អាយុ១៦ឆ្នាំ សិស្សសាលាឧត្តមវិទ្យា ថ្នាក់ទី១០ រស់នៅភូមិថ្កូវ ឃុំឬស្សី ស្រុកខាងលិច ស្រុកកំពង់ត្រាច ខេត្តកំពត មកស្នាក់នៅរៀនសូត្រ ភូមិក្រាំង សង្កាត់ក្រាំងអំពិល ក្រុងកំពត ខេត្តកំពត ។ ម៉ូតូដែលចោរលួច ម៉ាកសង់សេ១២៥ សេរី២០១៦ ពណ៌ខ្មៅ ពាក់ស្លាកលេខកំពត 1I-5999 លេខតួ និងលេខម៉ាស៊ីន 9478472 ដែលហេតុការណ៍នេះ បានកើតឡើងកាលពីម៉ោង ៥៖២០នាទី ល្ងាច ថ្ងៃទី២៩ ខែកក្កដា ឆ្នាំ២០១៦ ស្ថិតក្នុងភូមិ១ឧសភា សង្កាត់កំពង់កណ្តាល ក្រុងកំពត ។
នេះបើតាមមន្ត្រីនគរបាលមូលដ្ឋាន បានឲ្យដឹងថា ជនរងគ្រោះ បានជិះម៉ូតូទុកនៅ មុខសាលាយុវវ័យ ហើយដើរចូលទៅផឹកកាហ្វេ ខាងក្នុងរបងខាងកើតកន្លែងទុកម៉ូតូ ចម្ងាយ២៥ម៉ លុះសង្ស័យមើលមកម៉ូតូ របស់ខ្លួនស្រាប់តែបាត់តែម្តង ។ បច្ចុប្បន្នកម្លាំងមាន សមត្ថកិច្ចនានា បាននិងកំពុង ស្រាវជ្រាវស្វែងរកមុខសញ្ញា ៕
កំណត់ហេតុខ្មែរឡូត៖
សម្រាប់ករណីចោរលួចម៉ូតូ នេះក៏អាចធ្វើឲ្យនឹកឃើញដល់ នារីម្នាក់ដែលចូលសម្ភាសការងារចេញមកវិញ ចោរលួចម៉ូតូបាត់ ក្នុងរាជធានីភ្នំពេញ កាលពីថ្ងៃទី៣០ ខែឧសភានេះ នៅស្ថានីចាក់ប្រេងតេលា តាមបណ្ដោយផ្លូវឧកញ៉ា ម៉ុង ឬទ្ធី ស្ថិតក្នុងភូមិបាយាប សង្កាត់ភ្នំពេញថ្មី ខណ្ឌសែនសុខ។
គួររំលឹកថា ជនរងគ្រោះមានឈ្មោះ ទាវ រ៉ាវី អាយុ២០ឆ្នាំ ស្នាក់នៅភូមិច្រេះ សង្កាត់ភ្នំពេញថ្មី ខណ្ឌសែនសុខ ដែលមានស្រុកកំណើតនៅខេត្តក្រចេះ ។
នារីរងគ្រោះបានឲ្យដឹងទៀតថា ម៉ូតូដែលនាងជិះមកសម្ភាសការងារ ហើយត្រូវចោរលួចយកទៅបាត់នោះ តាមពិតជាម៉ូតូខ្ចីគេទេ ដែលម្ចាស់ម៉ូតូនៅបន្ទប់ជួលជាប់គ្នា ហើយគេឲ្យមកជួយយកកូនគេចេញពីរៀន ។
ម៉ូតូនោះជាកម្មសិទ្ធិ ឈ្មោះ លឿម លាក ដែលមានអាសយដ្ឋាននៅភូមិគោកត្របែក ឃុំគោកដូង ស្រុកអង្គរជុំ ខេត្តសៀមរាប ជាម៉ូតូហុងដាវ៉េវ សេ១០០ ពណ៌ខ្មៅ ពាក្យស្លាកលេខ សៀមរាប 1R-1476 ។
នារីរងគ្រោះបានបន្ថែមទៀតថា មុនពេលកើតហេតុ រូបនាងត្រូវបានម្ចាស់ម៉ូតូដែលស្នាក់នៅបន្ទប់ជាប់គ្នា ពឹងពាក់ឲ្យទៅជួយយកកូនគាត់នៅសាលារៀន តែនាងឆ្លើយថា ជាប់រវល់ប្រញាប់ទៅសម្ភាសការងារ ហើយម្ចាស់ម៉ូតូក៏ប្រាប់ថា ឲ្យយកម៉ូតូគាត់ទៅអញ្ចឹង ។
ក្រោយពីជូនកូនម្ចាស់ម៉ូតូដាក់ផ្ទះហើយ នាងប្រញាប់ទៅកន្លែងសម្ភាសការងារ ដូចអាសយដ្ឋានខាងលើ ក្រោយពីរូបគេបានចូលក្នុងបន្ទប់សម្ភាសប្រមាណជា២០នាទី ពេលចេញមកវិញស្រាប់តែបាត់ម៉ូតូតែម្ដង ធ្វើឲ្យនាងស្រឡាំងកាំង និងតក់ស្លុតជាខ្លាំងព្រោះជាម៉ូតូគេផង ។
ឃើញហេតុការណ៍បែបនោះ សន្តិសុខដែលនៅចាក់សាំងជិតនោះបានប្រាប់ថា ឃើញមនុស្សប្រុសម្នាក់ជិះចេញទៅបាត់ហើយ ។ ភ្លាមៗនោះដែរនារីរងគ្រោះ បានជិះម៉ូតូឌុប ទៅដាក់ពាក្យបណ្ដឹងនោប៉ុស្ដិ៍រដ្ឋបាល សង្កាត់ភ្នំពេញថ្មីដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]