ឡើងចឹង! គូស្នេហ៍មួយគូ ជួលឧទ្ធម្ភាគចក្រ ហោះហើរមកកាន់កម្មវិធី អាពាហ៍ពិពាហ៍របស់ខ្លួន បណ្តាលឲ្យស្ទះចរាចរណ៍រាប់ម៉ោង (មានវីដេអូ)

ចិន៖ វាជារឿងធម្មតាមួយទៅហើយ ដែលមនុស្សគ្រប់គ្នាហ៊ានចំណាយ លុយកាក់ច្រើនក្រាសក្រែល ដើម្បីរៀបចំពិធីមង្គលការមួយ ឲ្យមានលក្ខណៈល្អប្រសើរ សមស្របទៅតាមលទ្ធភាពដែលខ្លួនមាន។ អ្នកខ្លះភាគច្រើនតែងតែមានការគិតគូរពី រថយន្តប្រណីត ម៉ាកល្បីៗដើម្បីប្រើប្រាស់វា បើកមកក្នុងពីធីពិសេសណាមួយ ក៏ដូចជាមង្គលការជាដើម។

ដោយឡែក បើក្រឡេកទៅមើល អាពាហ៍ពិពាហ៍ របស់គូស្វាមីភរិយាថ្មីថ្មោងមួយគូ ដែលស្ថិតក្នុង វណ្ណៈអ្នកមានទ្រព្យស្តុកស្តម្ភ មកពីទីក្រុងសៀងហៃ ប្រទេសចិនឯណោះវិញ បានសម្រេចចិត្ត ជិះឧទ្ធម្ភាគចក្រ ហោះហើរមកកាន់កម្មវិធី មង្គលការរបស់ខ្លួន ជាហេតុធ្វើឲ្យមានការ ចាប់អារម្មណ៍យ៉ាងខ្លាំង ខណៈរងការរិះគន់មិនសំចៃមាត់ ដោយសារតែបង្កឲ្យស្ទះចរាចរណ៍ ដល់អ្នកធ្វើដំណើរ កាត់តាមផ្លូវនោះផងដែរ។

យោងតាមប្រភពសារព័ត៌មាន បានឲ្យដឹងថា កាលពីថ្ងៃអាទិត្យកន្លងទៅនេះ គូស្វាមីភរិយាមានទ្រព្យស្តុកស្តម្ភមួយគូ ត្រូវបានគេប្រទះឃើញ ជិះឧទ្ធម្ភាគចក្រមួយគ្រឿង ចុះចតនៅចំកណ្តាលស្ពាន Liuzaogang ដែលស្ថិតនៅលើដងផ្លូវ Nanyuan ក្នុងតំបន់ Pudong នៃទីក្រុងសៀងហៃ ប្រទេសចិន ដើម្បីហោះហើរមកកាន់ ពិធីមង្គលការរបស់ពួកគេទាំងពីរ។

អំឡុងពេលនៃការប្រារព្ធពិធីនោះ បានជួលសន្តិសុខ បិទច្រកផ្លូវធ្វើដំណើរខាងលើនេះ ជាបណ្តោះអាសន្ន ដោយមានក្រាលនូវកម្រាលព្រំ ពណ៌ក្រហមឆ្អិនឆ្អៅ តាមដងផ្លូវសម្រាប់ជាផ្លូវដើរមួយ ដល់កូនកម្លោះកូនក្រមុំ ពេលចុះពីលើឧទ្ធម្ភាគចក្រ ខណៈគេសង្កេតឃើញថា ស្វាមីភរិយាមួយគូនេះ បានដើរចុះមក លើកម្រាលព្រំ ជាមួយនឹងទឹកមុខ ញញឹមប្រិមប្រិយផងដែរ។

ទោះបីជាយ៉ាងណាក៏ដោយ រឿងវាមិនដូចការគ្រោងទុកនោះឡើយ។ ឧទ្ធម្ភាគចក្រមួយគ្រឿងនោះ ជាមូលហេតុបង្កធ្វើឲ្យស្ទះចរាចរណ៍ ស្ទើរតែជិត១ម៉ោង ជាហេតុរំខានដល់អ្នកបើកបរជាច្រើន ខឹងសម្បារយ៉ាងខ្លាំង ហើយថែមទាំងទូរស័ព្ទហៅប៉ូលិស មកជួយធ្វើអន្តរាគមន៍ផងដែរ។

ទន្ទឹមនឹងនោះផងដែរ អ្នកស្រី Zhao ជាអ្នកគ្រប់គ្រងទូទៅ នៃក្រុមហ៊នអាកាសចរណ៍ Kingwing Aviation បានឲ្យដឹងថា ខាងក្រុមហ៊ុនអាកាសចរណ៍ ទទួលខុសត្រូវតែលើការហោះហើរតែប៉ុណ្ណោះ មិនពាក់ព័ន្ធជាមួយនឹងការ ចុះចតលើដីនោះឡើយ។

គួរឲ្យដឹងថា ក្នុងថ្ងៃអាពាហ៍ពិពាហ៍នោះ កូនកម្លោះជាអ្នកជួល ឧទ្ធម្ភាគចក្រមួយគ្រឿងនោះ ដើម្បីដឹកគាត់ហោះហើរ ទៅកាន់ផ្ទះកូនក្រមុំ។ ជាមួយគ្នានេះដែរ ក្រុមហ៊ុនអាកាសចរណ៍ បានឲ្យដឹងទៀតថា ចំពោះការជួលឧទ្ធម្ភាគចក្រ ក្នុងថ្ងៃអាពាហ៍ពិពាហ៍ គឺគិតជាម៉ោង ដែលមានតម្លៃចាប់ពី ២០,០០០យ័ន (ប្រហែលជា ៣,០០៥ដុល្លារអាមេរិក) រហូតដល់ ៦០,០០០យ័ន (ប្រហែលជា ៩,០១៧ដុល្លារអាមេរិក) ក្នុងរយៈពេលមួយម៉ោង ដោយអាស្រ័យទៅតាមប្រភេទរបស់វា។

គូសបញ្ជាក់ដែរថា បើយោងតាមច្បាប់ របស់ប្រទេសចិន រាល់ឧទ្ធម្ភាគចក្រទាំងអស់ មិនអាចចុះចត ឬកាន់កាប់ផ្លូវណាមួយ ដើម្បីធ្វើជាកម្មសិទ្ធិ ឬផលចំណេញណាមួយ សម្រាប់ខ្លួនឯងបានឡើយ លុះត្រាតែមានអាសន្ន ឬភារកិច្ចបន្ទាន់ណាមួយ ទើបត្រូវបានអនុញ្ញាត ៕

ទស្សនាវីដេអូ៖

ប្រភព៖ Shanghaiist