ខេត្តសៀមរាប ៖ ប្រជាពលរដ្ឋបានប្រទះឃើញសាកសពបុរសម្នាក់នៅកណ្តាលវាលស្រែ ត្រូវសង្ស័យថា ជាករណីឃាតកម្មសម្លាប់រួចយកទៅប្លុងចោល ដែលការប្រទះឃើញនេះ កាលពីវេលាម៉ោង០៦ និង៣០នាទីព្រឹកថ្ងៃទី២៨ កក្កដា ២០១៦ ចម្ងាយពីភូមិប្រហែល២០០ម៉ែត្រ ក្នុងភូមិឆេះចាន ឃុំស្វាយលើ ស្រុកស្វាយលើ ខេត្តសៀមរាប ។
ប្រភពពីពលរដ្ឋឱ្យថា បន្ទាប់ពីប្រទះឃើញសាកសពនៅកណ្តាលវាលស្រែនេះ ក៏បានរត់ទៅរាយការណ៍ជូនកម្លាំងនគរបាលប៉ុស្តិ៍រដ្ឋបាលឃុំស្វាយលើ ដើម្បីជួយអន្តរាគមន៍។ ភ្លាមៗនោះ កម្លាំងបានចុះទៅដល់កន្លែងកើតហេតុ និងធ្វើការហ៊ុមព័ទ្ធកន្លែងសពជនរងគ្រោះ រង់ចាំខាងនគរបាលបច្ចេកទេសវិទ្យាសាស្ត្រនៃស្នងការដ្ឋាននគរបាលខេត្ត ចុះទៅពិនិត្យ ។
ក្រោយពីពិនិត្យលើដងខ្លួនសាកសពត្រូវសន្និដ្ឋានថា ជាករណីឃាតកម្ម គិតទុកជាមុន ពីព្រោះនៅលើរូបរាងកាយជនរងគ្រោះមានស្លាកស្នាមចាក់កាំបិត នៅផ្នែកខាងក្រោយ ។ សពជនរងគ្រោះមានស្លៀកពាក់អាវការ៉ូល្អិត ពណ៌ប្រផេះ ស្លៀកខោ ខូវប៊ូយជើងវែង ហើយរុំស្បៃម៉ុង ពណ៌ខៀវ នៅលើខ្លួន ។
ប្រភពបន្ថែមទៀតថា ជនរងគ្រោះអាចត្រូវចាក់សម្លាប់ ហើយប្លន់យករបស់អ្វីមួយហើយ រួចយកសពទៅទំលាក់ចោលនៅកណ្តាលវាលស្រែឆ្ងាយពីអ្នកភូមិ ។
បច្ចុប្បន្ន សាកសពជនរងគ្រោះ ត្រូវសមត្ថកិច្ចយកទៅរក្សាទុកនៅវត្តត្រាង ស្ថិតក្នុងស្រុកស្វាយលើ ខេត្តសៀមរាប ដើម្បីរងចាំក្រុមគ្រួសារ ទទួលយកទៅធ្វើបុណ្យតាមប្រពៃណី ហើយសមត្ថកិច្ចកំពុងស៊ើបអង្កេតលើករណីនេះ ។
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកដែរថា ដោយឡែកករណីមួយវិញទៀត សាកសពយុវជនម្នាក់ បានត្រូវអ្នកភូមិប្រទះឃើញដេកស្លាប់ផ្កាប់មុខនៅវាលស្រែ បង្កឲ្យមានការភ្ញាក់ផ្អើលនៅព្រឹកថ្ងៃទី២២ មករា ២០១៦ កន្លងទៅ ស្ថិតនៅក្នុងភូមិយាយទៀង ឃុំបល្ល័ង្គ ស្រុកបារាយណ៍ ។
បើតាមអ្នកឆ្លើយឆ្លងព័ត៌មានកោះសន្តិភាពបានស្រង់របាយការណ៍របស់សមត្ថកិច្ចបញ្ជាក់ឲ្យដឹងថា យុវជនដែលស្លាប់មានស្នាមវាយក្បាលនោះ ឈ្មោះ ស៊ុយ រី អាយុ១៦ឆ្នាំ រស់នៅក្នុងភូមិ-ឃុំខាងលើ ។
តាមការសន្និដ្ឋានជំហានរបស់សមត្ថកិច្ចជាករណីឃាតកម្មក្នុងអំពើណាមួយ ព្រោះជនរងគ្រោះមានស្នាមបែកក្បាលនិងឃើញដុំថ្មធំមួយប្រឡាក់ឈាមនៅក្បែរនោះ ។ នៅពេលនេះ សមត្ថកិច្ចកំពុងស្រាវជ្រាវបើកការស៊ើបអង្កេតដើម្បីចាប់ជនដៃដល់យកមកផ្តន្ទាទោសតាមច្បាប់ ៕
ជាមួួយគ្នានេះដែរ កន្លងទៅនេះ ករណីផ្សេងមួយវិញទៀត កាលពីវេលាម៉ោង១០និង៣០នាទី ព្រឹកថ្ងៃទី៤ ខែមេសា ឆ្នាំ២០១៦ ប្រជាពលរដ្ឋ បានប្រទះឃើញ សាកសពមនុស្សប្រុសម្នាក់ ដែលរលេះរលួយសាច់អស់នៅសល់តែគ្រោងឆ្អឹង កណ្តាលវាលស្រែ ចម្ងាយប្រមាណជា៤គីឡូម៉ែត្រពីភូមិអ្នកស្រុក ក្នុងភូមិមេលប់ ឃុំរកា ស្រុកពារាំង ខេត្តព្រៃវែង។
ប្រភពព័ត៌មានពីសមត្ថកិច្ចបានឲ្យដឹងថាសាកសពនេះ ត្រូវបានក្រុមក្មេងឃ្វាលគោ ប្រទះឃើញកាលពីព្រឹកមិញនេះហើយបានរាយការណ៍ មកសមត្ថកិច្ច ចុះទៅពិនិត្យមើលកន្លែងកើតហេតុទើបធ្វើឲ្យមានការភ្ញាក់ផ្អើលដល់អ្នកស្រុកតែម្តង។
សមត្ថកិច្ចបានបញ្ជាក់បន្ថែមថា តាមការត្រួតពិនិត្យលើសាកសព ជនដែលស្លាប់នេះ មានឈ្មោះ ចន សុខចាន់ ភេទប្រុស អាយុ36ឆ្នាំ ជាមនុស្សសរសៃរប្រសាទ និងមានទីលំនៅក្នុងភូមិត្រកៀត ឃុំរកា ស្រុកពារាំង ខេត្តព្រៃវែង ហើយត្រូវបានក្រុមគ្រួសារអះអាងថា បុរសរូបនេះបានបាត់ខ្លួនជាងកន្លះខែ មកហើយ ប៉ុន្តែក្រុមគ្រួសារតាមរកមិនឃើញ។
ចំពោះមូលហេតុនៃការស្លាប់របស់បុរស សសៃប្រសាទម្នាក់នេះ គ្រាន់តែសន្និដ្ឋានថាអាចស្លាប់ដោយសារតែខ្យល់គរ ព្រោះទំនងជាដើរអត់អាហារច្រើនថ្ងៃ ហើយពេលដើរមកដល់ចំណុចវាលស្រែនេះ ក៏បាក់កម្លាំងហើយដួលស្លាប់តែម្តង ដោយគ្មានអ្នកណាដឹង។
ទោះជាយ៉ាងណាក៏ដោយ នេះគឺគ្រាន់តែជាការសន្និដ្ឋាន តែមិនមែនជាលទ្ធផលនៃការធ្វើកោសល្យវិច័យលើសាកសពនោះទេ ហើយលទ្ធផលពិតយ៉ាងណានោះ សមត្ថកិច្ចមិនបានបកស្រាយឲ្យបានច្បាស់លាស់នោះឡើយ ។ ប៉ុន្តែក្រោយពីសមត្ថកិច្ច និងអាជ្ញាធរមូលដ្ឋានបានពិនិត្យសាកសពរួច ក៏បានប្រគល់សាកសពទៅឲ្យក្រុមគ្រួសារ ហើយត្រូវបានក្រុមគ្រួសារយកទៅបូជា កាលពីវេលាម៉ោង២រសៀលថ្ងៃដដែលនេះ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]