រាជធានីភ្នំពេញ ៖ អគ្គិភ័យមួយបានកើតឡើងបណ្ដាលឱ្យបុរសម្នាក់ រលាកភ្លើងរងរបួសយ៉ាងធ្ងន់ធ្ងរ ចំណែកតូបជួសជុលម៉ូតូរបស់គាត់ ក៏ត្រូវភ្លើងឆេះអស់ទាំងស្រុង ខណៈកំពុងប៉ះម៉ូតូឱ្យគេ ហើយប្រពន្ធរបស់គាត់បានយកប្រេងសាំង ទៅចាក់ច្រកចូលក្នុងដប ដើម្បីទុកលក់នៅក្បែរភ្លើងអ៊ុតបំណាស់ពោះវៀនម៉ូតូ ត្រូវសាំងហៀរចេញពីដប បណ្ដាលឱ្យឆាបឆេះចេញជាអណ្ដាតភ្លើងយ៉ាងសន្ធោសន្ធៅ និងផ្សែងហុយឡើងទៅលើកប់អាកាស ។
ហេតុការណ៍នេះ បានកើតឡើងកាលពីវេលាម៉ោង០៦ និង៤៥នាទីព្រឹកថ្ងៃទី២៨ កក្កដា ២០១៦ ស្ថិតនៅក្នុងភូមិភ្លើងឆេះរទេះខាងលិច ក្នុងសង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះជាប្ដីឈ្មោះនូវ សំអឿ អាយុ៣៤ឆ្នាំ ជាជាងជួសជុលម៉ូតូ (រងរបួសពេញខ្លួន) ដោយសារគាត់ចូលទៅយកម៉ូតូ ខណៈពេលដែលភ្លើងកំពុងឆេះខ្លាំង ។ ចំណែកស្ត្រីជាប្រពន្ធឈ្មោះស៊ឹម សូនី អាយុ២៧ឆ្នាំ ជាអ្នកលក់ដូរ មិនមានរងរបួសនោះទេ ទាំងពីរស្នាក់នៅក្នុងភូមិ-កើតហេតុខាងលើ ។
ក្នុងហេតុការណ៍នេះ ត្រូវអ្នកស្រុកនាំគ្នាជួយពន្លត់ ដោយអ្នកខ្លះបានយកបំពង់ពន្លត់អគ្គិភ័យទៅបាញ់និងខ្លះទៀត ដងទឹកជះរហូតរលត់ទៅវិញ មុនពេលដែលរថយន្តពន្លត់អគ្គ័យចំនួន៣គ្រឿងទៅដល់ គឺមិនបានបាញ់ពន្លត់ទេ ។ ប៉ុន្តែតូបជួសជុលម៉ូតូនោះ រួមនិងទាំងម៉ូតូម៉ាកគុបជ្រុង១គ្រឿង ដែលគេយកទៅឱ្យជួសជុល និងសម្ភារៈជួសជុលម៉ូតូ ព្រមទាំងគ្រឿងបន្លាស់ម៉ូតូផង ត្រឹមតែរយៈពេលជាង១០នាទីប៉ុណ្ណោះ បានក្លាយទៅជាចំណីព្រះអគ្គីទាំងស្រុង ។
ប្រភពបន្តថា នៅមុនពេលកើតហេតុ អ្នកភូមិមួយគ្នាបានយកម៉ូតូបែកកង់មួយគ្រឿង ទៅឱ្យជនរងគ្រោះប៉ះ ខណៈនោះបុរសជាប្ដីចាប់ផ្ដើមប៉ះកង់ម៉ូតូ ដោយប្រើឆ្នាំងដុតភ្លើងអ៊ុតបំណះពោះវៀនម៉ូតូ ស្របពេលនោះដែរ ស្ត្រីជាប្រពន្ធចាប់ផ្ដើមចាក់សាំងច្រកចូលក្នុងដបដែរ ។ ដោយច្រកនៅក្បែរឆ្នាំងភ្លើងអ៊ុតបំណះម៉ូតូនោះ បណ្តាលឱ្យប្រេងសាំងកំពប់ហៀរទៅប៉ះភ្លើងឆាបឆេះឡើងយ៉ាងសន្ធោរសន្ធៅ ។ ពេលភ្លើងឆេះខ្លាំង ត្រូវបុរសជាប្ដីបានស្ទុះចូលទៅយកម៉ូតូ ទើបត្រូវបានភ្លើងឆេះខ្លួនរងរបួសធ្ងន់ធ្ងរ ។
ប្រភព៖ កោះសន្តិភាព
កំណត់ហេតុខ្មែរឡូត៖ ដោយឡែក ករណីមួយផ្សេងទៀត កាលពីលើកមុន ម៉ូតូអូសរ៉ឺម៉ក១គ្រឿងបានឆេះយ៉ាងសន្ធោសន្ធៅបង្កឱ្យមានការភ្ញាក់ផ្អើលកាលពីវេលាម៉ោង៧ និង៤០នាទីព្រឹក ថ្ងៃទី២០ ខែមិថុនា ឆ្នាំ២០១៦ នៅក្បែរចិញ្ចើមផ្លូវជាតិលេខ៦ ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ។ សេចក្តីរាយការណ៍បានឲ្យដឹងទៀតថា ការឆេះនេះបណ្ដាលមកពីចូលចាក់សាំងមិនព្រមពន្លត់ម៉ាស៊ីនម៉ូតូ ។
តាមប្រភពពីអ៊ុំប្រុសម្នាក់ដែលជាអ្នកលក់សាំងនៅតាមចិញ្ចើមផ្លូវជាតិលេខ៦ បានប្រាប់«កោះសន្តិភាព»នៅកន្លែងថា មុនដំបូង មានម៉ូតូដឹកឥវ៉ាន់របស់ សេង លី កាត់កញ្ចក់ បានមកចាក់សាំង១លីត្រ ប៉ុន្តែមិនបានពន្លត់ម៉ាស៊ីនទេ ។ ខណៈនោះគាត់បានប្រាប់អ្នកបើកម៉ូតូថា ក្មួយពន្លត់ម៉ូតូសិនទៅ ពេលនោះអ្នកបើកម៉ូតូមិនស្តាប់តាមគាត់ទេ បែរជាឱ្យចាក់សាំងមកមិនអីទេ ប៉ុន្តែចាក់សាំងមិនទាន់បានប៉ុន្មាននាទីផងស្រាប់តែឆេះចេញពីធុងសាំងយ៉ាងសន្ធោរសន្ធៅតែម្តង បង្កឱ្យភ្ញាក់ផ្អើលដល់អ្នកធ្វើដំណើរតាមដងផ្លូវជាតិលេខ៦ ខ្លះនាំគ្នាជួយពន្លត់ ខ្លះជះខ្សាច់ ខ្លះជះទឹក ប្រហែលជិត១ម៉ោងទើបរលត់អស់ទាំងស្រុង រួចក៏នាំគ្នារុញម៉ូតូទាំងឥវ៉ាន់ យកទៅកន្លែងដើម្បីធ្វើការដោះដូរម៉ូតូយកឥវ៉ាន់ទៅឱ្យម៉ូយ ។
ចំណែកអ្នកបើកម៉ូតូរ៉ឺម៉កដឹកឥវ៉ាន់ សេង លី កាត់កញ្ចក់ នោះមានឈ្មោះ សា ប៉េងស៊ុន ភេទប្រុស អាយុ២៨ឆ្នាំ មុខរបរជាងកាត់កញ្ចក់ឱ្យ សេង លី មានទីលំនៅភូមិត្រាំនាគ សង្កាត់ស្លក្រាម ក្រុងសៀមរាប ដែលជិះម៉ូតូម៉ាក អឹមដេ ពណ៌ក្រហម ពាក់ស្លាកលេខ សៀមរាប 1Q-5381 ពីលិចមកកើត ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]