ខេត្តសៀមរាប ៖ សិប្បកម្មផលិតសរសៃគុយទាវ ត្រូវសមត្ថកិច្ចសម្រេចបិទទីតាំងជាស្ថាពរ និងកសាងសំណុំរឿងបញ្ជូនទៅតុលាការ បន្ទាប់ពីបានយកម្សៅ.សផលិតគុយទាវសរសៃ ទៅចូលឡាបូនៃមន្ទីរពិសោធន៍របស់អគ្គនាយកដ្ឋានកាំកុងត្រូលភ្នំពេញ ក៏បានរកឃើញមាននូវសារធាតុផ្សំ (បូរ៉ាក់ ឬទឹកអន្សា) លេខK.H.13.005339F5 ចុះថ្ងៃទី១៥ កក្កដា ២០១៦ ។
គួររំលឹកថា សិប្បកម្មសរសៃគុយទាវមួយកន្លែងដែលគ្មានច្បាប់ ត្រូវបានកម្លាំងការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការខេត្ត សហការជាមួយមន្ត្រីនៃមន្ទីរឧស្សាហកម្ម និងសិប្បកម្មខេត្ត បានចុះពិនិត្យទីតាំងផលិតគុយទាវសរសៃធំ គ្មានច្បាប់ទម្លាប់ និងគ្មានអនាម័យ ទើបសម្រេចឱ្យបិទជាបណ្តោះអាសន្ន កាលពីថ្ងៃទី១២ កក្កដា ២០១៦ ស្ថិតក្នុងភូមិវត្តបូព៌ សង្កាត់សាលាកំរើក ក្រុងសៀមរាប។
លោកវរសេនីយ៍ឯក សឿន សេន បានប្រាប់កោះសន្តិភាព នៅថ្ងៃទី២៧ កក្កដា ថា បន្ទាប់ពីបានចុះប្រតិបត្តិការត្រួតពិនិត្យទីតាំងផលិតសរសៃគុយទាវខាងលើរួចមក ក៏រកឃើញថា ទីតាំងខាងលើពិតជាគ្មានច្បាប់ និងគ្មានអនាម័យ ធ្វើឱ្យខូចសុខភាពដល់ប្រជាពលរដ្ឋទូទាំងខេត្តសៀមរាបផងនោះ ទើបលោកសម្រេចយកម្សៅ.សទៅចូលឡាបូនៅរាជធានីភ្នំពេញរបស់កាំកុងត្រូល
លោកបន្តថា ក្រោយពីសរសៃគុយទាវមានជាតិផ្សំ (បូរ៉ាក់ ឬទឹកអន្សា) ហៅ(ម្សៅ.ស) នោះ បានចេញពីឡាបូមកឃើញថា លទ្ធផលនៃមន្ទីរពិសោធន៍របស់អគ្គនាយកដ្ឋានកាំកុងត្រូលភ្នំពេញលេខ K.H.13.005339F5 ចុះថ្ងៃទី១៥ កក្កដា ២០១៦ គឺជាសារធាតុគីមីម្សៅដែលខាងជំនាញបញ្ជាក់ថា មិនអាចដាក់លក់នៅលើម្ហូបអាហារបានទេ ពីព្រោះវាធ្វើឱ្យប៉ះពាល់ដល់សុខភាពអ្នកប្រើប្រាស់យ៉ាងធ្ងន់ធ្ងរ ដូចជាជំងឺដែលទាក់ទងទៅនឹងប្រដាប់រំលាយអាហារ និងជំងឺតម្រងនោមជាដើម ។
លោកបញ្ជាក់ថា ម្ចាស់សិប្បកម្មមានឈ្មោះយោក គឹមស៊ុន ភេទស្រី អាយុ៥៥ឆ្នាំ មានទីលំនៅភូមិវត្តបូព៌ សង្កាត់សាលាកំរើក ក្រុងសៀមរាប បានបើកសិប្បកម្មនេះ មកដល់ថ្ងៃបិទគឺមានរយៈពេល៥ឆ្នាំ ហើយផលិតចេញបានចាប់ពី៤០គីឡូ ទៅ៥០គីឡូក្នុង១ថ្ងៃ រួចយកទៅបោះដុំនៅម្តុំផ្សារលើធំថ្មី និងផ្សារចាស់ ព្រមទាំងឱ្យកូនចៅដើរលក់ថែមទៀតផង ។
លោកបញ្ជាក់បន្ថែមថា បន្ទាប់ពីបានរកឃើញមាននូវសារធាតុគីមី បូរ៉ាក់ ឬទឹកអន្សានោះមក លោកបានចោទប្រកាន់ទៅលើម្ចាស់សិប្បកម្មនេះ មាន២ករណីករណីទី១-ចោទពីបទបើកសិប្បកម្មគ្មានច្បាប់អនុញ្ញាតិពីមន្ទីរឧស្សាហកម្ម និងសិប្បកម្មខេត្ត និងករណីទី២-យោងតាមច្បាប់ ស្តីពីការគ្រប់គ្រងរោងចក្រនិងសិប្បកម្ម តាមមាត្រា៤៣ និងមួយករណីទៀត តាមមាត្រា៦៣យោងតាមច្បាប់គ្រប់គ្រងគុណភាពសុវត្ថភាពលើផលិតផលទំនិញ និងសេវា ។
បច្ចុប្បន្ន ម្ចាស់សិប្បកម្មត្រូវបានកម្លាំងជំនាញរបស់ការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការខេត្តកំពុងរៀបចំសំណុំរឿងបញ្ជូនទៅតុលាការតាមមាត្រា៦៣ អាចចាប់គុកពី១ខែ ទៅ១ឆ្នាំ និងពិន័យជាប្រាក់ពី៥ ទៅ១០លានរៀល ឬទោសណាមួយ ក្នុងចំណោមទោសទាំង២ នេះជាលើកទី១ ដែលត្រូវបានបញ្ជូនម្ចាស់សិប្បកម្មគ្មានច្បាប់ទៅតុលាការ ។
ប្រភព៖ កោះសន្តិភាព
ប្រភព៖ កោះសន្តិភាព
កំណត់ហេតុខ្មែរឡូត៖ ស្រដៀងគ្នានេះដែរ ករណីមួយផ្សេងទៀត មន្ត្រីកាំកុងត្រូលសាខាខេត្តសៀមរាប ដឹកនាំដោយលោក ង៉ែត ចេក ប្រធានសាខា សហការ ជាមួយមន្ត្រីមន្ទីពាណិជ្ជកម្ម រួមជាមួយអាជ្ញាធរមូលដ្ឋាន កាលពីថ្ងៃទី២១ ខែកក្កដា ឆ្នាំ២០១៦បានចុះត្រួតពិនិត្យទំនិញ នៅផ្សារលើធំថ្មី ក្រុងសៀមរាប ខេត្តសៀមរាប ដោយបានរកឃើញសរសៃគុយទាវផ្ទុកសារធាតុគីមី ចំនួន ៦.៥០គីឡូក្រាម ។
លោកប្រធានសាខា បានឲ្យដឹងថា គោលបំណងនៃការចុះពិនិត្យនេះ មន្ត្រីជំនាញ បានយកចិត្តទុកដាក់ជាសំខាន់ ទៅលើផលិតផលទំនិញ ម្ហូបអាហារ ភេសជ្ជៈ គ្រឿងឧបភោគ បរិភោគ បន្លែ ផ្លែឈើ ដែលអាជីវករដាក់តាំងលក់ នៅលើទីផ្សារ ឲ្យទទួលបាននូវ ម្ហូបអារហារ ប្រកបដោយ សុវត្ថិភាព និងមិនប៉ះពាល់ដល់ សុខភាព ។
តាមរយៈការចុះត្រួតពិនិត្យនៅផ្សារលើធំថ្មីនេះ កំលាំងចំរុះបានរកឃើញ និងធ្វើកិច្ចសន្យាដកហូត ទំនិញខូចគុណភាព ហួសកាលបរិច្ឆទប្រើប្រាស់ដូចជា ប្រេងខ្យង ម៉ាក Maggi ទឹកស៊ីអ៊ីវ ម៉ាក Maggi សរុបចំនួន ២០ ដប ។ ទំពាំងកំប៉ុង ដល់កាលបរិច្ឆទ ប្រើប្រាស់ ចំនួន ៣កំប៉ុង ។ និងបានត្រួតពិនិត្យមើលលើ សរសៃមី គុយទាវ និងរកឃើញសរសៃគុយទាវមានផ្ទុកសារធាតុគីមីហាមឃាត់ Borax ចំនួន ៦.៥០គីឡូក្រាម។
ផ្តើមចេញពីទីផ្សារ មន្ត្រីជំនាញកាំកុងត្រួល ក៏បានរកឃើញទីតាំងផលិតសរសៃគុយទាវ ពុំទាន់មានច្បាប់ ស្ថិតនៅ ភូមិតាកុយ សង្កាត់ស្វាយដង្កំ ក្រុងសៀម រាប ខេត្តសៀម រាប មានម្ចាស់ឈ្មោះ តាន់ ធីតា ។ ហើយធ្វើកិច្ចសហការជាមួយសមត្ថកិច្ចពាក់ព័ន្ធ ដូចជា មន្ទីរពាណិជ្ជកម្ម មន្ទីរឧស្សាហកម្ម ក្រោមការដឹកនាំរបស់លោក ជួន សុបញ្ញា ព្រះរាជអាជ្ញារង អមសាសាដំបូងខេត្តសៀម រាប ទំនិញខូចគុណភាពនេះត្រូវបានរក្សាទុក ដើម្បីពិនិត្យ និងកំទេចចោលនៅពេលក្រោយ ។
ចំពោះទីតាំងផលិតត្រូវបានបិទជាបណ្តោះអាសន្ន រង់ចាំនីតិវិធីផ្លូវច្បាប់ ។ លោកប្រធានសាខាបានបញ្ជាក់ទៀតថា ការចុះពិនិត្យនេះ គឺធ្វើឡើងជាប្រចាំ តាមការណែនាំចង្អុលបង្ហាញពី លោក ម៉ក់ ពេជ្ជរិទ្ធ ប្រតិភូរាជរដ្ឋាភិបាល ទទួលបន្ទុកជាអគ្គនាយកកាំកុងត្រូល ក្នុងគោលបំណង ការពារផល ប្រយោជន៏ និង សុខភាពអ្នកប្រើប្រាស់ និងទប់ស្កាត់ទាន់ពេលវេលា នូវការធ្វីចររាចរ ចែកចាយ លក់ដូរផលិតផល ទំនិញ ខូចគុណភាព ។
ជាមួយគ្នានេះដែរ លោកក៏បានអំពាវនាវ ដល់អាជីវករ អ្នកលក់ដូរទាំងអស់ ឲ្យប្រុងប្រយ័ត្ន និងយកចិត្តទុកដាក់ខ្ពស់ គឺលក់ដូរ និងចែកចាយតែ ទំនិញ ផលិតផលម្ហូបអាហារណាដែលមានគុណភាព មិនប៉ះពាល់ដល់ សុខមាលភាព អ្នកប្រើប្រាស់ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
