ខេត្តមណ្ឌលគិរី ៖ ប្រជាពលរដ្ឋ១គ្រួសារ មកពីភូមិឡៅការ ចុះប្តឹងសមត្ថកិច្ចខេត្តមណ្ឌលគិរីឱ្យជួយរកយុត្តិធម៌ផង បន្ទាប់ពីផ្ទះរបស់គាត់ ត្រូវម្ចាស់ប្រាក់បំណុលរុះរើយក ធ្វើឱ្យក្រុមគ្រួសារគាត់ គ្មានកន្លែងស្នាក់នៅ ដែលហេតុការណ៍នេះ កើតឡើងកាលពីថ្ងៃទី២១ កក្កដា ២០១៦ ស្ថិតនៅភូមិឡៅការ សង្កាត់សុខដុម ក្រុងសែនមនោរម្យ ខេត្តមណ្ឌលគិរី ។
ម្ចាស់ផ្ទះខាងលើ មានប្តីឈ្មោះខ្វើង ខត អាយុ២៨ឆ្នាំ ជនជាតិព្នង និងប្រពន្ធឈ្មោះអ៊ុន សុភាស់ អាយុ២៦ឆ្នាំ ត្រូវបានគេរុះរើផ្ទះក្នុងភូមិ-ឃុំកើតហេតុខាងលើ បានរៀបរាប់ថា គ្រួសារគាត់ពីដំបូង ពិតជាបានទៅចងការប្រាក់ ពីគ្រួសារមួយនៅភូមិជាមួយគ្នា មានប្តីឈ្មោះឡឹក ផល្លី និងប្រពន្ធឈ្មោះភុន ណារី (ជាម្ចាស់ប្រាក់) ខ្ចីម្តង៤០ម៉ឺនរៀល និងបន្តបន្ទាប់ដល់១លានរៀលចំនួន៣ ទៅ៤ដង ។
ដោយម្ចាស់ប្រាក់ កំណត់ខ្ចី១លានរៀល ការប្រាក់ក្នុង១ខែ៣៧៥០០០រៀល គាត់បានព្យាយាម បង់ការប្រាក់ជូនរហូត ប៉ុន្តែរយៈពេលចុងក្រោយ ជាង១ខែនេះ រូបគាត់មិនបានបង់ការ ឱ្យគាត់ជាម្ចាស់ប្រាក់ ។ ស្រាប់តែម្ចាស់ប្រាក់ គិតលុយការបូកចូលប្រាក់ដើម លុយដើមធ្វើជាការ រហូតដល់រូបគាត់ជំពាក់គេ ជាង៤០០០ដុល្លារ ។ ថាប៉ុណ្ណឹងក៏ប៉ុណ្ណឹងចុះ គ្រួសារគាត់នៅតែព្រមទទួលសង មិនបានប្រកែកអ្វីទេ ប៉ុន្តែនៅពេលដែលក្រុមគ្រួសារគាត់ ទៅមើលបងប្អូនឈឺ២-៣ថ្ងៃ ពេលត្រឡប់មកវិញ នៅថ្ងៃទី២២ កក្កដា ផ្ទះរបស់គាត់ស្រាប់តែ ត្រូវម្ចាស់ប្រាក់ រុះរើយកផ្ទះគាត់អស់គ្មានសល់ ធ្វើឱ្យក្រុមគ្រួសារគាត់ សុំផ្ទះអ្នកស្រុកស្នាក់អាស្រ័យ ។
នៅរសៀលថ្ងៃទី២២ កក្កដា ដដែល ២នាក់ប្តីប្រពន្ធនិងកូនតូចៗ២នាក់ បានមកប្តឹងសមត្ថកិច្ចខេត្តមណ្ឌលគិរី ជួយរកយុត្តិធម៌ ដល់ក្រុមគ្រួសារគាត់ ដែលត្រូវម្ចាស់ប្រាក់រំលោភបំពានច្បាប់ និងទារសំណងជំងឺចិត្ត៤០លានរៀល និងចាត់ការតាមផ្លូវច្បាប់ ។
លោកខ្លឹម មើល ជាមេភូមិឡៅការ បានប្រាប់ថា រឿងនេះ លោកមិនបានដឹងសាច់រឿងទេ ។ លោកអិន អៀវ ចៅសង្កាត់សុខដុម បានបញ្ជាក់ប្រាប់អ្នកព័ត៌មានថា រូបគាត់បានប្រាប់ទៅ ម្ចាស់ប្រាក់ដែរថា កុំឱ្យធ្វើការរុះរើផ្ទះរបស់គេ វាជារឿងខុសច្បាប់ ។ ប៉ុន្តែទោះបីយ៉ាងណា ម្ចាស់ប្រាក់នៅតែបំពាន ។
លោក ឡុង វិបុល អភិបាលក្រុងសែនមនោរម្យឱ្យដឹងដែរថា ទង្វើបែបនេះ គឺជារឿងខុសច្បាប់ ។ លោកសូរ សុវណ្ណ ស្នងការរងខេត្តមណ្ឌលគិរីឱ្យដឹងថា រឿងរ៉ាវនេះ លោកកំពុង ចាត់ចែងឱ្យអធិការក្រុង អញ្ជើញឈ្មោះអ្នករុះរើផ្ទះ ដោយខុសច្បាប់នោះ មកសួរនាំ និងចាត់ការបន្ត ។
លោកកាន់ ពេញ អធិការក្រុងសែនមនោរម្យ បានបញ្ជូនមន្ត្រីនគរបាល របស់អធិការក្រុងឱ្យទៅ អញ្ជើញឈ្មោះឡឹក ផល្លី និងឈ្មោះភុន ណារី មកសួរនាំពាក់ព័ន្ធការរុះរើផ្ទះរបស់អ្នកស្រុក ដោយខុសច្បាប់ បំពានច្បាប់ និងថែមទាំងគ្មានអំណាចពីតុលាការទៀត
បើតាមព័ត៌មាន នៅខេត្តមណ្ឌលគិរីថា មានក្រុមអ្នកមានប្រាក់ ជាច្រើននាំគ្នាដាក់ប្រាក់កំចី ជាលក្ខណៈឯកជន ដែលមានអត្រា ការប្រាក់ខ្ពស់កប់ពពក ដែលទង្វើបែបនេះ គឺជាការរំលោភលើ ច្បាប់ធនាគារជាតិនៃកម្ពុជា យ៉ាងធ្ងន់ធ្ងរ ។ ជាពិសេស ទង្វើនេះ វាបាននិងបង្កផលប៉ះពាល់ ដល់ជីវភាពរបស់ ប្រជាពលរដ្ឋផងដែរ ។ ទាក់ទងទៅនិងករណីខាងលើនេះ យើងមិនអាចសុំការ បំភ្លឺពីម្ចាស់ប្រាក់ រងការចោទប្រកាន់នោះបានទេ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]