(ភ្នំពេញ)៖ នេះជាលើកទី២សម្រាប់តារាចម្រៀង របស់ផលិតកម្មភ្លេងរីខត កញ្ញា វ៉ាន់ នីឡា បានឡើងបង្ហាញវត្តមាន នៅលើ Page Facebook របស់សម្តេចតេជោ ហ៊ុន សែន ខណៈរឿងអាស្រូវ នៃការបែកធ្លាយរូបអាក្រាតកាយ នៅតែមិនទាន់មានតម្រុយ ស្វែងរកចាប់ជនអនាមិកឃើញ នៅឡើយនោះ។
បន្ទាប់ពីមានការលើកទឹកចិត្ត និងជួយជ្រោមជ្រែង យ៉ាងខ្លាំងពីសំណាក់ អ្នកគាំទ្រ ក៏ដូចជាសិល្បៈដូចគ្នា បានធ្វើឲ្យតារាចម្រៀង កញ្ញា វ៉ាន់ នីឡា ដែលកំពុងតែជួបប្រទះ នូវរឿងរ៉ាវអាស្រូវ បែកធ្លាយរូបភាពស្រាត មានកម្លាំងចិត្ត និងអារម្មណ៍ធូរស្រាលរឹងប៉ឹងឡើងវិញ ដើម្បីជំនះតស៊ូ នៅក្នុងសមរភូមិសិល្បៈជាបន្តទៀត។ ជាមួយនឹងភាពស្រស់ស្រាយ ឡើងវិញនេះ តារាចម្រៀង វ៉ាន់ នីឡា ក៏បានផ្ដល់កិច្ចសម្ភាសន៍ ជាមួយនឹងអ្នកនាង ចន ច័ន្ទលក្ខិណា ផ្សាយផ្ទាល់ក្នុង Page Facebook សម្ដេចតេជោ ហ៊ុន សែន រៀបរាប់ខ្លះៗ ពីប្រវត្តិមុននឹងនាងក្លាយជា តារាចម្រៀងល្បី រហូតមកដល់សព្វថ្ងៃនេះ។
តារាចម្រៀងកញ្ញា វ៉ាន់ នីឡា បាននិយាយនៅក្នុងឱកាសនោះថា «ក្រោយពីមានការលើកទឹកចិត្តជាច្រើន ពីសំណាក់ទស្សនិកជន បានធ្វើឲ្យខ្ញុំមានអារម្មណ៍កក់ក្តៅក្នុងចិត្ត ដើម្បីបន្តការតស៊ូទៅមុខ ហើយកំហុសខ្ញុំទទួលស្គាល់ តែអ្វីដែលសំខាន់ដែលចង់បានបំផុតនោះ គឺការលើកទឹកចិត្ត ពីមជ្ឈដ្ឋានមហាជន!»។
វ៉ាន់ នីឡា បានប្រាប់ថា មុននឹងនាងក្លាយជាតារាចម្រៀង មានទ្រនំជ្រកត្រឹមត្រូវ ពីដំបូងនាងក៏ធ្លាប់ជាតារាចម្រៀង ច្រៀងតាមរោងការ និងតាមកម្មវិធីផ្សេងៗផងដែរ ដោយសារតែការពេញចិត្ត និងចូលចិត្តអាជីពជាតារាចម្រៀង។ រហូតមកដល់ពេលធំដឹងក្ដី នាងក៏បានសុំបងប្រុស គឺលោក សុខ ជំនោរ ដើម្បីបានចូលច្រៀងក្នុងផលិតកម្ម ប៉ុន្តែបងប្រុសប្រាប់ថា នាងនៅក្មេងកុំទាន់ចង់ច្រៀងអី ធ្វើឲ្យរូបនាងចេះតែទទូចព្យាយាម ម្ដងហើយម្ដងទៀត ទម្រាំបងប្រុសដាច់ចិត្តជ្រើសយកនាង ឲ្យចូលច្រៀង។
ចង់ដឹងថា តើតារាចម្រៀង វ៉ាន់ នីឡា មានប្រវត្តិតស៊ូយ៉ាងណា មុននឹងបានចូលប្រឡូកក្នុងសិល្បៈ សមតាមបំណងរបស់នាង សូមទស្សនាកិច្ចសម្ភាសន៍ទាំងស្រុង ដូចខាងក្រោម៖
ប្រភព៖ Khmertalking
កំណត់ហេតុខ្មែរឡូត៖
ទាក់ទងនឹងរឿងរ៉ាវកញ្ញា វ៉ាន់ នីឡា កញ្ញាក៏ធ្លាប់បានផ្តល់បទសម្ភាស៍ម្តងដែរ គួររំលឹកផងដែរថា តារាចម្រៀងរាងតូចច្រឡឹង សម្ដីស្រទន់ ប្រចាំក្នុងផលិតកម្ម ភ្លេងរីខដ កញ្ញា វ៉ាន់ នីឡា បានបង្ហាញវត្តមានផ្ដល់បទសម្ភាសន៍គួរឲ្យភ្ញាក់ផ្អើលជាមួយនឹង ក្រុមការងារផ្សាយផ្ទាល់ Facebook របស់សម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា ខណៈដែលការបង្ហាញវត្តមានតាមរយៈកម្មវិធីប្រគំតន្រ្តី តាមស្ថានីយទូរទស្សន៍នានា ត្រូវបានលុបចោលជាបន្តបន្ទាប់ ក្រោយពីតារាចម្រៀងរូបនេះ ទទួលរងគ្រោះដោយសារតែជនអនាមិក ដែលគេសង្ស័យថាជាអតីតសង្សាររបស់នាង ទម្លាយរូបស្រាតជាសាធារណៈរួចមក។
ពិតណាស់ថា បន្ទាប់ពីជួបប្រទះនូវរឿងរ៉ាវដ៏អាម៉ាស ប្រចាំក្នុងជីវិតជាស្រ្តីរួចមក គេសង្កេតឃើញថា កញ្ញា វ៉ាន់ នីឡា ហាក់ទទួលរងនូវការបាក់កម្លាំងចិត្តជាខ្លាំង រហូតពេលខ្លះនាងបានបញ្ចេញសារលែងចង់រស់ ព្រោះតែការពេបជ្រាយពីមហាជនចំពោះកំហុសគ្មានការពិចារណា របស់នាងក្នុងរយៈពេលតែមួយប៉ប្រិចភ្នែក ។ ប៉ុន្តែក្នុងនោះក៏មានអ្នកសិល្បៈ និងអ្នកគាំទ្រនាង ជាច្រើនទៀត បានផ្ដល់កម្លាំងចិត្ត និងត្រូវតែតស៊ូជំនះ កុំចុះចាញ់ឲ្យសោះ ព្រោះមនុស្សតែងមានកំហុសខុសឆ្គងខ្លះៗ ជារឿងធម្មតា។
ដើម្បីជាការជួយទាំងកម្លាំងចិត្ត និងផ្លូវច្បាប់ ប្រធានសមាគម «មិត្តសិល្បៈស្ម័គ្រចិត្តជួយសង្គម» អ្នកនាង ចន ច័ន្ទលក្ខិណា បានប្រកាសផ្ដល់មេធាវីដល់ កញ្ញា វ៉ាន់ នីឡា ដើម្បីតតាំងផ្នែកផ្លូវច្បាប់ ចំពោះបណ្ដឹងរបស់នាងដែលបានប្ដឹងវែករកមុខជនអនាមិកទម្លាយរូបស្រាតទៅតុលាការ ក្នុងការទទួលបាននូវយុត្តិធម៌ ដើម្បីស្តារ និងស្រោចស្រង់កេរ្តិ៍ឈ្មោះ កិត្តិយសរបស់នាងមកវិញ។ ស្របពេលជាមួយនឹងសំណុំរឿងកំពុងតែដំណើរការ គេសង្កេតឃើញស្រីស្រស់ វ៉ាន់ នីឡា ហាក់មានការប្រយ័ត្នប្រយែងខ្ពស់ក្នុងការបង្ហាញវត្តមានតាមទីសាធារណៈនានា ព្រោះជនអនាមិក បានតាមគំរាមកំហែងនាងគ្រប់ពេល។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]