ទិដ្ឋភាពស្តែង ថតបានពេល ពួក ISIS ចូលទៅបំផ្ទុះគ្រាប់បែក អត្តឃាត នៅក្នុងព្រលានយន្តហោះ Istanbul (មានវីដេអូ)

តួកគី៖ វីដេអូស្តែងមួយ ថតជាប់ដោយកាមេរ៉ាសុវត្ថិភាព ដែលបង្ហាញពីសកម្មភាព របស់ពួក ISIS ចូលទៅបំផ្ទុះគ្រាប់បែកអត្តឃាត នៅក្នុងបរិវេណព្រលានយន្តហោះ បានកំពុងតែធ្វើឲ្យមនុស្សជាច្រើន មានការចាប់អារម្មណ៍ និងតក់ស្លុតយ៉ាងខ្លាំង។

យោងតាមប្រភពព័ត៌មាន បានឲ្យដឹងថា កាលពីយប់ថ្ងៃពុធម្សិលមិញនេះ មានអំពើភេរវកម្មមួយ បានវាយប្រហារទៅលើ ព្រលានយន្តហោះ Ataturk ដែលស្ថិតនៅក្នុងទីក្រុង Istanbul ប្រទេសតួកគី ដោយក្នុងនោះផ្អែកលើរបាយការណ៍ចុងក្រោយ បានបញ្ជាក់ថា មានមនុស្សយ៉ាងហោចណាស់ ៤១នាក់បានស្លាប់ និង២៣៩នាក់ផ្សេងទៀត រងរបួសធ្ងន់-ស្រាល។

ស្របពេលជាមួយគ្នានេះដែរ សកម្មភាពរបស់ភេរវករម្នាក់ ដែលបានដើរចូលមកបំផ្ទុះ គ្រាប់បែកអត្ថឃាត ស្ថានីយ៍អ្នកដំណើរ ត្រូវបានថតជាប់ដោយកាមេរ៉ាសុវត្ថិភាពមួយ ហើយមនុស្សជាច្រើន កំពុងតែមានការចាប់អារម្មណ៍ ទៅលើវីដេអូមួយនេះ។

បើយើងមើលតាមវីដេអូ នោះយើងនឹងបានឃើញថា ក្នុងអំឡុងពេលដែល មានមនុស្សជាច្រើន កំពុងដើរទៅមកនៅក្នុងស្ថានីយ៍ ក៏ស្រាប់តែមានបុរសម្នាក់ ដើរចូលមកយ៉ាងលឿន រួចក៏បំផ្ទុះគ្រាប់បែក ដែលបង្កប់នៅក្នុងអាវកាក់របស់គេភ្លាមៗ ដែលនាំឲ្យមានកម្លាំងផ្ទុះយ៉ាងខ្លាំងនៅទីនោះ។

ក្រុមប៉ូលីសបានអះអាងថា ក្នុងសកម្មភាពវាយប្រហារ របស់ក្រុមសកម្មជន ឥស្លាមជ្រុលនិយម ISIS មិនត្រឹមតែមានជាលក្ខណៈ បំផ្ទុះគ្រាប់បែកអត្តឃាតប៉ុណ្ណោះទេ ក៏នៅមានសកម្មជនផ្សេងទៀត ឈរចាំនៅខាងក្រៅស្ថានីយ៍ ប្រដាប់ដោយកាំភ្លើង AK-47 ធ្វើការបាញ់រះទៅលើ ក្រុមមនុស្សដែលព្យាយាមរត់ចេញមកខាងក្រៅ តែទោះយ៉ាងណា ក្រុមប៉ូលីសរក្សាសន្តិសុខ នៅទីនោះ ក៏បានធ្វើការរារាំង និងបង្ក្រាប ដែលនាំឲ្យចំនួន មនុស្សស្លាប់ មិនមានទំហំធំធេង៕

ខាងក្រោមនេះគឺជា វីដេអូដែលថតបាន អំពីសកម្មភាពរបស់ភេរវករ៖  

ប្រភព៖ ដេលីម៉េល

កំណត់ហេតុខ្មែរឡូត៖

គូសបញ្ជាក់ផងដែរ អំពើភេរវកម្មមួយទៀតហើយ បានកើតឡើងកាលពីយប់មិញ ថ្ងៃទី២៨ មិថុនា ២០១៦ នៅព្រលានយន្តហោះAtaturk នៃទីក្រុង Istanbul និងបានឆក់យកអាយុជីវិត មនុស្សយ៉ាងតិច ៥០នាក់ និង៦០នាក់ផ្សេងទៀត រងរបួសធ្ងន់-ស្រាល។

យោងតាមប្រភពព័ត៌មានបានឲ្យដឹងថា ហេតុការណ៍នេះបានកើតឡើង នៅវេលាម៉ោងប្រមាណជា៨ល្ងាច (ម៉ោងក្នុងស្រុក)។​ សាក្សីនៅកន្លែងកើតហេតុ បានឲ្យដឹងថា សន្តិសុខម្នាក់ បានព្យាយាមស្ទុះទៅចាប់ភេរវករ រារាំងមិនឲ្យចូលក្នុងស្ថានីយ៍អ្នកដំណើរ តែភ្លាមៗភេរវករ បានបំផ្ទុះគ្រាប់បែក ជាប់នឹងអាវកាក់ បណ្តាលឲ្យមានការផ្ទុះឡើងយ៉ាងខ្លាំង។ ចំណែកលទ្ធផលមកទល់ពេលនេះ មានមនុស្សរហូតដល់៥០នាក់ហើយបានស្លាប់ ស្របពេលដែល ៦០នាក់ផ្សេងទៀត រងរបួសធ្ងន់-ស្រាល។

ប្រភពព័ត៌មានបានធ្វើសេចក្តីរាយការណ៍ថា ក្រុមឥស្លាមជ្រុលនិយម ISIS ជាអ្នកនៅពីក្រោយអំពើវាយប្រហារភេរវកម្មនេះ។ តែទោះយ៉ាងណា ក្រុមនេះមិនទាន់ចេញមុខអះអាងទទួលខុសត្រូវនៅឡើយទេ។

គូសបញ្ជាក់ដែរថា ព្រលានយន្តហោះ Ataturk របស់ប្រទេសតួកគី ជាព្រលានយន្តហោះមមាញឹកបំផុតលំដាប់ទី៣ប្រចាំទ្វីបអឺរ៉ុប ហើយក្រុមហ៊ុនអាកាសចរណ៍របស់តួកគីជាច្រើន ជាដៃគូសហការផ្លូវការ ក្នុងព្រឹត្តិការណ៍ប្រកួតបាល់ទាត់ពានរង្វាន់ ទ្វីបអ៉ឺរ៉ុប ឆ្នាំ២០១៦ ដែលកំពុងប្រព្រឹត្តទៅ នៅប្រទេសបារាំងផងដែរ៕