រាជធានីភ្នំពេញ ៖ អ្នកនាងសុខ ចាន់ធីតា ហៅតុ សម្រេចឲ្យស្វាមី គឺនាយខ្យងផ្អាកអាជីពសិល្បៈប្រមាណកន្លះឆ្នាំ បន្ទាប់ពីបានធូរស្បើយពីជំងឺបេះដូង ។ នាយខ្យងត្រូវបានបញ្ជូនភ្លាមទៅកាន់មន្ទីរពេទ្យក្នុងប្រទេសវៀតណាម បន្ទាប់ពីជំងឺបេះដូងកើតឡើងទាំងមិនដឹងខ្លួន ហើយបន្ទាប់មកត្រូវបានដឹកទៅសង្គ្រោះម្តងទៀតនៅយប់ថ្ងៃទី១៨ ខែមិថុនា ២០១៦ នៅមន្ទីរពេទ្យកាល់ម៉ែត ដោយសារជំងឺដដែលនោះ ។
សម្រាកព្យាបាលក្នុងមន្ទីរពេទ្យកាលម៉ែតរយៈពេល៣ថ្ងៃ អាការជំងឺរបស់នាងខ្យង បានធូរស្បើយ និងត្រូវក្រុមគ្រូពេទ្យអនុញ្ញាតឲ្យចេញទៅផ្ទះនៅថ្ងៃទី២១ ខែមិថុនា ឆ្នាំ២០១៦ ។ បន្ទាប់ពីចេញពីមន្ទីរពេទ្យ អ្នកនាងតុ អះអាងថា នាងសម្រេចឲ្យស្វាមីផ្អាកអាជីពរយៈពេលកន្លះឆ្នាំសិន ដើម្បីទុកពេលថែទាំងសុខភាព ចំណែកជីវភាពក្នុងគ្រួសារ គឺអ្នកនាងទទួលរ៉ាប់រងម្នាក់ឯង។
ថ្លែងប្រាប់កោះសន្តិភាពតាមទូរស័ព្ទអ្នកនាង សុខ ចាន់ធីតា ហៅតុឱ្យដឹងថា ស្វាមីរបស់នាងបានធូរស្បើយពីជំងឺច្រើនហើយ បន្ទាប់ពីមានការយកចិត្តទុកដាក់ពីក្រុមគ្រូពេទ្យនៃមន្ទីរពេទ្យកាលម៉ែត ។ ជំងឺរបស់ស្វាមីនាងត្រូវយកចិត្តទុកដាក់ និងផ្តល់ការលើកទឹក ដើម្បីឲ្យជំងឺអាចជាសះស្បើយ ហេតុនេះនាងសម្រេចឲ្យស្វាមីផ្អាកការងារមួយរយៈសិន ពោលគឺប្រហែលជា៥ទៅ៦ខែ ដើម្បីទុកពេលឲ្យថែសុខភាពបានល្អ ។ ក្រុមគ្រូពេទ្យឲ្យស្វាមីនាងតុសម្រាកការងារត្រឹមរយៈពេល៣ខែប៉ុណ្ណោះ ប៉ុន្តែដោយការស្រឡាញ់ និងគិតគូរពីអាយុជីវិតស្វាមីនោះនាងសម្រេចឲ្យស្វាមីសម្រាកឲ្យបានយូរជាងនេះ ។
ចំពោះការរ៉ាប់រងជីវភាពគ្រួសារ គឺនាងតុទទួលបន្ទុកម្នាក់ឯង ព្រោះមិនចង់ឲ្យស្វាមីហត់នឿយក្នុងអំឡុងពេលនេះឡើយ ព្រោះនាងគិតពីស្វាមី និងមិនចង់បាត់បង់ឡើយ ។ អ្នកនាងតុឲ្យដឹងថា ស្វាមីនាងមិនបានដឹងខ្លួនថាមានជំងឺបេះដូងទេ ប៉ុន្តែក្នុងរយៈពេលប៉ុន្មានថ្ងៃចុងក្រោយស្រាប់តែមានអាការគេងមិនលក់ ហើយចាប់ផ្តើមធ្វើទុក្ខក្រពះ ឈានដល់បេះដូងតែម្តង ។ អាការជំងឺពេលបញ្ជូនទៅសង្គ្រោះនៅមន្ទីរពេទ្យ ម្តងៗគឺមានការរន្ធត់តក់ស្លុតខ្លាំង ខណៈពេលដែលក្រុមគ្រូពេទ្យនៅប្រទេសវៀតណាមអះអាងថា នៅតែមួយម៉ោងទៀតប៉ុណ្ណោះស្វាមីរបស់អ្នកនាងនឹងស្លាប់បាត់បង់ជីវិត ។ ក្រោយពីចេញពីមន្ទីរពេទ្យវៀតណាម ស្វាមីនាងចូលសង្គ្រោះម្តងទៀត នៅមន្ទីរពេទ្យកាល់ម៉ែត បន្ទាប់ពីអាការជំងឺរើឡើងវិញ ភ្លាមៗ ។ ហេតុដែលអាការជំងឺរើឡើងជាថ្មីនេះ គឺជាការធ្វេសប្រហែស ដោយសារតែក្រុមគ្រូពេទ្យហាមមិនឲ្យស្វាមីនាងហូបប្រៃ និងហឹរខ្លាំងឡើយ តែថ្ងៃនោះស្វាមីនាងហូបហឹរ ។
អ្នកនាងតុបានថ្លែងអំណរគុណក្រុមគ្រូពេទ្យនៅមន្ទីរពេទ្យកាលម៉ែតដែលបានយកចិត្តទុកដាក់មើលថែជំងឺស្វាមីនាងរហូតបានធូរស្រាល និងបានណែនាំឲ្យស្វាមីនាងថែទាំសុខភាព និងត្រូវលេបថ្នាំរៀងរាល់ថ្ងៃតាមវេជ្ជបញ្ជា ៕
ប្រភព៖ កោះសន្តិភាព
កំណត់ហេតុខ្មែរឡូត
រំលឹកឡើងវិញផងដែរថា ស្វាមីរបស់ តារាកំប្លែងកាតុ បានចូលមន្ទីរពេទ្យម្តងទៀត ក្រោយពីរូបលោក ទើបចាកចេញពីមន្ទីរពេទ្យនៅប្រទេសវៀតណាម មិនទាន់បានប៉ុន្មានថ្ងៃស្រួលបួលផង។ នៅក្នុងទំព័រហ្វេសប៊ុក សិល្បករកម្ពុជា បានបង្ហាញពីស្ថានភាពលោកខ្យង ដែលត្រូវ ជាស្វាមី អ្នកនាង កាតុ បានចូលបន្ទប់សង្រ្គោះបន្ទាន់ម្តងទៀតហើយ នៅមន្ទីពេទ្យកាល់ម៉ែត្រ ដោយជំងឺបេះដូងរើឡើងវិញ ទាំងយប់តែម្តង។ដោយឃើញស្វាមីបានធ្លាក់ខ្លួនឈឺ ភ្លាមៗបែបនេះ អ្នកនាង កាតុ បានហូរទឹកភ្នែកដោយមិនដឹងខ្លួន ព្រោះតែរូបនាងបារម្ភ និងភ័យពីស្ថានភាពជម្ងឺស្វាមីនាងខ្លាំងពេក។
ជាមួយគ្នានោះដែរ ក៏ឃើញមានវត្តមានតារាល្បីៗជាច្រើន មកសួរសុខទុក្ខដល់មន្ទីពេទ្យភ្លាមៗដែរ មានលោក អ៊ឹម ជីវ៉ា លោកស៊ូ រតនៈ អ្នកនាងខាត់ សុឃីម និងស្វាមី ព្រមទាំងតារាចម្រៀង លោកករុណា ពេជ្រ លោកសុគន្ធ ថេរ៉ាយុ កញ្ញា អាលីហ្សា និង កញ្ញា ស្រីពៅ។
ចំណែកអ្នកគាំទ្រជាច្រើននាក់ បានបង្ហាញទឹកចិត្តបារម្ភ និងសួរសុខទុក្ខពីចំងាយ តាមបណ្តាញហ្វេសប៊ុក ទៅកាន់ស្វាមីរបស់អ្នកនាងកាតុផងដែរ ដើម្បីឲ្យជាសះស្បើយក្នុងពេលឆាប់ៗនេះ។
ប៉ុន្តែកាលពីប៉ុន្មាននាទីមុននេះ ទំព័រហ្វេសប៊ុកសិល្បករកម្ពុជាដដែល បានបង្ហាញព័ត៌មានលម្អិតបន្ថែមទៀត ពីស្ថានភាពជម្ងឺស្វាមី អ្នកនាងកាតុផងដែរថា ពេលនេះ រូបលោក បានធូរស្បើយបន្តិចហើយ ដោយមានការយកចិត្តទុក្ខដាក់ពី លោកគ្រូពេទ្យ តែនៅបន្តតាមដានជម្ងឺ២ ទៅ៣ថ្ងៃទៀតសិន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
