ទីបំផុត Esther ប្រកាសជាផ្លូវការ ទំនាក់ទំនងស្នេហា ជាមួយលោក Ken និងកុំឲ្យយកលោក Sean មកពាក់ព័ន្ធ

ថៃ៖ ថ្មីៗនេះ តារាសម្តែងគួរឲ្យស្រលាញ់ កញ្ញា Esther បានប្រកាសជាផ្លូវការថា ក្រោយពីមើលចិត្តគ្នាអស់មួយរយៈពេលមក  ឥលូវនេះនាងកំពុងតែមានទំនាក់ទំនងស្នេហាជាមួយតារាសម្តែងប្រុស ប្រចាំប៉ុស្តិ៍លេខ៣ថៃ គឺលោក Ken  ដែលដំណឹងនេះ បានធ្វើឲ្យអ្នកគាំទ្រជាច្រើន មានការភ្ញាក់ផ្អើលយ៉ាងខ្លាំង និងមិននឹកស្មានដល់ផងដែរ។

គួរឲ្យដឹងថា បន្ទាប់ពីទំនាក់ទំនងស្នេហារបស់ពួកគេ ត្រូវបានប្រកាសជាសាធារណៈរួចមក   កញ្ញា Esther ទទួលបានការរិះគន់មួយចំនួនពីសំណាក់អ្នកគាំទ្រ ជាពិសេសប្រិយមិត្តដែលតែងចង់ឃើញនាងនៅជាមួយលោក Sean  និងស្រលាញ់គ្នានៅក្នុងជីវិតពិត ទាំងដែលលោក Sean និងកញ្ញា Esther បានបញ្ជាក់ជាច្រើនលើកច្រើនសារ រួចមកហើយថា  ពួកគេមិនបានស្រលាញ់គ្នានោះទេ   ពួកគេស្រលាញ់ និងរាប់អានគ្នាចាត់ទុកដូចជាប្អូនបង  និងមិត្តរួមការងារតែប៉ុណ្ណោះ។

មិនថាយ៉ាងណា  បន្ទាប់ពីមតិរិះគន់បានរីករាលដាលមក  កញ្ញា Esther នាងបានឆ្លើយតបឲ្យដឹងផងដែរថា  នាងមិនខ្វល់អំពីមតិរិះគន់អ្វីទាំងអស់ សំខាន់នាងមានសេចក្តីសុខចំពោះអ្វីដែលនាងកំពុងធ្វើ  ហើយបើនាងនៅតែខ្វល់ និងខ្លាចការរិះគន់ពីមនុស្សនៅជុំវិញខ្លួនទៀតនោះ  ជីវិតនាងនឹងមិនអាចផ្លាស់ប្តូរ ឲ្យមានសេចក្តីសុខ ដូចអ្វីដែលនាងប្រាថ្នាបាននោះឡើយ។

នាងបន្តឲ្យដឹងទៀតថា ចំណែករឿងស្នេហារវាងនាង និងលោក Ken សូមកុំយកលោក Sean មកពាក់ពន្ធ័ ព្រោះថានាងនិងគាត់មិនមានទំនាក់ទំនងអ្វីលើសពីការលើកឡើងខាងដើមនោះទេ។

ទោះយ៉ាងណា ស្នេហារវាងកញ្ញា Esther និងលោក Ken ត្រូវបានគ្រួសារទាំងសងខាងដឹងលឺ និងយល់ព្រមឲ្យពួកគេស្រលាញ់គ្នា យ៉ាងបើកចំហទៀតផង ដូច្នោះហើយទើបធ្វើឲ្យស្នេហារបស់ពួកគេ កាន់តែមានភាពរឹងមាំ ដោយពេលដែលចង់ទៅណាមកណា មិនបាច់ខ្លាចក្រែង អ្វីតទៅទៀតឡើយ។

បន្ថែមពីនេះ មិនថា Esther នាងស្រលាញ់ទាក់ទងនរណានោះទេ ប៉ុន្តែអ្នកគាំទ្រភាគច្រើនរបស់នាងគឺនៅតែនៅក្បែរ និងរង់ចាំគាំទ្រនាងជានិច្ច ហើយក៏សូមជូនពរឲ្យអ្នកទាំង២ស្រលាញ់គ្នា ឲ្យបានយូរអង្វែងផងដែរ៕

ចំណាប់អារម្មណ៍ខ្មែរឡូត

យ៉ាងណាមិញ ប្រហែលជាប្រិយមិត្តពិតជាចង់ដឹងពី ប្រវត្តិរបស់នាង Esther និង លោក Sean Jindachot ហើយ ព្រោះថាពួកគេទាំងពីរនាក់ កំពុងតែទទួលបានភាពល្បីល្បាញយ៉ាងខ្លាំង ក្នុងមួយរយៈពេលកន្លងមកនេះ។

នាពេលបច្ចុប្បន្ន ចំពោះប្រិយមិត្តដែលនិយមចូលចិត្តទស្សនាខ្សែភាពយន្តភាគថៃ ភាគច្រើនគឺពួកគេប្រាកដជាបានស្គាល់ នូវតួឯកស្រីប្រុសទាំង២នាក់នេះហើយ ដែលពួកគេបានដើរតួជាមួយគ្នា នៅក្នុងរឿង «កូនប្រសារបំណុល» ឬ «leh Ratee» និងបានចាក់ផ្សាយ នៅក្នុងបុស្តិ៍ទូរទស្សន៍ល្បីឈ្មោះ ក្នុងប្រទេសកម្ពុជា ទៀតផង។ ដោយរឿងនេះផងដែរ គឺកំពុងតែទទួលបានការគាំទ្រជាខ្លាំងពី សំណាក់អ្នកគាំទ្រកម្ពុជា និង អ្នកគាំទ្រពីគ្រប់មជ្ឈដ្ឋានផ្សេងទៀតផងដែរ ប៉ុន្តែមិនថាយ៉ាងណា ប្រហែលជាមានប្រិយមិត្តមួយចំនួន នៅមិនទាន់បានដឹងពីជីវប្រវត្តិខ្លះៗរបស់តួសម្តែងទាំង២នាក់នេះនៅឡើយទេ។

ដូចនេះ សូមលើកយក ជីវប្រវត្តិសង្ខេបខ្លះៗ អំពីតួឯកទាំង២នាក់នេះ ដើម្បីឲ្យប្រិយមិត្តKhmerload បានជ្រាបកម្សាន្តដូចតទៅ៖

តួឯកស្រីមានឈ្មោះពេញថា Esther Supreeleela ឈ្មោះហៅក្រៅថា Esther កញ្ញាបានកើតនៅថ្ងៃទី ១៨ ខែឧសភា ឆ្នាំ១៩៩៤ នៅឯទីក្រុងបាងកក ប្រទេសថៃ។ កញ្ញាមានសញ្ញាតិ ថៃ កាត់ ម៉ាឡេស៊ី។ Esther នាងមានកម្ពស់ ១៦៧សម ទម្ងន់ ៤២គីឡូក្រាម និងកាន់សាសនាគ្រិស្ត។ លើសពីនេះ Esther នាងសម្តែងបានចំនួន១៤រឿងមកហើយ ហើយសុទ្ធសឹងតែជារឿងល្បីៗថែមទៀតផង។ កញ្ញាក៏ធ្លាប់បានទទួលបានពាន់រង្វាន់ Miss Cawall កាលពីឆ្នាំ២០០៩កន្លងទៅផងដែរ។ Esther នាងជាតារាសម្តែងវ័យក្មេង និងជាតារាម៉ូដែល ល្បីឈ្មោះក្នុងប្រទេសថែមទៀតផង។

រីឯតួប្រុសវិញមានឈ្មោះថា Sean Jindachot ជាឈ្មោះក្នុងសិល្បៈ រីឯឈ្មោះដើមកំណើតវិញ មានឈ្មោះថា Torn Jindachot ប៉ុន្តែឈ្មោះហៅក្រៅវិញ ហៅថា Sean លោកមានបងស្រី ជាតារាសម្តែងមានឈ្មោះថា Ploy jindachot។ គួរឲ្យដឹងថា Sean កើតនៅថ្ងៃទី ២៧ ខែតុលា ឆ្នាំ១៩៨៨ និង មានកម្ពស់១៧៤សម។ Sean ធ្លាប់សម្តែងបានជាង១០រឿងមកហើយ។ ហើយលោកក៏ជាតារាសម្តែង និងតារាម៉ូដែល ល្បីឈ្មោះនៅក្នុងប្រទេសថៃផងដែរ។

គួរឲ្យដឹងថា Sean និង Esther ចាប់ផ្តើមសម្តែងរឿងជាមួយគ្នា ដំបូងគឺរឿង «leh Ratee» កាលពីឆ្នាំ២០១៥។ ស្របពេលជាមួយគ្នានេះដែរ នៅក្នុងឆ្នាំ២០១៥ដដែល ពួកគេក៏បានសម្តែងរួមគ្នាមួយរឿងទៀត គឺរឿង«Ugly duckling: Boy’s Paradise» ដែលរឿងបន្ទាប់នេះគឺ ពួកគេបានទទួលការចាប់អារម្មណ៍ ច្រើនជាងរឿងមុនៗទ្វេរដងទៅទៀត ព្រមទាំងទទួលបានការគាំទ្រខ្លាំងមែនទែន ពីសំណាក់អ្នកគាំទ្រពីគ្រប់មជ្ឈដ្ឋានទាំងអស់ មិនថាក្នុងឬក៏ក្រៅប្រទេសនោះទេ។ ហើយរឿងទាំង២ដែលពួកគេសម្តែងរួមគ្នានេះ គឺថាមានសុទ្ធសឹងតែឈុតស្និទ្ធិស្នាលផ្អែមល្អែម ជាពិសេសទៀតនោះគឺឈុតថើបគ្នា បើនិយាយទៅគឺច្រើនតែម្តង ដែលទាំងនេះហើយជាហេតុធ្វើឲ្យមានអ្នកគាំទ្ររឹតតែស្រលាញ់ និងចូលចិត្តអ្នកទាំង២ទ្វេរដងឡើង។

ប៉ុន្តែមិនថាយ៉ាងណា អ្វីដែលគួរឲ្យកត់សម្គាល់ជាងនេះទៀតនោះគឺ មានប្រិយមិត្តអ្នកគាំទ្រជាច្រើន មានភាពសង្ស័យទៅលើទំនាក់ទំនង ស្អិតរមួតរវាងអ្នកទាំង២ ថាតើអ្នកទាំង២នាក់នេះ គឺជាសង្សារនឹងគ្នាយ៉ាងពិតប្រាកដមែន ឬមួយយ៉ាងណា ពីព្រោះឃើញថា អ្នកទាំង២ ពិតជាស្និតស្នាលនឹងគ្នាខ្លាំងមែនទែន ទាំងក្នុង និងក្រៅសាច់រឿង គឺដូចជាសង្សារនឹងគ្នាដូច្នោះឯង។ ហើយអ្វីដែលអ្នកគាំទ្រជាច្រើន ប្រាថ្នានោះ គឺចង់ឲ្យអ្នកទាំង២ ស្រលាញ់គ្នាមែនទែន ទាំងក្នុង និងក្រៅឈុតឆាកផងដែរ៕

• ភាពយន្ត
• យុវវ័យ
• ស្នេហា