ខេត្តប៉ៃលិន ៖ គេសង្កេតឃើញគ្រឿងឧបភោគបរិភោគជាច្រើនប្រភេទដូចជា ម្សៅស៊ុប ម្សៅស៊ុបខ្នរ មីកញ្ចប់តូច ទឹកក្រូចដបជ័រតូចធំ និងគ្រឿងកំប៉ុងជាដើម ដែលអាជីវករកំពុងដាក់លក់នៅតាមតូបនានាក្នុងភូមិហួសកាលបរិច្ឆេទ និងខូចគុណភាព ត្រូវបានសមត្ថកិច្ចកាំកុងត្រូលសាខាខេត្តប៉ៃលិន សហការជាមួយមន្ត្រីនៃមន្ទីរពាណិជ្ជកម្មខេត្ត ចុះត្រួតពិនិត្យ និងដកហូតយកទៅរក្សាទុកនៅស្នាក់ការកាំកុងត្រូល ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ដើម្បីរៀបចំដុតកម្ទេចចោលនៅពេលខាងមុខ ។
ការចុះត្រួតពិនិត្យ និងដកហូតទំនិញខូចគុណភាពនេះធ្វើឡើងកាលពីព្រឹកថ្ងៃទី០២ ខែមិថុនា ឆ្នាំ២០១៦ ក្រោមការដឹកនាំរបស់លោក សាន វិជ្ជាសារ៉ាវុធ ប្រធានកាំកុងត្រូលសាខាខេត្ត ដោយមានការអញ្ជើញចូលរួមពីលោក វ៉ាន់ ហួរ ប្រធានការិយាល័យគ្រប់គ្រងអាជីវកម្ម នៃមន្ទីរពាណិជ្ជកម្ម ដែលប្រតិបតិ្តការនៅភូមិក្បាលព្រលាន សង្កាត់អូរតាវ៉ៅ និងភូមិអូរច្រាកណ្តាល សង្កាត់ទួលល្វា ក្រុងប៉ៃលិន ។
លោក សាន វិជ្ជាសារ៉ាវុធ ប្រធានកាំកុងត្រូលសាខាខេត្តប៉ៃលិន បានឱ្យដឹងថា បើអាជីវករលក់ដូរទំនិញឬគ្រឿងឧបភោគបរិភោគហួសកាលបរិច្ឆេទ និងខូចគុណភាពឱ្យទៅប្រជាពលរដ្ឋទិញយកទៅទទួលទាន ពិតជាធ្វើឱ្យប៉ះពាល់ដល់សុខភាពធ្ងន់ធ្ងរណាស់ ជាពិសេសកុមារតូចៗ អាចប្រឈមនឹងអាការរាគរុស ក្អួតចង្អោរ ឬពុលធ្វើឱ្យស្លាប់បាត់បង់ជីវិតថែមទៀតផង ។ លោកបន្តទៀតថា ដោយមានការព្រួយបារម្ភចំពោះបញ្ហាសុវត្ថិភាពសុខភាពរបស់ប្រជាពលរដ្ឋ ទើបខាងលោកបានដឹកនាំកម្លាំងចុះត្រួតពិនិត្យ និងដកហូតជាញឹកញាប់ ដោយតូបខ្លះដកហូតបានម្តង ខ្លះទៀតបានពីរទៅបីដង តែខាងអាជីវករនៅបន្តដាក់លក់របស់ទាំងនោះជូនប្រជាពលរដ្ឋនៅក្នុងភូមិដដែល ។ ដូច្នេះហើយទើបខាងលោកបន្តចុះទៅកន្លែងដដែលដើម្បីធ្វើការដកហូតរបស់ទាំងនោះបានជាច្រើននាំឱ្យមានការខាតបង់ គួរឱ្យសោកស្តាយជំនួសម្ចាស់តូបផងដែរ ។
ប្រភព៖ កោះសន្តិភាព
កំណត់ហេតុខ្មែរឡូត
គួររំលឹកថា កាលពីថ្ងៃទី១៤ ខែឧសភា ឆ្នាំ២០១៦កន្លងទៅនេះ លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តប៉ៃលិន សហការជាមួយ មន្រ្តីមន្ទីរពាណិជ្ជកម្មខេត្ត បន្តចុះត្រួតពិនិត្យគុណភាពទំនិញនៅតាម គេហដ្ឋានក្នុងក្រុងប៉ៃលិន ព្រមទាំងអប់រំប្រជាពលរដ្ឋឲ្យចេះពិនិត្យ រកមើលទំនិញខូចគុណភាព និងស្នើឲ្យបញ្ឈប់ការលក់ទំនិញខូចគុណភាព។ លោក សាន វិជ្ជាសារ៉ាវុធ ក៏បានអប់រំក្រុមអាជីវករឲ្យយល់ពីផលលំបាក ដែលបង្កចេញពីការប្រើប្រាស់ទំនិញ ខូចគុណភាពនេះ។
ការចុះពិនិត្យទំនិញនេះ មន្រ្តីកាំកុងត្រូលខេត្តប៉ៃលិន បានដកហូតទំនិញ ខូចគុណភាពមួយចំនួនផងដែរ។ ទំនិញដែលដកហូតនោះរួមមាន៖ ទឹកក្រូចដបចំនួន ៦៣ដប, ទឹកត្រឡាចកញ្ចប់ចំនួន ៩កញ្ចប់, ទឹកដោះគោជូចំនួន ០៣ដប, មីកំប៉ុងចំនួន ២កញ្ចប់, ទឹកខ្មេះរូបទន្សាយចំនួន ៣១ដប៕
លើសពីនោះទៅទៀត កាលពីថ្ងៃទី ១៣ ខែមករា ឆ្នាំ២០១៦ មន្ត្រីជំនាញបានអះអាងថា សព្វថ្ងៃនេះផ្សារចំនួន២ក្នុងស្រុកអូរជ្រៅ ខេត្តបន្ទាយមានជ័យ ជាប់ចំណាត់ថ្នាក់ខាងលួចលក់ទំនិញខូចគុណភាព និងទំនិញហួសដឺឡេនោះគឺផ្សារគត្តសត និងផ្សារ អូរបីជាន់ជាប់ព្រំដែនកម្ពុជាថៃ។ក្រោយពីទទួលបានព័ត៌មាន ពីភាពមិនប្រកតីនេះ នៅព្រឹកថ្ងៃទី១៣ ខែមករា ឆ្នាំ២០១៦នេះ លោក ស៊ាន ស៊ីណាត ប្រធានសាខាកាំកុង ត្រូលខេត្តបន្ទាយមានជ័យ បានចាប់តាំងមន្ត្រីរបស់ខ្លួន សហការជាមួយមន្ទីរពាណិជ្ជកម្ម នគរបាលប្រឆាំងបទល្មើសសេដ្ឋកិច្ចខេត្ត និងក្រសួង ឲ្យចុះពិនិត្យរុករកទំនិញខូចគុណភាព និងទំនិញហួសកាលបរិច្ឆេទប្រើប្រាស់ ពីផ្សារទាំង២ ខាងលើ ដើម្បីប្រមូលទំនិញហាមឃាត់ ទាំងនោះមកដុតកម្ទេច ចោលតាមច្បាប់។
លោក ហុង លៀង អនុប្រធានទី១ទទួលបន្ទុកទីផ្សារ នៃសាខាកាំកុងត្រូល ខេត្តបន្ទាយមានជ័យ បានឲ្យដឹងថា ក្នុងប្រិតិបត្តិការនេះ ក្រុមការងារជំនាញ ដកហូតបាននូវត្រីខកំប៉ុង ១៣១កំប៉ុង នំចម្រុះ ២២៥កញ្ចប់ ទឹកផ្លែឈើនិងចាហ៊ួយ ៦៩កំប៉ុង ចាហ៊ួយដូងថាញ់ប៊ិញ នាំចូលពីវៀតណាម ២០កញ្ចប់ធំស្មើ ៤៨០កញ្ចប់តូច ទំនិញនេះដកពីដេប៉ូឈ្មោះ ឡុង សុគន្ធារី នៅផ្សារអូរបីជាន់។លោកបន្តថា ចំពោះផ្សារគត្តសតដកហូតបាន ទឹកដោះគោ ៧៨កំប៉ុង ដំណាប់ដូងថាញ់ប៊ីញ ៤៥កញ្ចប់ធំស្មើ ១០៨០ កញ្ចប់ ទឹកខ្មេះ ២៩ដប និងទំនិញចម្រុះមួយចំនួនទៀត ទំនិញទាំងនេះបានដកហូតពីដេប៉ូ ចាន់ ថា។លោក ហុង លៀង បន្តថថា ទំនិញទាំងនេះភាគច្រើន ជាទំនិញខូចគុណភាព ទំនិញហួសដឺឡេ និងជាទំនិញ មានជាតិគីមី ដែលត្រូវហាមលក់ លើទីផ្សារ នឹងត្រូវបានចាប់ប្រមូល យកទៅដុតកម្ទេចចោល ព្រោះវាបង្ក គ្រោះថ្នាក់ដល់សុខភាព មនុស្សឬអ្នកប្រើប្រាស់ធ្ងន់ធ្ងរ ពិសេសកូនក្មេង បង្កឲ្យកើតនូវជម្ងឺ មហារីក និងជម្ងឺផ្សេងៗ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
