ព្រះសីហនុៈ ទណ្ឌិតជនជាជនជាតិរុស្ស៊ី ដែលរំលោភផ្លូវភេទកុមារច្រើនជាងគេបំផុត និងធំជាងគេបំផុត នៅកម្ពុជា ដែលជាវិនិយោគិន រមណីយដ្ឋានដ៏ធំមួយ លោក Alexander Trofimov បានមានសេរីភាពចេញពីពន្ធនាគារខេត្តព្រះសីហនុវិញហើយ កាលពីថ្ងៃអង្គារ ក្រោយពីព្រះមហាក្សត្រ នរោត្តម សីហមុនី បានព្រះរាជទានការលើកលែងទោសមក។ នេះបើយោងតាមប្រធានពន្ធនាគារខេត្ត ដែលបានថ្លែងកាលពីម្សិលមិញ។
លោក ពេជ្រ វាសនា ប្រធានពន្ធនាគារខេត្តព្រះសីហនុ បានថ្លែងថា លោក Trofimov ត្រូវបានដោះលែង កាលពីថ្ងៃអង្គារបន្ទាប់ពីទទួលបានព្រះរាជទានការលើកលែងទោស នៅក្នុងករណីរំលោភផ្លូវភេទកុមារដ៏ធំបំផុត មិនធ្លាប់កើតឡើងក្នុងប្រទេសនេះ។ លោក ពេជ្រ វាសនា បានថ្លែងប្រាប់ភ្នំពេញប៉ុស្តិ៍ថា៖«យើងបានស្នើព្រះមហាក្សត្រ នរោត្តម សីហមុនី ព្រះរាជទានលើកលែងទោសគាត់ ព្រោះគាត់ បានកែខ្លួនហើយ ក្នុងអំឡុងពេលគាត់ជាប់ឃុំក្នុងពន្ធនាគារ»។
អតីតប្រធានក្រុមហ៊ុនវិនិយោគកោះពស់ ជនជាតិរុស្ស៊ីរូបនេះ ត្រូវបានចោទប្រកាន់ក្នុងឆ្នាំ ២០០៧ ពីបទទិញពេស្យាចារកុមារី ៦ រូប អាយុចាប់ពី ៦ ដល់១៦ ឆ្នាំ។ ក្រោយករណីដំបូងត្រូវបានចោទប្រកាន់ ក្មេងស្រី ១៣ រូបថែមទៀត ដែលរួមមានម្នាក់ជាមនុស្សថ្លង់ផង បានចោទប្រកាន់ពាណិជ្ជករជាតិរុស្ស៊ី ដែលបច្ចុប្បន្នមានវ័យ ៤៥ ឆ្នាំរូបនេះ ពីបទរំលោភផ្លូវភេទពួកគេ។ ក្នុងសវនាការជាបន្តបន្ទាប់ Trofimov ត្រូវបានផ្តន្ទាទោសពីបទរំលោភផ្លូវភេទលើក្មេងស្រីកម្ពុជា ចំនួន ១៧ នាក់។
ទោះបីក្មេងស្រីរងគ្រោះក្មេងបំផុតអាយុ ៦ ឆ្នាំក្តី ពិរុទ្ធជន Trofimov តាមប្រមាញ់ចម្បងបំផុត ក្មេងស្រីមកពីគ្រួសារក្រីក្រ ដែលមានអាយុចន្លោះពី ១១ ទៅ ១៤ ឆ្នាំ។ គាត់ក៏រងនូវការតាមចាប់ខ្លួន នៅប្រទេសរុស្ស៊ីដែរ ពាក់ព័ន្ធការចោទប្រកាន់រំលោភកុមារនៅទីនោះ ប៉ុន្តែសាលាឧទ្ធរណ៍កម្ពុជា កាលពីខែមិថុនា ឆ្នាំ ២០១០ បានច្រានចោលសំណើពីរដ្ឋាភិបាលរុស្ស៊ីដើម្បីធ្វើបត្យាប័នបុរសរូបនេះ។
ពិរុទ្ធជន Trofimov បានដឹកនាំគម្រោងតម្លៃ ៣០០ លានដុល្លារ ដើម្បីប្រែក្លាយកោះពស់ ឲ្យទៅជារមណីយដ្ឋានទំនើបមួយនៅពេលគាត់ត្រូវបានចាប់ខ្លួន។ ក្រោយផ្តន្ទាទោស និងការសារភាព ក្នុងតុលាការថា គាត់បានរំលោភផ្លូវភេទក្មេងស្រី ដើមចោទ ១៦ នាក់ ដែលបានចោទប្រកាន់គាត់ គាត់ត្រូវបានផ្តល់ឲ្យដេកក្នុងបន្ទប់ឃុំឃាំងតែម្នាក់ឯង ហើយត្រូវបានអនុញ្ញាតឲ្យចេញចូលពន្ធនាគារ នៅពេលយប់ជាច្រើនលើកផងដែរ។ នេះបើយោងតាមលោក សែ រស្មី មន្ត្រីស៊ើបអង្កេតប្រចាំខេត្តរបស់អង្គការលីកាដូ។
លោក សែ រស្មី បានមានប្រសាសន៍ថា៖«ក្នុងពេលដែលគាត់ជាប់ឃុំ នៅពន្ធនាគារ គាត់មានសេរីភាពជាងទណ្ឌិតដទៃទៀតខ្លាំងណាស់ ហើយក៏មានបន្ទប់គុកដាច់ដោយឡែកពីគេដែរ»។
មន្ត្រីការពារកុមារ បានសម្តែងក្តីបារម្ភ និងខឹងសម្បា ចំពោះការដោះលែងលោក Trofimov។ មន្ត្រីម្នាក់ បានថ្លែងក្នុងលក្ខខណ្ឌអនាមិកថា៖«ការដោះលែងគាត់គួរបារម្ភ និងឈឺចាប់ខ្លាំងណាស់ សម្រាប់ជនរងគ្រោះទាំងអស់ និងសម្រាប់គ្រួសាររបស់ពួកគេ។ ជនរងគ្រោះ និងអ្នកដែលការពារពួកគេ មានអារម្មណ៍គ្មានសុវត្ថិភាពទេ»។ បុគ្គលិកនៃអង្គការមិនមែនរដ្ឋាភិបាលមួយចំនួន ដែលតាមដានករណីនេះ បានថ្លែងថា ពួកគេ បានទទួលនូវការគំរាមកំហែង។
បុគ្គលិកនៅការិយាល័យក្រុមហ៊ុនវិនិយោគកោះពស់ នៅរាជធានីភ្នំពេញ និងរមណីយដ្ឋានឆ្នេរសមុទ្រ នៃក្រុងព្រះសីហនុ បានថ្លែងប្រាប់ភ្នំពេញប៉ុស្តិ៍ថា ពួកគេពុំដែលដឹងអំពីអតីតប្រធានក្រុមហ៊ុនរបស់ពួកគេឡើយ។ កញ្ញា ណូ នីតា តំណាងលក់របស់ក្រុមហ៊ុននេះ នៅរាជធានីភ្នំពេញ ដំបូងបាននិយាយថា គាត់លែងជាប្រធានក្រុមហ៊ុនទៀតហើយ ប៉ុន្តែនៅពេលសួរថា តើគាត់នៅមានទំនាក់ទំនងជាមួយក្រុមហ៊ុនដែរឬទេ? នាងបានឆ្លើយថា៖«ខ្ញុំមិនដែលឮឈ្មោះគាត់ទេ»។ នាងបានបន្តថា ពុំមាននរណាម្នាក់ ក្នុងការិយាល័យរបស់នាងដឹងអំពីគាត់ឡើយ។ បុគ្គលិកក្រុមហ៊ុននៅក្រុងព្រះសីហនុ ក៏បានឆ្លើយដូចគ្នានេះផងដែរ។
មន្ត្រីម្នាក់នៅក្រសួងមហាផ្ទៃ បានថ្លែងថា ឈ្មោះរបស់លោក Trofimov ពុំមាននៅក្នុងបញ្ជីទណ្ឌិត ៦៤២ រូប ដែលផ្ញើទៅព្រះមហាក្សត្រ ក្នុងអំឡុងពិធីបុណ្យអុំទូក ដើម្បីសុំព្រះរាជទានការលើកលែង និងកាត់បន្ថយទោសទេ។
លោក លីវ ម៉ូវ អគ្គនាយករងនៃអគ្គនាយកដ្ឋានពន្ធនាគារក្រសួងនេះ បានថ្លែងថា នាយកដ្ឋានលោក បានស្នើសុំព្រះរាជទានលើកលែងទោសសម្រាប់តែទណ្ឌិត ១៣១ រូបប៉ុណ្ណោះ ហើយថា លោក Trofimov ពុំស្ថិតក្នុងចំណោមពួកគេឡើយ។
លោក លីវ ម៉ូវ បានបន្តថា៖ «ខ្ញុំពុំបានដឹងថា នរណាស្នើសុំព្រះមហាក្សត្រលើកលែងទោសលោក Alexander Trofimov ទេ ព្រោះក្នុងបញ្ជីដែលខ្ញុំផ្ញើទៅក្រសួងយុត្តិធម៌ ពុំមានឈ្មោះរបស់គាត់ក្នុងនោះទេ ប៉ុន្តែនៅពេលព្រះមហាក្សត្រឡាយព្រះហត្ថលេខាលើបញ្ជីនោះ ខ្ញុំបានឃើញឈ្មោះរបស់គាត់ ក្នុងព្រះរាជក្រឹត្យ»។ លោកបានបញ្ជាក់ថា ព្រះរាជទានលើកលែងទោសត្រូវបានផ្តល់ឲ្យដល់ទណ្ឌិតចំនួន ១៤៨ រូបតែប៉ុណ្ណោះ។
លោកបានមានប្រសាសន៍បន្តថា៖ «ខ្ញុំមិនដឹងថា លក្ខខណ្ឌពិសេសអ្វីដែលធ្វើឲ្យលោក Alexander Trofimov ទទួលបានព្រះរាជទានលើកលែងទោសពីព្រះមហាក្សត្រទេ»។ លោកបានពន្យល់ទៀតថា ទណ្ឌិត ត្រូវតែជាប់ឃុំ ២ ភាគ ៣ នៃកម្រិតទោសរបស់ពួកគេសិន មុនពួកគេអាចត្រូវបានស្នើសុំព្រះរាជទានការលើកលែងទោសពី ព្រះមហាក្សត្របាន៕
ដកស្រង់ពីគេហទំព័រភ្នំពេញប៉ុស្តិ៍
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]