ខេត្តត្បូងឃ្មុំ ៖ បុរសម្នាក់បានទៅកាប់គាស់ដីក្រោយផ្ទះដើម្បីដាំដំណាំផ្គត់ផ្គង់ជីវភាពគ្រួសារ ស្រាប់តែប៉ះរបស់រឹងៗក៏ឈប់កាប់ព្យាយាមកាយមើលស្ងាត់ៗព្រោះស្មានថាកំណប់ តែពេលកាយទៅដល់ស្រាប់តែបែរជាគ្រាប់មិនទាន់ផ្ទុះទៅវិញ ។ ហេតុការណ៍នេះកើតឡើងកាលពីវេលាម៉ោង៥ និង៣០នាទីល្ងាច ថ្ងៃទី២៧ ខែឧសភា ឆ្នាំ២០១៦ ស្ថិតនៅភូមិបត់ទន្លា ឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ ។
នគរបាលខេត្តត្បូងឃ្មុំបានប្រាប់ឲ្យដឹងនាព្រឹកថ្ងៃទី២៩ឧសភានេះថា ប្រជាពលរដ្ឋឈ្មោះ យឹម ចាន់ថា ភេទប្រុស អាយុ៥៥ឆ្នាំ រស់នៅភូមិភូមិខាងលើ ខណៈកំពុងកាប់ដីក្រោយផ្ទះក៏បានប្រទះឃើញគ្រាប់កប់នៅក្នុងដី ហើយក៏មិនហ៊ានកាប់បន្តទៅទៀតដែរ ។ បន្ទាប់មកបុរសជាម្ចាស់ផ្ទះបានរាយការណ៍ទៅប៉ុស្តិ៍រដ្ឋបាលមូលដ្ឋានឃុំកណ្តោលជ្រុំឲ្យបានដឹង ហើយលោកនាយប៉ុស្តិ៍បានរាយការណ៍បន្តទៅថ្នាក់លើបន្ត ត្រូវបានមន្ត្រីអង្គការស៊ីម៉ាកចុះទៅពិនិត្យជាបន្ទាន់នាថ្ងៃនោះដែរ ក្នុងពេលដែលមកដល់ត្រួតពិនិត្យគ្រាប់ទាំងនោះទើបដឹងថា ជាប្រភេទគ្រាប់ M14 មួយគ្រាប់, M16 ពីរគ្រាប់ និងក្បាលគ្រាប់ DK155 មួយគ្រាប់ ត្រូវបានយកនៅដាក់ក្នុងហឹបសុវត្ថិភាពមួយត្រៀមយកទៅកម្ទេចចោល ។
នគរបាលខេត្តត្បូងឃ្មុំបានឲ្យដឹងទៀតថា តាមការស្រាវជ្រាវទីតាំងដែលបានប្រទះឃើញគ្រាប់ទាំងនេះ គឺជាអតីតបន្ទាយទាហានធំកាលពីសម័យ លន់ នល់ ដោយមានការសង្ស័យអាចនឹងមានគ្រាប់កប់ក្នុងដីបន្តទៀត ត្រូវបានជំនាញស៊ីម៉ាកហ៊ុំព័ទ្ធមិនអនុញ្ញាតឲ្យអ្នកណាចូលទៅទីនោះទេ ព្រោះតែខ្លាចបង្កគ្រោះថ្នាក់ដល់អាយុជីវិត ។
នគរបាលខេត្តត្បូងឃ្មុំបញ្ជាក់ថា នៅក្នុងពេលឆាប់ៗខាងមុខនេះជំនាញរបស់អង្គការស៊ីម៉ាកនឹងដឹកនាំកម្លាំងចុះមកត្រង់ចំណុចភូមិ-ឃុំខាងលើបន្តទៀត ដើម្បីរុករកមើលគ្រាប់ដែលនៅសេសសល់កប់ក្នុងដីចៀសវាងបង្កគ្រោះថ្នាក់ទៅថ្ងៃក្រោយ ៕
ប្រភព៖ កោះសន្តិភាព
ចំណាប់អារម្មណ៍ខ្មែរឡូត៖
ដោយឡែក រំលឹកកាលពីព័ត៌មានលើកមុន កសិករកំពូលសំណាងម្នាក់ មានការភ្ញាក់ផ្អើលយ៉ាងខ្លាំង បន្ទាប់ពីជីកបាន កំណប់លុយ ចំនួន ៦០០លាន ដុល្លារអាមេរិក នៅក្នុងចំការរបស់ខ្លួន ដែលលុយទាំងនោះ ត្រូវគេជឿជាក់ថា ជារបស់ស្តេចគ្រឿងញៀនកូឡុំប៊ី Pablo Escobars។
យោងតាមប្រភពព័ត៌មាន បានឲ្យដឹងថា កសិករចំណាស់ម្នាក់ មានឈ្មោះថា Jose Mariena Cartolos អាយុ៦៥ឆ្នាំ ដែលកាលពីពេលថ្មីៗនេះ គាត់ទទួលបានជំនួយ ឥតសំណង ចំនូន ៣,០០០ដុល្លារអាមេរិក ពីរដ្ឋាភិបាល របស់ប្រទេសកូឡុំប៊ី ក្នុងការចាប់ផ្តើម ដាំដំណាំដូងប្រេង នៅលើផ្ទៃដីដ៏ធំ ដែលជារបស់ ក្រុមគ្រូសារគាត់ អស់រយៈពេល ច្រើនជាង ២០០ឆ្នាំមកហើយ។
ខណៈពេលកំពុងតែ ជីកដីធ្វើប្រឡាយ លោក Cartolos បានជីកប៉ះចំ វត្ថុរឹងម្យ៉ាង ដែលវាគឺជា ធុងពណ៌ខៀវដ៏ធំ ហើយមានជាច្រើន នៅក្នុងដីចំការ របស់គាត់។
ប្រភពដដែលបានឲ្យដឹងទៀតថា នៅក្នុងធុងពណ៌ខៀវទាំងនោះ មានសុទ្ធតែ លុយសុទ្ធ តែម្តង សរុបចំនួន ៦០០លាន ដុល្លារអាមេរិក ហើយមិនមែនជា លុយក្លែងក្លាយ ឬបោះពុម្ភខុសនោះទេ ពោលគឺជាលុយពិត។
គួរបញ្ជាក់ផងដែរថា លុយយ៉ាងច្រើនសន្ធឹកសន្ធាប់នេះ ត្រូវបានគេនិយាយថា គឺជាលុយមួយផ្នែក នៃទ្រព្យសម្បត្តិ ចំនួន ៣០ពាន់លាន ដុល្លារអាមេរិក របស់ស្តេចគ្រឿងញៀនកូឡុំប៊ី មានឈ្មោះថា Pablo Escobars ដែលបានយកទៅកប់ នៅទូទាំងប្រទេសកូឡុំប៊ី។
លោក Pablo Escobars បានស្លាប់ នៅក្នុងទីក្រុង Medellín នៃប្រទេសកូឡុំប៊ី កាលពីថ្ងៃទី២ ខែធ្នូ ឆ្នាំ១៩៩៣ កន្លងទៅនេះ។
ទោះបីជាយ៉ាងណាក៏ដោយ លោក Cartolos មិនអាចទុកលុយនេះ ធ្វើជាកម្មសិទ្ធិផ្ទាល់ខ្លួន បានឡើយ។ លុយទាំងអស់នេះ ត្រូវបានគេរំពឹងថា នឹងប្រើប្រាស់ដោយរដ្ឋាភិបាល របស់ប្រទេសកូឡុំប៊ី ក្នុងការជួយសង្គម និងសេដ្ឋកិច្ចនានា ក្នុងប្រទេសនេះផ្ទាល់ តែម្តង៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
