ភ្នំពេញ៖ ក្រសួងសេដ្ឋកិច្ច និងហិរញ្ញាវត្ថុ បានចេញសេចក្តីណែនាំមួយប្រាប់ដល់ថ្នាក់ដឹកនាំក្រសួង និងមន្រ្តីរាជការរបស់ខ្លួន ឲ្យមានការប្រុងប្រយ័ត្ន ក្នុងការយករថយន្តរបស់រដ្ឋទៅប្រើប្រាស់ដោយមិនត្រឹមត្រូវតាមគោលការណ៍របស់ក្រសួង ជាពិសេសមិនត្រូវបើក រថយន្តទាំងនោះទៅកន្លែងកំសាន្តនានា ដូចជា ក្លឹបកំសាន្ត កន្លែងខារ៉ាអូខេ កន្លែងម៉ាស្សាជាដើម។
ក្រៅពីនោះក្រសួងសេដ្ឋកិច្ច បានបញ្ជាក់បន្ថែមថា រថយន្តពាក់លេខរដ្ឋ នឹងមិនត្រូវឲ្យអ្នកដទៃប្រើប្រាស់ក្នុងគោលបំណងផ្សេង ដែលមិនពាក់ព័ន្ធទៅនឹងការបំពេញភារកិច្ចរបស់ខ្លួនឡើយ។
សេចក្តីជូនដំណឹងរបស់ ក្រសួងសេដ្ឋកិច្ច និងហិរញ្ញាវត្ថុដែលអង្គភាព Fresh News ទទួលបាននៅថ្ងៃទី២៨ ខែឧសភានេះ បានបញ្ជាក់ថា ថ្នាក់ដឹកនាំក្រសួង និងមន្រ្តីរាជការ គ្រប់រូប និងគ្រប់លំដាប់ថ្នាក់ ត្រូវប្រើប្រាស់រថយន្ត ពិសេសរថយន្តពាក់ស្លាកលេខរបស់រដ្ឋ ឲ្យបានត្រឹមត្រូវ និងមិនត្រូវប្រើប្រាស់រថយន្តពាក់ស្លាកលេខរដ្ឋ ក្រៅពីម៉ោងបំពេញការងារឡើយ ជាពិសេសមិនត្រូវបើករថយន្យទាំងនោះ ទៅកន្លែងកំសាន្តនានា ដូចជា ក្លឹបកំសាន្ត កន្លែងខារ៉ាអូខេ កន្លែងម៉ាស្សាជាដើម៕
ខាងក្រោមនេះគឺជាខ្លឹមសារនៃសេចក្តីណែនាំរបស់ក្រសួងសេដ្ឋកិច្ច និងហិរញ្ញាវត្ថុ៖
ប្រភព៖ Fresh News
ការកត់សម្គាល់ខ្មែរឡូត៖
គួររំលឹកថា កាលពីវេលាម៉ោង៨និង៣០នាទីយប់ថ្ងៃទី២៦ ឧសភា នៅមុខស្ថានទូតថៃ តាមបណ្តោយមហាវិថីព្រះនរោត្ដម ស្ថិតក្នុងសង្កាត់ទន្លេបាសាក់ ខណ្ឌចំការមន មានករណីរថយន្ដស្លាករដ្ឋ និងរថយន្តទំនើប ផ្ទុះកំហឹងដាក់គ្នា។
នេះបើតាមប្រភពព័ត៌មានបានឲ្យដឹងថា បុរសម្នាក់បើករថយន្តទាំងស្ថានភាពស្រវឹងជ្រុល ទៅកៀរថយន្តស៊េរីទំនើបមួយគ្រឿងទៀត ដែលធ្វើដំណើរស្របទិសគ្នា បណ្តាលឱ្យរថយន្តស៊េរីទំនើបនោះ រងការខូចខាតទ្វារខាងស្តាំ ហើយអ្វីដែលគួរឱ្យកត់សម្គាល់នោះ គឺអ្នកបើករថយន្ដដែលកៀរគេ មិនចេញពីរថយន្តមកដោះស្រាយទេ ធ្វើឱ្យម្ចាស់រថយន្ដស៊េរីទំនើបខឹងសម្បាយ៉ាងខ្លាំង។ នៅក្នុងបើតាមសាក្សី នៅកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តមួយគ្រឿងម៉ាកមែរសឺដេស ពណ៌ស ពាក់ស្លាកលេខភ្នំពេញ 2L-9988 ក្នុងរថយន្តមានគ្នា៣នាក់ ធ្វើដំណើរតាមបណ្តោយមហាវិថីព្រះនរោត្តម ក្នុងទិសដៅពីត្បូងទៅជើង ពេលមកដល់ចំណុចកើតហេតុស្រាប់តែមានរថយន្តប្រាដូ ពណ៌.ស ពាក់ស្លាកលេខរដ្ឋ 172-0242 បើកបរដោយបុរសម្នាក់ស្រវឹងស្រា និងមានបុរសម្នាក់រួមដំណើរ ជាមួយក្នុងទិសដៅស្របគ្នា ។
ពេលមកដល់កន្លែងកើតហេតុ រថយន្តប្រាដូនោះបានបន្ថែមល្បឿនជែងមកខាងស្តាំ ក៏កៀរថយន្តមែរសឺដេសបណ្តាលឱ្យរងការខូចខាតទ្វារ ។ ភ្លាមនោះ រថយន្តដែលបើកកៀរគេ មិនព្រមឈប់ដោះស្រាយគ្នាទេ និងបានព្យាយាមបើករត់តែត្រូវរថយន្តដែលរងការខួចខាតបើកដេញតាម ឃាត់ចម្ងាយប្រហែលជា ១០០ម៉ែត្រទើបស្ទាក់ចាប់បាន ។
បើតាមសម្ដីរបស់ម្ចាស់រថយន្ដមែរសឺដេសបានឱ្យដឹងថា បន្ទាប់ពីបើករថយន្តកៀររថយន្តគាត់ហើយ គេមិនព្រមចុះមកដោះស្រាយគ្នាទេ ព្រមទាំងយកឈ្មោះអ្នកធំមកប្រើថែមទៀតផង ធ្វើឱ្យគាត់ក្ដៅចិត្ដ ក៏បានសំណូមពរដល់សមត្ថកិច្ចឱ្យវាស់ជាតិអាល់កុលអ្នក បើកបររថយន្តប្រាដូនោះ ហើយលទ្ធផលនៃការវាស់ជាតិអាល់កុលជនបង្កមានកម្រិតជាតិស្រវឹង០,៨២ក្នុងមួយលីត្រខ្យល់ ។
ក្រោយពលកើតហេតុ សមត្ថកិច្ចបានយករថយន្តទាំង២គ្រឿងទៅរក្សាទុកនៅអធិការដ្ឋាននគរបាល ខណ្ឌចំការមនរង់ចាំដោះ ស្រាយនៅពេលក្រោយ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
