ខេត្តសៀមរាប ៖ កុមារីអាយុ១៣ឆ្នាំម្នាក់ ដែលក្រុមគ្រួសារបានដឹកចូលមក ព្យាបាលនៅគ្លីនិកឯកជនយីហោ (មន្ទីរពេទ្យសម្រាកព្យាបាលនាគទេព)ខេត្តសៀមរាប ខណៈក្មេងស្រីនោះមានជំងឺក្អួត ចង្អោរ ពេលដឹកទៅដល់គ្លីនិកនាគទេព រួចបុគ្គលិកនោះបានដាក់សេរ៉ូមឱ្យ មួយសន្ទុះក្រោយមក នាងមានសភាពមិនស្រួលខ្លាំង ក៏ត្រូវបានដាច់ខ្យល់ស្លាប់បាត់ទៅ បន្ទាប់ពីបានដាក់ស៊ីរ៉ូមមួយសន្ទុះ ។
ហេតុការណ៍គួរឱ្យរន្ធត់នោះ បានកើតឡើងនៅវេលាម៉ោង៤ទៀបភ្លឺ ឈានចូលថ្ងៃទី៤ ឧសភា ២០១៦ នៅគ្លីនិកនាគទេពសៀមរាប ស្ថិតនៅតាមបណ្តោយផ្លូវលោកតាណឺយ ក្នុងភូមិវត្តបូព៌ សង្កាត់សាលាកំរើក ក្រុងសៀមរាប ។
តាមប្រភពពីឪពុក-ម្តាយ និងប្អូនប្រុសកុមារីរងគ្រោះបានរៀបរាប់ប្រាប់កោះសន្តិភាព កាលពីរសៀលថ្ងៃទី០៥ ឧសភា ២០១៦នេះថា កូនស្រីរបស់ខ្ញុំឈ្មោះទីវ ស៊ីវហ្គិច អាយុ១៣ឆ្នាំ មានទីលំនៅភូមិថ្នល់ សង្កាត់ស្រង៉ែ ក្រុងសៀមរាប ។ មុននឹងដឹកយកមកព្យាបាលនៅមន្ទីរពេទ្យសម្រាកព្យាបាលនាគទេព កាលពីយប់អធ្រាត្រថ្ងៃទី៣ ឧសភា ឆ្នាំ២០១៦ មិនមានជំងឺធំដុំអ្វីនោះទេ គ្រាន់តែ មានអាការៈក្អូតចង្អោរបន្តិបន្តួចប៉ុណ្ណោះ ។
ប្រភពបានរៀបរាប់បន្តថា បន្ទាប់ពីឃើញកូនស្រីមិនស្រួល ក៏ដឹកយកមកព្យាបាលនៅគ្លីនិកឯកជនយីហោមន្ទីរពេទ្យ សម្រាកព្យាបាលនាគទេព នៅផ្លូវលោកតាណឺយ ពេលនោះក៏បានបីចូលទៅក្នុងពេទ្យ ដើម្បីឱ្យពួកគាត់ជួយព្យាបាលឱ្យ ។ មិនទាន់បានពិនិត្យត្រឹមត្រូវផង ស្រាប់តែលោកគ្រូ អ្នកគ្រូពេទ្យ ក៏បានយកស៊ីរ៉ូមមកដាក់បញ្ជូលឱ្យកូនស្រីរបស់ខ្ញុំ ។
ប្រភពបានបញ្ជាក់ថា ក្រោយពីដាក់ស៊ីរ៉ូមបានប្រហែលជា៥ ទៅ១០នាទី កូនស្រីរបស់ខ្ញុំបាទទន់ដៃ ទន់ជើង ត្រដរខ្យល់ ហើយបែកពពុះមាត់ ខណៈពេលនោះ ក្រុមគ្រូពេទ្យឃើញ ក៏បានបញ្ចូលអ៊ុកស៊ីហ្សែនបន្ថែម ។ ប៉ុន្តែប្អូនប្រុសរបស់ខ្ញុំបាទ និងពួកខ្ញុំជាឪពុកម្តាយឃើញដូច្នោះ ក៏សុំយកកូនចេញ ដើម្បីសុំឱ្យលោកគ្រូ ពេទ្យគ្លីនិកនាគទេពយកឡានសង្គ្រោះដឹកក្មួយ (កូន) ខ្ញុំ ទៅពេទ្យកុមារអង្គរផង ដើម្បីជួយសង្គ្រោះ តែបុគ្គលិកគ្លីនិកនោះ បាននិយាយតបវិញថា មានតែឡាន អត់មានសោរ ហើយតៃកុងក៏អត់នៅទៀត ប្អូនខ្ញុំក៏ហៅឡានគ្លីនិកសិរីរ័ត្ន មកដឹកយកទៅព្យាបាលនៅមន្ទីរពេទ្យកុមារអង្គរ ប៉ុន្តែក្មួយស្រីរបស់ខ្ញុំ នាងបានដាច់ខ្យល់ស្លាប់បាត់ទៅហើយ តាំងពីនៅក្នុងមន្ទីរពេទ្យសម្រាកព្យាបាលនាគទេពនោះម្ល៉េះ ។
ប្រភពពីក្រុមគ្រួសារសពកុមារីរងគ្រោះបានបញ្ជាក់បន្ថែមទៀតថា អ្វីដែលសោកស្ដាយនោះ គឺគ្រាន់តែក្អួតបន្តិចបន្តួច អីក៏ឆាប់ម្ល៉េះ ដោយពួកខ្ញុំ ពុំបានព្យាបាលកូនស្រីសំណប់ចិត្តមួយនេះអស់ចិត្តសោះ បើគ្រូពេទ្យគ្មានសមត្ថភាពទេ កុំទទួលកូនស្រីរបស់ខ្ញុំអី ហើយបញ្ជូនគេឱ្យទៅគន្ធាបុប្ផា ឬពេទ្យកុមារអង្គរទៅ កុំឱ្យមានបញ្ហាបែបហ្នឹង?
ជុំវិញករណីខាងលើនេះ បុគ្គលិកខាងផ្នែកគណនេយ្យ មន្ទីរពេទ្យសម្រាកព្យាបាលនាគទេព បានប្រាប់កោះសន្តិភាព តាមទូរស័ព្ទកាលពីវេលា ម៉ោង១រសៀលថ្ងៃទី០៥ ឧសភា ២០១៦នេះថា ពួកខ្ញុំជាបុគ្គលិកគិតលុយទេ ប៉ុន្តែរឿងអីគេនោះ ពួកខ្ញុំមិនបានដឹងទេ បើចង់ដឹងចាំសួរមេខ្ញុំទៅ ព្រោះគាត់មិននៅទេ ។ ចំណែកទូរស័ព្ទវិញខ្ញុំក៏មិនដឹងដែរ បើចុះអីក៏ចុះតាមចិត្តចុះ ។
ប្រភព៖ កោះសន្តិភាព
កំណត់ហេតុខ្មែរឡូត៖
ទាក់ទងនិងករណីយ ស្រដៀងគ្នានេះដែរ នារីម្នាក់បានកើតខ្សល់.គ ពេលក្រុមគ្រួសារ ដឹកបញ្ជូន ទៅព្យាបាល នៅមន្ទីរបង្អែក ស្រុកថ្មពួក បានស្លាប់តាមផ្លូវ ។ ហេតុកការណ៍នេះ បានកើតឡើង នៅម៉ោង៧យប់ ថ្ងៃទី០១ សីហា ២០១៤ នៅភូមិតាយឹង ឃុំគំរូ ស្រុកថ្មពួក ខេត្តបន្ទាយមានជ័យ ។
ប្រភពពីសមត្ថកិច្ច បានឲ្យដឹងថា នារីរងគ្រោះឈ្មោះ មិន គឹមសាន អាយុ២៣ឆ្នាំ នៅភូមិកើតហេតុ ខាងលើ ។ បើតាមសម្តី ពីម្តាយរបស់នាង បាននិយាយថា កូនស្រីរបស់គាត់ ពេលវិលត្រឡប់ មកពីស៊ីឈ្នួល ជំរះស្មៅដំឡូង ឱ្យគេវិញ នាងបានទិញ ទឹកដោះគោ (ឡឹកតាសយ) ផឹកអស់១ដប រួចបានទៅ រែកទឹកអណ្តូង នៅក្បែរផ្ទះ មកចាក់ពាង ទើបតែបាន ១អំរែក នាងបានស្រែកថា ដូចជាមាន អាការវិលមុខ និងតឹងដើមទ្រូង ក្រោយមកក៏សន្លប់ លែងដឹងខ្លួន គាត់ និងបងប្អូន បានដឹកទៅព្យាបាល នៅមន្ទីរពេទ្យបង្អែក ថ្មពួកភ្លាមៗ ដើម្បីសង្គ្រោះបន្ទាន់ តែគួរឲ្យអនិច្ចា ដឹកមិនទាន់ ដល់ពេទ្យផង នាងបានដាច់ខ្យល់ ស្លាប់តាមផ្លូវ។
សមត្ថកិច្ចបាន បញ្ជាក់ដែរថា នារីរងគ្រោះ មិនមែនប៉ះពាល់ ការផឹកទឹកដោះគោ នោះទេ តែវាអាចបណ្តាល មកពីនាង មានការ ហត់នឿយខ្លាំង ពេលផឹក ទឹកដោះគោនោះ វាកើតជាខ្យល់.គ បណ្តាលឲ្យវិលមុខ ឬស្ទះផ្លូវដង្ហើម ចុកណែន ដើមទ្រូង ។ បច្ចុប្បន្ន សពរបស់នាង ត្រូវបានក្រុមគ្រួសារ ចាត់ចែងធ្វើបុណ្យ តាមប្រពៃណី៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]