រាជធានីភ្នំពេញ ៖ សេចក្តីរាយការណ៍ឱ្យដឹងថា កម្លាំងនគរបាលនាយកដ្ឋានអន្តោប្រវេសន៍ ដឹកនាំដោយលោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធីអន្តោប្រវេសន៍ បានធ្វើការចុះឆែកឆេរនៅអង្គការ «សហប្រតិបត្តិការ អភិវឌ្ឍន៍» ដោយឃាត់ខ្លួន ស្ត្រីវៀតណាមម្នាក់ ជាបុគ្គលិកប្រើអត្តសញ្ញាណប័ណ្ណឈ្មោះខ្មែរ ។
ហេតុការណ៍ចុះឆែកឆេរធ្វើឡើង កាលពីវេលាម៉ោង០៣រសៀលថ្ងៃទី០៤ ឧសភា ២០១៦ ស្ថិតនៅចំណុចស្នាក់ការផ្ទាល់ ផ្ទះលេខA48 ក្នុងភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ ។
ប្រភពឱ្យដឹងថា ស្ត្រីខាងលើកាន់អត្តសញ្ញាណប័ណ្ណខ្មែរឈ្មោះចាន់ ធី តែជាជនជាតិវៀតណាម ។ បច្ចុប្បន្ន កម្លាំងកំពុងធ្វើការត្រួតពិនិត្យរកឯកសារបន្ថែមទៀត ៕
ប្រភព៖ កោះសន្តិភាព
កំណត់ហេតុខ្មែរឡូត
គួររំលឹកឲ្យដឹងផងដែរថា កាលពីវេលាម៉ោង ៩និង៣០នាទីព្រឹក ថ្ងៃទី១៩ ខែមីនា ឆ្នាំ២០១៦ កន្លងទៅនេះ ជនជាតិវៀតណាមចំនួន៣៧នាក់ ត្រូវបានកម្លាំងនគរបាលនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃធ្វើការបណ្តេញចេញតាមច្រកទ្វារអន្តរជាតិក្អមសំណ ដែលធ្វើឡើងក្រោមអធិបតីភាព លោកឧត្តមសេនីយ៍ត្រីយ៍ ម៉ុក ប៊ុនឈាង អនុប្រធាននាយកដ្ឋានស៊ើបអង្កេត និងអនុវត្តនីតិវិធី ជាតំណាងដ៏ខ្ពង់ខ្ពស់របស់លោកឧត្តមសេនីយ៍ទោ អ៊ុក ហៃសីឡា។
ក្រោយពីបានរកឃើញនៅពេលដែលពួកគេបានលួចចូលមកស្នាក់នៅ និងបំពេញការងារដោយខុសច្បាប់ក្នុងការដ្ឋានសំណង់ធនាគារវៀតណាមមួយមានឈ្មោះ BIDC ខណ្ឌច្បារអំពៅ រាជធានីភ្នំពេញ កាលពីពេលកន្លងមក។
លោកឧត្តមសេនីយ៍ត្រី ម៉ុក ប៊ុនឈាង អនុប្រធាននាយកដ្ឋានស៊ើបអង្កេត និងអនុវត្តន៍នីតិវិធីបានមានប្រសាសន៍ថា ក្នុងនាមរូបលោកជួសមុខអោយលោកឧត្តមសេនីយ៍ទោ អ៊ុក ហៃសីឡា ជាប្រធាននាយកដ្ឋាន នៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ។
ដើម្បីធ្វើយ៉ាងណាអោយកម្លាំងរបស់លោកពង្រឹងនូវច្បាប់អន្តោប្រវេសន៍នៅក្នុងព្រះរាជាណាចក្រកម្ពុជាអោយមានប្រសិទ្ធភាពខ្ពស់នោះ កម្លាំងនគរបាលនៃនាយកដ្ឋានស៊ើបអង្កេត និងអនុវត្តនីតិវិធីតែងតែបានចុះប្រតិបត្តិការចុះត្រួតពិនិត្យរាល់ការស្នាក់នៅ និងបំពេញការងាររបស់ជនបរទេសជាច្រើនកន្លែងនៅតាមបណ្តាខេត្ត និងរាជធានីភ្នំពេញ។
លោកបន្តទៀតថា ជាក់ស្តែងក្នុងថ្ងៃនេះដែរ កម្លាំងនគរបាលនៃនាយកដ្ឋានស៊ើបអង្កេត និងអនុវត្តន៍នីតិវិធី បានធ្វើការបណ្តេញចេញជនអន្តោប្រវេសន៍ខុសច្បាប់ដែលជាជនជាតិវៀតណាមប្រុសស្រីសរុបចំនួន៣៧នាក់ ទៅតាមច្រកទ្វារអន្តរជាតិក្អមសំណ។
ក្រុមជនជាតិវៀតណាមដែលត្រូវធ្វើការបណ្តេញចេញទៅកាន់ស្រុកកំណើតវិញទាំង៣៧នាក់ខាងលើនេះ គឺបានធ្វើឡើងក្រោយកម្លាំងរបស់លោកធ្វើការសហការណ៍ជាមួយនឹងកម្លាំងនគរបាល នៃការិយាល័យគ្រប់គ្រងជនបរទេសរាជធានីភ្នំពេញ បានរកឃើញពួកគេកំពុងតែស្នាក់នៅ និងបំពេញការងារដោយខុសច្បាប់ក្នុងកាដ្ឋានសំណង់ធនាគារដ៏ធំមួយកន្លែងគឺសំណង់ធនាគារ BIDC របស់ប្រទេសវៀតណាម ដែលមានទីតាំងនៅក្នុងភូមិព្រែកតាអុក សង្កាត់វាលស្បូវ ខណ្ឌច្បារអំពៅ ដោយក្រុមជនជាតិវៀតណាមទាំងនោះ ប្រកបមុខរបរជាកម្មករសំណង់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
