ខេត្តកណ្ដាល ៖ បុរសម្នាក់ត្រូវបានគេវាយនឹងឈើជ្រុងបណ្ដាលឲ្យរបួសធ្ងន់ និងបានស្លាប់ពេលបញ្ជូនដល់មន្ទីពេទ្យ ដែលហេតុការណ៍នេះកើតឡើងនៅក្នុងពិធីបុណ្យសពមួយកាលពីម៉ោង៩ និង៣០នាទីយប់ ថ្ងៃទី២៨ ខែមេសា នៅភូមិព្រែកឃុំត្រើយស្លា ស្រុកស្អាង ។
មន្ត្រីនគរបាលស្រុកស្អាងបានឱ្យដឹងថា ជនរងគ្រោះដែលបានស្លាប់ឈ្មោះ លុក ប៊ុនធឿន ភេទប្រុស អាយុ៥៥ឆ្នាំ មុខរបរកសិក បានស្លាប់ពេលបញ្ជូនទៅដល់មន្ទីពេទ្យកាល់ម៉ែត្ររាជធានីភ្នំពេញ ។ ចំណែកជនសង្ស័យឈ្មោះ ចាំ ម៉ាប់ ភេទប្រុស អាយុ២៦ឆ្នាំ មុខរបរកសិករ បានគេចខ្លួនក្រោយពេលកើតហេតុ ។ អ្នកទាំង២នាក់មានទីលំនៅភូមិ-ឃុំកើតហេតុជាមួយគ្នា ។
មន្ត្រីនគរបាលបានដកស្រង់សំដីសាក្សីឱ្យដឹងថា មុនពេលកើតហេតុជនរងគ្រោះឈ្មោះ លុក ប៊ុនធឿន បានមកអង្គុយលេងកំដរផ្ទះបុណ្យសព ។ ពេលនោះមានឈ្មោះ ថុក ភេទប្រុស បានឲ្យលុយ២ពាន់រៀលទៅជនរងគ្រោះទៅទិញស្រានៅផ្ទះឈ្មោះ នួន លីឡា ហៅម៉ាប់ តែមិនបើកទ្វារលក់ស្រាឲ្យក៏ត្រឡប់មកវិញ មកអង្គុយលេងជាមួយឈ្មោះ ថុក នៅផ្ទះបុណ្យសពដដែល ។
ពេលកំពង់អង្គុយនិយាយគ្នាជាមួយឈ្មោះ ថុក ជនរងគ្រោះបាននិយាយរឿងទៅទិញស្រាផ្ទះឈ្មោះ ម៉ាប់ អត់បើកទ្វារលក់ស្រាឱ្យ ស្របពេលនោះស្រាប់តែឈ្មោះ ចាំ ម៉ាប់ ជាជនសង្ស័យដែលមានឈ្មោះដូចអ្នកលក់ស្រាដើរមកដល់ក្នុងស្ថានភាពស្រវឹងស្រាបានលឺ ស្មានថានិយាយដើមខ្លួន ក៏ខឹងរហូតទំនាស់ពាក្យសំដីគ្នា ។
ពេលនោះជនសង្ស័យបានដើរទៅយកឈើជ្រុងប៉ុនកំភួនដៃប្រវែងជាង១ម៉ែត្រនៅក្បែនោះវាយទៅលើជនរងគ្រោះឈ្មោះ លុក ប៊ុនធឿន ចំក្បាល និងខ្លួនចំនួន៣ឈើជ្រុង បណ្តាលឲ្យដួលទៅដីរបួសធ្ងន់ បន្ទាប់មកជនសង្ស័យបានទម្លាក់ឈើជ្រុងចោលនៅកន្លែងកើតហេតុរួចគេចខ្លួនបាត់តែម្តង ។
ភ្លាមនោះឈ្មោះ លុក ប៊ុនធឿន ត្រូវបានបងប្អូនបញ្ជូនទៅកាន់មន្ទីរពេទ្យកាល់ម៉ែត្រ រាជធានីភ្នំពេញ ក៏បានស្លាប់នៅមន្ទីពេទ្យតែម្តង ។ នៅព្រឹកថ្ងៃទី២៩មេសានេះ ក្រុមគ្រួសារបានបញ្ជូនជនរងគ្រោះមកដល់ផ្ទះវិញ ។
ក្រោយពេលនគរបាលបច្ចេកទេសស្រុកពិនិត្យសាកសពឃើញថា ជនរងគ្រោះស្លាប់ដោយសារមានស្នាមមុតផុងលលាដ៍ក្បាលផ្នែកខាងលើ ស្នាមជាំឆ្អឹងជំនីខាងស្តាំ និងស្នាមជាំនៅស្មាខាងឆ្វេង ហើយបានប្រគល់សាកសពជូនក្រុមគ្រួសាដើម្បីធ្វើបុណ្យតាមប្រពៃណី និងបានកសាងសំណុំរឿងដើម្បីចាត់ការបន្តតាមចាប់ខ្លួនជនសង្ស័យយកមកផ្ដន្ទាទោសតាមច្បាប់ ៕
ប្រភព៖ កោះសន្តិភាព
កំណត់ហេតុខ្មែរឡូត
គួររំលឹកផងដែរថា កាលពីវេលាម៉ោង០៥ល្ងាច ថ្ងៃទី១៧ មេសា នៅចំណុចតាមផ្លូវក្នុងភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ហេតុការណ៍មួយគឺផ្ដើមចេញពីស្នេហាត្រីកោណ បុរសម្នាក់ដោយឃើញយុវជនម្នាក់ទៀតឌុបស្រីស្នេហ៍របស់ខ្លួនទប់ចិត្តមិនបាន ក៏ហៅប្អូនប្រុសមកជួយស្ទាក់ផ្លូវវាយ បណ្ដាលឱ្យយុវជនដែលកំពុងដឹកនារីនោះរងរបួសរហូតសន្លប់។
ក្រោយពីកើតហេតុ ជនសង្ស័យ២នាក់បងប្អូនបានគេចខ្លួន រហូតដល់រសៀលថ្ងៃទី១៩ មេសា ត្រូវបាននគរបាលតាមចាប់ខ្លួនបានម្នាក់ ។ មន្ត្រីនគរបាលក្រុងតាខ្មៅឱ្យដឹងថា ជនសង្ស័យដែលឃាត់ខ្លួននេះឈ្មោះប៊ុនលី ចាន់ថា ភេទប្រុស អាយុ១៨ឆ្នាំ មានទីលំនៅភូមិក្របៅ សង្កាត់កំពង់សំណាញ់ ក្រុងតាខ្មៅ និងម្នាក់ទៀតបានគេចខ្លួនឈ្មោះប៊ុនលី ផល្លា ភេទប្រុស អាយុ២៣ឆ្នាំ ជាកម្មកររោងចក្រ មានទីលំនៅភូមិសង្កាត់ជាមួយគ្នា និងត្រូវជាបងប្អូនបង្កើត ។ ចំណែកជនរងគ្រោះឈ្មោះចាន់ សំណាង ភេទប្រុស អាយុ១៧ឆ្នាំ មានទីលំនៅភូមិព្រែកកាត់ សង្កាត់តាក្តុល ក្រុងតាខ្មៅ ។
ប្រភពបន្តថា មុនពេលកើតហេតុ ជនរងគ្រោះនិងជនសង្ស័យបានស្រឡាញ់នារីម្នាក់ឈ្មោះស្រីណា អាយុ១៨ឆ្នាំ ជាសិស្ស ។ លុះវេលាកើតហេតុ ជនឈ្មោះប៊ុនលី ផល្លា បានឃើញជនរងគ្រោះកំពុងជិះម៉ូតូឌុបនារីនោះតាមផ្លូវ បន្ទាប់មកក៏បានហៅប្អូនប្រុសរបស់ខ្លួនម្នាក់ឈ្មោះប៊ុនលី ចាន់ថា និងយកដែកទីបជ្រុងប្រវែងកន្លះម៉ែត្រយកទៅនាំគ្នាវាយលើជនរងគ្រោះចំក្បាល និងដងខ្លួន បណ្តាលឱ្យមានរបួសស្នាមសន្លប់ដេកនៅលើថ្នល់តែម្តង បន្ទាប់មកក៏ត្រូវបងប្អូនដឹកយកទៅព្យាបាលរបួស នៅមន្ទីរពេទ្យជ័យជំនះ ។
រហូតមកដល់រសៀលថ្ងៃទី១៩ កម្លាំងប៉ុស្តិ៍កំពង់សំណាញ់ សហការជាមួយផ្នែកជំនាញព្រហ្មទណ្ឌក្រុងតាខ្មៅ បានឃាត់ខ្លួនជនសង្ស័យម្នាក់ឈ្មោះប៊ុនលី ចាន់ថា យកមកសាកសួរ ហើយបានសារភាពថា ខ្លួននិងបងប្រុសពិតជាបាននាំគ្នា យកដែកទីបជ្រុងប្រវែងកន្លះម៉ែត្រ វាយទៅលើជនរងគ្រោះប្រាកដមែន ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]