ខេត្តតាកែវ ៖ ក្រុមចោរស្លៀកលីអូដែលបាត់មុខមួយរយៈ ឥឡូវនេះបានលេចមុខជាថ្មីចេញប្លន់ប្រជាពលរដ្ឋទៀតហើយ ដោយប្រមូលយកអស់ទ្រព្យសម្បត្តិពីក្នុងផ្ទះគ្មានសល់ ។ ហេតុការណ៍នេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី២២ កុម្ភៈ ២០១២ ស្ថិតនៅភូមិស្វាយរុន ឃុំជំរះពេន ។
លោកវរសេនីយ៍ត្រី មឿង សារុន អធិការនគរបាលស្រុកសំរោងបានឱ្យដឹងថា ជនរងគ្រោះជាប្តីឈ្មោះក្រិត ជុំ អាយុ៤៥ឆ្នាំ ត្រូវចោរវាយមួយស្វាយកាំភ្លើងបែកក្បាលរបួសធ្ងន់ ចំណែកប្រពន្ធឈ្មោះសយ ណន អាយុ៥០ឆ្នាំ ។ ទ្រព្យសម្បត្តិដែលក្រុមចោរប្លន់បាននោះរួមមានថវិកា១២លានរៀល ខ្សែ.កមាស២ខ្សែ ខ្សែដៃ១ខ្សែ ចិញ្ចៀន១វង់ សរុប២តម្លឹងមាស ។
លោកអធិការនគរបាលស្រុកបានបន្តទៀតថា បើតាមការឱ្យដឹងពីគ្រួសារជនរងគ្រោះបានប្រាប់ថា នៅយប់កើតហេតុ ខណៈជនរងគ្រោះ និងកូនៗកំពុងរៀបចំហូបបាយពេលល្ងាច ស្រាប់តែមានមនុស្ស១ក្រុមមានគ្នា៤នាក់ស្លៀកខោលីអូបិទម៉ាស់មុខទាំងអស់គ្នាប្រដាប់ដោយកាំភ្លើង AK47 ១ដើមដើរចូលភ្ជង់ គំរាមឱ្យប្តីប្រពន្ធខាងលើប្រគល់មាសឱ្យទៅពួកវា ។ ពេលនោះបុរសជាប្តីនិយាយថា អត់មានមាសប្រាក់ទេ ពួកចោរក៏វាយក្បាលបុរសជាប្តី១ស្វាយកាំភ្លើងបែកក្បាល ។ ដោយខ្លាចពួកចោរបាញ់សម្លាប់ក៏បានប្រមូលលុយ និងមាសប្រគល់ទៅឱ្យពួកចោរទាំងអស់ ។
លោកវរសេនីយ៍ទោ សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្តបានឱ្យដឹងថា សមត្ថកិច្ចមិនទាន់មានតម្រុយនៅឡើយ តែទោះជាយ៉ាងណាលោកសន្យាថា រកមុខសញ្ញាក្រុមចោរប្លន់យកមកផ្តន្ទាទោសឱ្យទាល់តែបាន៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
