ចិន៖ កាលពីពេលថ្មីៗនេះ វីដេអូឃ្លីបមួយខ្សែ បាននិងកំពុងតែ ល្បីល្បាញយ៉ាងខ្លាំង នៅលើបណ្តាញអ៊ីនធឺណែត របស់ប្រទេសចិន ដោយបង្ហាញឲ្យឃើញ បុរសជាប្តី ចាប់វាយប្រពន្ធ យ៉ាងព្រៃផ្សៃ នៅចំពោះមុខកូនស្រី របស់ពួកគេ ដែលកំពុងតែ ឈរស្រែកយំ នៅតាមដងផ្លូវសាធារណៈមួយ ក្នុងទីក្រុង Chengdu ប្រទេសចិន។
យោងតាមប្រភពព័ត៌មាន បានឲ្យដឹងថា បុរសជាប្តី ដែលហ៊ានលើកដៃ វាយប្រពន្ធ គ្មានត្រាប្រណី រូបនោះ បានជឿជាក់ថា ប្រពន្ធរបស់គាត់ កំពុងលួចក្បត់ចិត្តគាត់ ទើបបណ្តាលឲ្យផ្ទុះកំហឹង ចាប់វាយប្រពន្ធ នៅតាមដងផ្លូវតែម្តង ខណៈអ្នកដំណើរ នៅក្បែរកន្លែងកើតហេតុ ព្យាយាមចូលឃាត់ដែរ ប៉ុន្តែមិនអាចបញ្ឈប់កំហឹង របស់បុរសរូបនោះ បានឡើយ។
យ៉ាងណាមិញ បុរសគ្មានចិត្តធម៌មេត្តារូបនោះ បានក្លាយជា មុខសញ្ញា ក៏ដូចជាសត្រូវ លេខ១ របស់អ្នកនិយម ប្រើប្រាស់បណ្តាញសង្គម ក្នុងប្រទេសចិន ដោយមានអ្នកប្រើប្រាស់ រាប់ពាន់នាក់ បញ្ចេញមតិរិះគន់ ចំពោះទង្វើរបស់គាត់។
ខាងក្រោមនេះ គឺជាមតិខ្លះៗ ពីអ្នកនិយមប្រើប្រាស់ បណ្តាញសង្គម Weibo៖
«នៅចំពោះមុខ កូនរបស់គាត់ បុរសរូបនេះ គឺជាបិសាច»។
«ខ្ញុំសប្បាយចិត្ត ដែលនៅមានមនុស្សជាច្រើន ចូលជួយ ស្រ្តីរងគ្រោះ។ ខ្ញុំពិតជាកោតសរសើរ ចំពោះប្រជាជន ដែលរស់នៅក្នុងទីក្រុង Chengdu ណាស់»។
«ខ្ញុំមិននិយាយទេថា បុរសដែលកំពុងវាយប្រពន្ធម្នាក់នេះ គឺជាសម្រាម។ ខ្ញុំនិយាយថា បុរសទាំងអស់ ដែលហ៊ានលើកដៃ វាយប្រពន្ធ គឺសុទ្ធតែជាសម្រាម»៕
សូមទស្សនាទិដ្ឋភាព នៅពេលកើតហេតុ ទាំងអស់គ្នា៖
ប្រភព៖ ប្រភព
កំណត់ហេតុខ្មែរឡូត៖
មួយករណីទៀត គឺមានបុរសម្នាក់ បានប្រើអំពើហិង្សាលើប្រពន្ឋ ដោយសារពេលស្រវឹងស្រាមកដល់ផ្ទះមិនឃើញប្រពន្ឋ ហើយពេលឃើញប្រពន្ឋមកដល់ផ្ទះក៏បានឈ្លោះប្រកែកគ្នា រួចវាយប្រពន្ឋឲ្យរងរបួស ក្រោយមកប្រពន្ឋបានរត់គេចចេញពីបុរសជាប្តីដោយខ្លាចប្តីវាយទៀត ស្រាប់តែបុរសជាប្តី បានយកដែកកេះទៅដុតផ្ទះចោលតែម្តង ។
ហេតុការណ៍នេះកើតឡើងកាលពីវេលាម៉ោង៩ និង៣០នាទីព្រឹក ថ្ងៃទី២០ ខែមេសា ឆ្នាំ២០១៦ ស្ថិតនៅភូមិនរាយណ៍ ឃុំនរាយណ៍ ស្រុកឈូក ខេត្តកំពត ។
ស្ត្រីរងគ្រោះជាប្រពន្ធឈ្មោះ ជួន ចន្នី អាយុ២៨ឆ្នាំ បានប្រាប់សមត្ថកិច្ចថា នៅវេលាម៉ោងប្រហែល៩ និង៣០នាទីព្រឹក ថ្ងៃទី២០មេសា ប្តីរបស់នាងឈ្មោះ អេង សុដា អាយុ២៨ឆ្នាំ បានស្រវឹងស្រានៅក្រៅផ្ទះ រួចមកដល់ផ្ទះវិញបានរករឿងវាយតប់នាងខ្ញុំត្រូវកណ្តាលខ្នងមួយដៃបណ្តាលឲ្យរងរបួស ពេលនោះដោយខ្លាចប្តីវាយបន្តជ្រុលដៃរហូតដល់ស្លាប់ ក៏រត់គេចចេញពីប្តី ។
នៅពេលឃើញខ្លួនរត់គេចចេញ ប្តីរបស់នាងក៏បានយកដៃកកេះទៅដុតផ្ទះខ្លួនឯងដែលមានទំហំបណ្តោយ៥ម៉ែត្រទទឹង៤ម៉ែត្រធ្វើអំពីឈើប្រក់ស័ង្កសី ជញ្ជាំងស័ង្កសី បណ្តាលឲ្យឆេះអស់មួយចំហៀង ដោយសារបងប្អូនអ្នកស្រុកជួយពន្លត់ទាន់ ។
ក្រោយពីសមត្ថកិច្ចនគរបាលស្រុកឈូកទទួលពាក្យបណ្តឹងពីស្ត្រីរងគ្រោះជាប្រពន្ឋ លោកឧត្តមសេនីយត្រី ម៉ៅ ចន្ទ័មធុរិទ្ឋ ស្នងការនគរបាលខេត្ត បានបញ្ជាឲ្យនាំខ្លួនជនសង្ស័យឡើងមកកាន់ស្នងការខេត្តដើម្បីធ្វើការសាកសួរ ។
ក្រោយពីសមត្ថកិច្ចនគរបាលការិយាលយ័ព្រហ្មទណ្ឌកម្រិតស្រាលស្នងការខេត្តធ្វើការសាកសួរ ជនសង្ស័យឈ្មោះ អេង សុដា បានសារភាពប្រាប់សមត្ថកិច្ចថា ខ្លួនពិតជាស្រវឹងស្រា ហើយបានប្រើអំពើហិង្សាវាយតប់ទៅលើប្រពន្ឋរបស់ខ្លួន ព្រមទាំងដុតផ្ទះខ្លួនឯងពិតប្រាកដមែន (១លីត្រផឹកតែម្នាក់ឯង) ។
ក្រោយពីស្តាប់សម្តីសារភាពរបស់ប្តីនៅចំពោះមុខសមត្ថកិច្ចរួចហើយ ស្ត្រីជាប្រពន្ធក៏មានចិត្តអាណិតអាសូរប្តីវិញ ដោយសំណូមពរឲ្យសមត្ថកិច្ចកុំដាក់ទោសប្តីរបស់ខ្លួន គ្រាន់តែធ្វើការអប់រំ និងធ្វើកិច្ចសន្យាបញ្ឈប់ការប្រើអំពើហិង្សាតទៅទៀតបានហើយ ។
យ៉ាងណាមិញ ករណីវាយប្រពន្ធបែបនេះ ធ្លាប់បានកើតឡើង ជាច្រើនករណីមកហើយ នៅក្នុងប្រទេសកម្ពុជាយើង ដូចជាបុរសម្នាក់ ត្រូវមន្ត្រីនគរបាល ព្រហ្មទណ្ឌ កំរិតស្រាល នៃស្នងការដ្ឋាន នគរបាលខេត្ត បានបញ្ជូនទៅ កាន់តុលាការ នៅព្រឹកថ្ងៃទី០៨ កញ្ញា ២១០៤ នេះបន្ទាប់ពីបាន ប្រើហិង្សាវាយប្រពន្ធ នឹងអង្រែបុកគ្រឿង បណ្តាលឱ្យ រងរបួសធ្ងន់ កាលពីថ្ងៃ ទី០៦ កញ្ញា ២០១៤ ដោយសារប្រចណ្ឌ។
លោក វរសេនីយ៍ទោ ទេព សារ៉ាត់ នាយនគរបាល ព្រហ្មទណ្ឌកំរិតស្រាល របស់ស្នងការ នគរបាលខេត្ត បាននិយាយថា ជនសង្ស័យ ខាងលើនេះ មានឈ្មោះ សៅ ស៊ីថា អាយុ៣២ឆ្នាំ ចំណែកប្រពន្ធ ដែលរងគ្រោះ មានឈ្មោះ កែវ វាសនា អាយុ៣១ឆ្នាំ រស់នៅក្នុងភូមិទី៦ សង្កាត់ខ្សាម ក្រុងកំពង់ឆ្នាំង។
លោកបានបន្តថា នៅថ្ងៃកើតហេតុ វេលាម៉ោង៧ និង៣០នាទីយប់ ថ្ងៃទី០៦ កញ្ញា បុរសឈ្មោះ សៅ ស៊ីថា ជាប្តីបានយក អង្រែបុកគ្រឿង វាយទៅលើប្រពន្ធ ចំនួន៧អង្រែ ត្រូវជាច្រើនកន្លែង ពិសេសត្រូវក្បាល ហើយមិនត្រឹម តែប៉ុណ្ណឹង ប្តីបានយក កាំបិតប៉័ងតោ វាយចំគុម្ពត្រចៀក បណ្តាលឱ្យបែក ហូរឈាមជោកខ្លួន និងបានទាត់ធាក់ វាយនឹងដៃទៀតផង បណ្តាលឱ្យ រងរបួសធ្ងន់ ដោយចោទប្រកាន់ ថាប្រពន្ធលួច មានសហាយ ។
ស្ត្រីជាប្រពន្ឋឈ្មោះ កែវ វាសនា បានឱ្យដឹងថា នេះមិនមែនជា លើកទីមួយទេ គឺច្រើនលើក រួចមកហើយ ដែលបានកើតឡើង ដោយសារតែ រឿងប្រចណ្ឌ។ តែលើកនេះ ធ្ងន់ធ្ងរពេក នាងទ្រាំមិនបាន ទើបសម្រេចប្តឹង សមត្ថកិច្ចឱ្យចាត់ការ តាមផ្លូវច្បាប់ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]