រាជធានីភ្នំពេញ ៖ បុរសម្នាក់បានរងរបួសដួលបោកក្បាលទៅនឹងថ្នល់សន្លប់ស្តូកស្តឹង ខណៈពេលជិះម៉ូតូបត់ឆ្វេងត្រូវរថយន្ដបុកនៅចំណុចផ្លូវកែងបណ្តាល ឱ្យម៉ូតូដាច់មួយកំណាត់ខាងមុខខ្ទាតចេញពីគ្នាខ្ទេចខ្ទី កាលពីវេលាម៉ោង១២អធ្រាត្រថ្ងៃទី២២ កុម្ភៈ នៅមុខវិទ្យាល័យបឹងត្របែក តាមបណ្ដោយវិថីព្រះមុនីវង្សកែងផ្លូវលេខ៤៨៤ ក្នុងសង្កាត់បឹងត្របែក ខណ្ឌចំការមន។
ជនរងគ្រោះឈ្មោះឈួន ហួត ភេទប្រុស អាយុ៣៥ឆ្នាំ ជាបុគ្គលិកចែកចាយស្រាបៀរ ស្នាក់នៅបន្ទប់ជួលក្នុងភូមិ៥ ក្រុម៣៣ សង្កាត់ផ្សារដើមថ្កូវ ខណ្ឌចំការមន ។ សាក្សីឃើញហេតុការណ៍បានឱ្យដឹងថា មុនពេលកើតហេតុគេឃើញម៉ូតូម៉ាកវន្ដដឺឡូវ ពណ៌ក្រហម បើកបរដោយបុរសម្នាក់តាមវិថីព្រះមុនីវង្សពីត្បូងទៅជើង ចំណែករថយន្ដកូរ៉ូឡា ពណ៌ស្លែ ជិះពីជើងទៅត្បូង ក្នុងទិសដៅបញ្ច្រាសគ្នា។ ខណៈមកដល់កែងផ្លូវលេខ៤៨៤ ម៉ូតូបានបត់ឆ្វេងក៏ត្រូវរថយន្ដបុកចំហៀងខាងឆ្វេងដាច់កង់មុខ ខ្ទេច ឯអ្នកបើកម៉ូតូដួលបោកក្បាលទៅនឹងថ្នល់សន្លប់ ។ ជនរងគ្រោះត្រូវបានរថយន្ដឯកជនដឹកយកទៅសង្គ្រោះនៅគ្លីនិកឯកជន ។
ប្រភពដដែលបន្ដទៀតថា ក្រោយពេលបុកហើយរថយន្ដព្យាយាមបើករត់គេចបានប្រហែល៥០ម៉ែត្រ ត្រូវអ្នកឃើញហេតុការណ៍ដេញតាមឃាត់ឱ្យឈប់ ស្របពេលនោះប៉ូលិសប៉ុស្ដិ៍ដើរល្បាតតាមផ្លូវឃើញក៏ជួយអន្ដរាគមន៍ ចាប់ឃាត់រថយន្តតែម្តង ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]