រាជធានីភ្នំពេញ ៖ កញ្ញា លី អ៊ីវ៉ាធីណា បានប្រកាសបើកចំហជាសាធារណៈថា ខ្លួនមានម្ចាស់បេះដូងហើយ ដែលគ្រោងនឹងរៀបការនៅពីរឆ្នាំខាងមុខ ។ បុរសម្នាក់នោះនាងប្រាប់ឱ្យដឹងថា ជាកូនចៅចិន ហើយធ្លាប់បានទៅលេងនៅប្រទេសចិនជាមួយគ្នាថែមទៀតផង ។ នាង និងបុរសម្នាក់នោះស្គាល់គ្នាអស់រយៈពេល៥ឆ្នាំមកហើយ ហើយក៏សមល្មមអាចឈានទៅរៀបចំពិធីរៀបអាពាហ៍ពិពាហ៍ដែរ ។
ថ្មីៗនេះអ្នកតាមដានរឿងស្នេហារបស់កញ្ញា លី អ៊ីវ៉ាធីណា និយាយឱ្យដឹងថា ចំពោះរឿងរៀបការនេះ គឺនាងបានសម្រេចចិត្តដោយខ្លួនឯង មិនទាន់មានការយល់ព្រមពីចាស់ទុំនៅឡើយទេ ជាពិសេសគឺម្តាយរបស់នាងតែម្តង។ ស្របពេលដែលនាងប្រកាសថាមានម្ចាស់បេះដូងហើយ តែបែរជាម្តាយនាងបដិសេធទៅវិញ។ អ្នកគាំទ្រមានការងឿងឆ្ងល់ថា ហេតុអ្វីបានជាធីណា ប្រកាសថាមានសង្សារ តែបែរជាម្តាយបដិសេធទៅវិញ ចុះពិធីមង្គលការនោះអាចដំណើរការទៅរួចដែរឬ?
ទាក់ទិនទៅនឹងរឿងគូស្រកររបស់តារាចម្រៀង លី អីុវ៉ាធីណា នេះម្តាយរបស់នាងប្រាប់អ្នកយកព័ត៌មានកោះសន្តិភាពតាមទូរស័ព្ទឱ្យដឹងថា «ពិធីមង្គលការវានឹងមកដល់ បើសិនជាបុរសម្នាក់នោះពិតប្រាកដជាមួយនឹងធីណា មែន ។ ចំពោះគូស្រករធីណា គឺនាងបានសម្រេចចិត្តជ្រើសរើសដោយខ្លួនឯង ចំពោះខ្ញុំដែលជាម្តាយគឺមិនទាន់បានសិក្សា ឬក៏ស្វែងយល់ពីបុរសម្នាក់នោះឱ្យបានច្បាស់លាស់នៅឡើយទេ ហើយក៏មិនដឹងថា ពេញចិត្ត ឬមិនពេញចិត្តនៅឡើយនោះដែរ»។
ម្តាយធីណា បន្ថែមថា «ជាការពិតណាស់ដែលធីណា ប្រកាសថា នឹងរៀបការនៅពីរឆ្នាំខាងមុខទៀតនេះ តែចំពោះខ្ញុំ មិនទាន់សម្រេចចិត្តឱ្យនាងរៀបការនោះទេ ព្រោះអ្វីដែលខ្ញុំលួចប្រាថ្នាទុកចំពោះរឿងគូស្រករធីណា ខ្ញុំចង់ឱ្យដូចអ្វីដែលខ្ញុំប៉ងទុក ។ អ្វីដែលខ្ញុំប៉ងនោះគឺមិនខ្ពស់ពេកនោះទេ គឺគ្រាន់តែចង់បានកូនប្រសាដែលខ្ញុំជ្រើសរើសនោះជាមនុស្សចេះគោរពច្បាស់ទុំ ស្រឡាញ់គ្រួសារខ្ញុំ និងកូនស្រីរបស់ខ្ញុំ និងមានការគិតគូរពីអនាគត ចេះទទួលខុសត្រូវខ្ពស់តែប៉ុណ្ណោះ ខ្ញុំមិនទាមទារខ្ពស់ពេកនោះទេ»។
ម្តាយលី អ៊ីវ៉ាធីណា បន្ថែមទៀតថា «នៅពេលដែលនាងខ្ញុំសួរទៅកូនស្រីរបស់ខ្ញុំអំពីរឿងនេះ គាត់ក៏បានឆ្លើយមកវិញដែរអំពីគូអនាគត ប៉ុន្តែបើថាខ្ញុំជំទាស់ ខ្ញុំមិនជំទាស់នោះទេ ខ្ញុំគ្រាន់តែចង់ស្វែងយល់ និងសិក្សាពីបុរសម្នាក់នោះឱ្យបានច្រើនជាងនេះសិន មិនចង់ឱ្យកូនស្រីជ្រើសរើសខុសនោះទេ» ។
ឆ្នាំនេះកញ្ញា លី អ៊ីវ៉ាធីណា មានអាយុ២៦ឆ្នាំហើយ គឺជាវ័យសមល្មមសម្រាប់ជ្រើសរើសគូអនាគតហើយ ៕
ដោយ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
