រៀងរាល់ថ្ងៃសុក្រ ខ្មែរឡូត នឹងធ្វើការដកស្រង់ ព័ត៌មានសំខាន់ៗ ពីប្រភពសារព័ត៌មានមួយចំនួន អំពីដំណើរវិវឌ្ឍន៍នយោបាយ នៅក្នុងប្រទេសកម្ពុជា យកមកចែករំលែក ជូនដល់ប្រិយមិត្តបានជ្រាប ជាដំណឹង។ នៅក្នុងសប្តាហ៍នេះ មានប្រធានបទ គួរឲ្យចាប់អារម្មណ៍ ដែលនឹងមានខ្លឹមសារត្រួសៗ ដូចខាងក្រោម៖
បក្សនយោបាយទាំងពីរ ជួបគ្នាបន្ទាប់ពីទស្សនកិច្ច របស់លោក ហ៊ុន សែន នៅអាមេរិក
អនុប្រធានគណបក្សប្រជាជនកម្ពុជា លោក ស ខេង និងគណបក្សសង្រ្គោះជាតិ លោក កឹម សុខា នឹងជួបគ្នានៅល្ងាចថ្ងៃស្អែកនេះ នៅវិមានរដ្ឋសភាដែលមន្រ្តីគណបក្សទាំងពីរអះអាងថាដើម្បីបន្តការចរចាបញ្ហាសេសសល់និងលើកកម្ពស់វប្បធម៌សន្ទនា។ អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថាពិតជាមានជំនួបនៅថ្ងៃស្អែកមែន តែលោកមិនអាចបញ្ជាក់ថាតើភាគីខាងណាសុំជួបនោះទេ។ លោកក៏មិនទាន់អាចបញ្ជាក់ពីមូលហេតុអ្វីបានជាមានជំនួបនេះ ហើយមានរបៀបវារៈអ្វីខ្លះនោះទេ។ លោកមានប្រសាសន៍ថា៖ “ខ្ញុំមិនទាន់ដឹងកម្មវត្ថុនៃការជួបគ្នាហ្នឹងទេ គ្រាន់តែដឹងថានៅក្រោមក្របខ័ណ្ឌវប្បធម៌សន្ទនា”។ គួរបញ្ជាក់គម្រោងជំនួបនេះធ្វើឡើងបន្ទាប់ពីលោក ហ៊ុន សែន បានបញ្ចប់កិច្ចប្រជុំកំពូលអាមេរិក-អាស៊ាននៅអាមេរិកហើយនឹងមកដល់ប្រទេសកម្ពុជាវិញនៅយប់ថ្ងៃព្រហស្បតិ៍នេះ។ កាលពីក្នុងជំនួបកំពូលនៅលើទឹកដីអាមេរិកនេះ ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា ឲ្យដឹងថាលោកបានសង្កត់ធ្ងន់ទៅមេដឹកនាំអាស៊ានទាំង១០ប្រទេសថាអ្នកនយោបាយបក្សប្រឆាំងមិនគួរត្រូវដាក់ពន្ធនាគារដោយសារការបញ្ចេញមតិរបស់ពួកគេនោះទេ។ ប្រភព៖ VOD
"លោក ហ៊ុន សែន មិនឃើញថាមានបាតុកម្មប្រឆាំង លោកនៅអាមេរិកទេ"
រដ្ឋមន្ត្រីប្រតិភូអមនាយករដ្ឋមន្ត្រី លោក កៅ គឹមហួន ឲ្យដឹងថា លោកនាយករដ្ឋមន្ត្រី ហ៊ុន សែន មិនបានឃើញ មានបាតុកម្មប្រឆាំងរូបលោកនៅសហរដ្ឋអាមេរិកទេ។ ប៉ុន្តែលោក ហ៊ុន សែន បានដឹងថា មានបាតុករថៃគាំទ្រលោក។ ថ្លែងប្រាប់អ្នកកាសែត នៅថ្ងៃយប់ទី១៨ ខែកុម្ភៈ បន្ទាប់ពី លោក ហ៊ុន សែន និងមន្ត្រីមួយចំនួន បានវិលដល់ប្រទេសកម្ពុជា លោក កៅ គឹមហួន ថ្លែងឲ្យដឹងថា កិច្ចប្រជុំ៣ទាំងលើក ក្នុងរយៈពេល២ថ្ងៃ គឺពីថ្ងៃទី១៥ និងទី១៦ ខែកុម្ភៈ លោក ហ៊ុន សែន មិនបានឃើញមានបាតុកម្មប្រឆាំងរូបលោកទេ។ លោកអះអាងបន្តថា ប្រសិនបើលោក ហ៊ុន សែន ឃើញមានបាតុកម្មប្រឆាំងលោក ហ៊ុន សែន លោក នឹងចុះចាប់ដៃ ជាមួយក្រុមបាតុករ។ ប្រភព៖ RFA
បក្សជំទាស់ថា សហភាពអន្តរសភា IPU មកកម្ពុជាស៊ើបអង្កេតករណី ប្រើហិង្សាលើតំណាងរាស្ត្រ
គណបក្សជំទាស់អះអាងថាគណៈប្រតិភូរបស់គណៈកម្មាធិការសិទ្ធិមនុស្សសហភាពអន្តរសភា IPU បានមកប្រទេសកម្ពុជាដើម្បីស៊ើបអង្កេតពីស្ថានការនយោបាយនៅកម្ពុជា ខណៈសមាជិកព្រឹទ្ធសភានិងតំណាងរាស្ត្រគណបក្សប្រឆំាងនៅរដ្ឋសភាមួយចំនួនត្រូវបានចាប់ដាក់ពន្ធនាគារនិងមួយចំនួនទៀតរងការប្រើហិង្សាឲ្យរងរបួសធ្ងន់ កាលពីចុងឆ្នាំ២០១៥។ អ្នកនាំពាក្យតំណាងរាស្ត្រគណបក្សសង្គ្រោះជាតិនៅក្នុងរដ្ឋសភា លោក ញ៉ែម បុញ្ញឬទ្ធិ មានប្រសាសន៍ថា៖”គណៈប្រតិភូខាងសភាIPUដែលគាត់មកនេះគឺក្នុងបំណងរកព័ត៌មានបន្ថែម ហើយនិងខិតខំរកដំណោះស្រាយ សម្រាប់សមាជិកសភា ក៏ដូចជាសមាជិកព្រឹទ្ធសភា[គណបក្សប្រឆាំង]ដែរបាទ”។ អ្នកនាំពាក្យតំណាងរាស្ត្រគណបក្សប្រជាជនកម្ពុជានៅក្នុងរដ្ឋសភា លោក ឈាង វុន សុំមិនអត្ថាធិប្បាយលើករណីនេះ ដោយលោកអះអាងថាសភាIPUហាមមិនឲ្យផ្សព្វផ្សាយរឿងនេះជាសាធារណៈនោះទេ។ លោកមានប្រសាសន៍ថា៖”ខាងIPUគេអត់ឲ្យយើងនិយាយទេក្មួយ (អញ្ចឹងមានន័យថាIPUមិនបានជជែក អត់ឲ្យបើកជាសាធារណៈទេ) បើឆ្លើយប៉ុណ្នឹងក្មួយឯងចេះស្តាប់ខ្មែរទេ។ ខ្ញុំថាIPUគេស្នើយើងកុំអាលឲ្យយើងផ្សព្វផ្សាយ”។ ប្រភព៖ VOD
ឯកឧត្តម សម រង្ស៊ី ថា រដ្ឋាភិបាលបង្កើតបញ្ហា ហើយដោះស្រាយបំភ័ន្តភ្នែករាស្ត្រ 
ប្រធានគណបក្សសង្គ្រោះជាតិ ឯកឧត្តម សម រង្ស៊ី ដែលកំពុងគេចខ្លួននៅក្រៅប្រទេស បានលើកយកវិធីបំភ័ន្តភ្នែកនិងបន្ទន់ចិត្តប្រជារាស្ត្ររបស់រដ្ឋាភិបាល មកសម្រាយរិះគន់នៅហ្វេសប៊ុករបស់ខ្លួន។ បង្ហោះនៅលើទំព័រហ្វេសប៊ុកខ្លួន ដោយភ្ជាប់ជាមួយកាសែត Cambodia daily ជាភាសាអង់គ្លេស ដែលមានចំណងជើងថា «Hun Sen Defend Value New Electronic Government» នោះ ឯកឧត្តម សម រង្ស៊ី បានចំអកទៅកាន់ប្រមុខរដ្ឋាភិបាលថា បានបង្កើតបញ្ហា១០០ជំពូក តាមអំណាចផ្ដាច់ការខ្លួន ហើយយូៗម្ដង ដោះស្រាយបានបញ្ហាណាមួយនោះ រដ្ឋាភិបាលក៏យកសង្គមហ្វេសប៊ុកមកប្រកាសយ៉ាងអធិកអធម ដើម្បីបំភ័ន្តភ្នែកនិងបន្ទន់ចិត្តប្រជារាស្ត្រប៉ុណ្ណោះ។ ការរិះគន់របស់ឯកឧត្តម សម រង្ស៊ី នេះ គឺធ្វើឡើងក្រោយពីសម្ដេចនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលរបស់លោកនៅពេលនេះ គឺជារដ្ឋាភិបាលអេឡិចត្រូនិក ដែលហៅតាមភាសាអង់គ្លេសថា E-government។ ប្រភព៖ ThmeyThmey
សកម្មជនCNRP ៣០ នាក់ ការពារសុវត្ថិភាពនៅផ្ទះឯកឧត្តម កឹម សុខា ឯគម្រោងបាតុកម្មរំលាយ
អ្នកគាំទ្រគណបក្សសង្គ្រោះជាតិប្រមាណ ៣០ នាក់ បានប្រមូលផ្តុំគ្នា នៅផ្ទះឯកឧត្តម កឹម សុខា ប្រធានស្តីទីគណបក្សសង្គ្រោះជាតិ នៅខណ្ឌទូលគោក ដើម្បីការពារឯកឧត្តម កឹម សុខា ខ្លាចក្រែងមានបាតុកម្មហិង្សាដូចកាលពីចុងឆ្នាំមុន។ សកម្មជនគណបក្សសង្គ្រោះជាតិម្នាក់ បានថ្លែងប្រាប់សារព័ត៌មានថ្មីៗថា ពួកគេមកផ្ទះឯកឧត្តម កឹម សុខា នេះ គឺគ្រាន់តែមានគោលបំណងជួយការពារសន្តិសុខ និងសុវត្ថិភាព ជូនថ្នាក់ដឹកនាំខ្លួន បើសិនមានបាតុកម្មកើតឡើង ដើម្បីបញ្ចៀសកុំឲ្យមានបាតុកម្មដោយហិង្សាគប់ដុំថ្ម ចូលផ្ទះឯកឧត្តម កឹម សុខា ដូចលើកមុនទៀតប៉ុណ្ណោះ។ ប្រភព៖ ThmeyThmey
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
